Oppanna.com

ಏಪುಲು ಹಣ್ಣೇ ತಿಂತವಕ್ಕೆ ‘ಕೇಪುಳು ಹಣ್ಣು’ ಮೆಚ್ಚುಗೋ?

ಬರದೋರು :   ಒಪ್ಪಣ್ಣ    on   10/02/2012    78 ಒಪ್ಪಂಗೊ

ಜೆಂಬ್ರದ ಹಂತಿಲಿ ಜೆನರ ಅಂದಾಜಿ ಹಾಕುತ್ತ ಅಜ್ಜಂದ್ರ ಶುದ್ದಿ ಕಳುದ ವಾರ ಮಾತಾಡಿದ್ದು.
ಈಗಂತೂ ಎಲ್ಲಿ ಹೋದರೂ ಜೆಂಬ್ರದ್ದೇ ಶುದ್ದಿಗೊ; ಜೆಂಬ್ರಂಗಳೇ ಜೆಂಬ್ರಂಗೊ!
ಒರಿಶಾವದಿ ಇಪ್ಪ ಪೂಜೆ-ತಿತಿಗೊ ಮಾಂತ್ರ ಅಲ್ಲದ್ದೆ, ಈ ಒರಿಶ ಮದುವೆಗಳದ್ದೂ ಚೊರಿಯೇ!!
ಎಷ್ಟು ಮದುವೆಗೊ! ನಮ್ಮ ಬೈಲಿಲೇ ತೆಕ್ಕೊಳಿ ನಿಂಗೊ- ನೆರೆಕರೆಲಿ ಮದುವೆ ಆಗದ್ದವೂ, ಮದುವೆ ಆವುತ್ತಿಲ್ಲೇ ಹೇದು ಕೂದವೂ – ಎಲ್ಲೋರುದೇ ಈ ಒರಿಶವೇ ಕಂಕಣ ಕಟ್ಟಿಗೊಳ್ತವೋ ಹೇದು!
ಮೊನ್ನೆ ಕೊಳಚ್ಚಿಪ್ಪುಬಾವನ ಪಾಚದೂಟದ ಪರಿಮ್ಮಳ ಇನ್ನೂ ಕೈಂದ ಸಮಗಟ್ಟು ಹೋಪ ಮದಲೇ – ಮತ್ತೆ ಮೂರು ಹೇಳಿಕೆ ಕಾಗತಂಗೊ – ಓ ಅದ, ನೇತೊಂಡಿದ್ದು. ನಿನ್ನೆ ಮೊನ್ನೆ ಆಗಿ ಮತ್ತೊಂದು ಮದುವೆ ಶುದ್ದಿ ಕೇಳಿತ್ತಪ್ಪ.
ಜೆಂಬ್ರಂಗಳ ಬೆಶಿ ಈಗಳೇ ಏರಿಗೊಂಡಿದ್ದು. ಪೋ!
ಹೋಳಿಗೆ ಹೇಳಿಕೆಗೆ ಹೋಗದ್ದೆ ಕಳಿಗೋ?!

~

ಬೈಲಿನ ಹತ್ತರಾಣ ಅನೇಕ ಜೆಂಬ್ರಂಗಳ ಪೈಕಿ ಮೊನ್ನೆ ಆಚಮನೆಲಿಯೂ ಒಂದು ಕಳುದತ್ತು; ಆಚಮನೆ ದೊಡ್ಡಣ್ಣನ ಎರಡ್ಣೇ ಮಗಳ ಬಾರ್ಸ. ಕುಂಞಿಕೂಸು ಗಾಯತ್ರಿಗೆ ಕುಂಞಿತಂಗೆ ಹುಟ್ಟಿದ ಕೊಶಿ ಅಂದೇ ಮಾತಾಡಿದ್ದತ್ತು ನಾವು ಬೈಲಿಲಿ.
ಪಾಪ – ನಿನ್ನ ತಂಗೆಗೆ ನಾಳೆ ಬಾರ್ಸುದೋ – ಹೇದು ನಾವು ಮೊನ್ನೆ ಗಾಯತ್ರಿಯ ಬಾಯಿಗೆ ಕೋಲು ಹಾಕಲೆ ಹೆರಟು – ಅದು ಜೋರು ಕೂಗಲೆ ಸುರುಮಾಡಿದ್ದು ನಿಂಗೊಗೆ ಗೊಂತಿರ!
ಅನ್ನಪ್ರಾಶನವ ಕುಂಬ್ಳೆಸೀಮೆಲಿ ಬಾರ್ಸ ಹೇಳ್ತವು. ಅದೆಂತಕೆ ಹಾಂಗೆ – ಹೇಳ್ತದು ನವಗರಡಿಯ, ಅಜಕ್ಕಳ ಮಾಷ್ಟ್ರಣ್ಣನೋ,ಮಾಷ್ಟ್ರುಮಾವನೋ ಮಣ್ಣ ವಿವರಣೆ ಕೊಡೆಕ್ಕಟ್ಟೆ.
ಅಬ್ಬೆಹಾಲೋ, ಮಣ್ಣಿಯೋ – ಹೀಂಗೆಂತಾರು ದ್ರವಾಹಾರ ತೆಕ್ಕೊಂಡಿದ್ದ ಬಾಬೆಗೆ ಘನ ಆಹಾರ – ಅನ್ನವ – ಕೊಡ್ಳೆ ಆರಂಭ ಮಾಡ್ತ ಕಾರ್ಯಕ್ರಮವೇ ಅನ್ನಪ್ರಾಶನ. ಸಂಪ್ರದಾಯಲ್ಲಿ ಅದೇ ದಿನ ಹೆಸರೂ ಮಡುಗುತ್ತವು. ಅದಿರಳಿ.

~
ಈ ಜೆಂಬ್ರಕ್ಕೆ ಹೋಪಲೆ ಯೇವ ಬಾವನ ಬೈಕ್ಕು ಸಿಕ್ಕಿತ್ತಪ್ಪೋ ಒಪ್ಪಣ್ಣಂಗೆ – ಹೇದು ಚೆನ್ನೈಭಾವ ಕೋಂಗಿ ಮಾಡ್ಳೂ ಸಾಕು,
ನವಗೆ ಇಲ್ಲೇ ಆಚಮನೆಗೆ ಹೋಪಲೆ ಬೈಕ್ಕು ಎಂತಗೆ – ನೆಡಕ್ಕೊಂಡೇ ಹೋವುತ್ತಿಲ್ಲೆಯೋ!
ಉದೀಯಪ್ಪಗ ಬೇಗ ಹೋದರೆ ಇಡ್ಳಿಕಾಪಿಯೂ ಸಿಕ್ಕುಗು ಹೇಳ್ತ ಲೆಕ್ಕಾಚಾರಲ್ಲಿ ಬೇಗವೇ ಹೋದೆ. ಗ್ರೇಶಿದಾಂಗೇ ಆತು.
ಆಚಮನೆಯೇ ಆದ ಕಾರಣ ದಾಕ್ಷಿಣಿ, ಮುಲಾಜು ಏನಿಲ್ಲೆ – ಎರಡು ಉರು ರುದ್ರ ಹೇಳಿರೆಂತಾತು, ಎಂಟಿಡ್ಳಿಯೂ – ಎರಡು ಸೌಟು ಕ್ಷೀರವೂ ಸಿಕ್ಕಿತ್ತು.

ಬಟ್ಟಮಾವನ ನೇತೃತ್ವಲ್ಲಿ ಒಯಿದೀಕ ಕಾರ್ಯಕ್ರಮಂಗೊ ಚೆಂದಲ್ಲಿ ಕಳಾತು. ಸ್ವತಃ ದೊಡ್ಡಣ್ಣಂಗೇ ಮಂತ್ರ ಅರಡಿವ ಕಾರಣ – ಆಚಮನ ಮಾಡುದು ಹೇಂಗೆ, ಹೂಗು ಹಾಕುತ್ಸುಹೇಂಗೆ, ತೊಳಶಿ ಎಲೆ ಹಿಡ್ಕೊಂಬದು ಹೇಂಗೆ – ಹೇದು ಒಂದೊಂದಕ್ಕೂ ಬಟ್ಟಮಾವ ವಿವರಣೆ ಕೊಡೆಕ್ಕಾದ ಅಗತ್ಯ ಇತ್ತಿಲ್ಲೆ. ಕಾರ್ಯಕ್ರಮಂಗಳೂ ಬೇಗಬೇಗವೇ ಮುಗಾತು.

ಬಾರ್ಸ ಚೆಂದಲ್ಲಿ ಕಳಾತು.
ಮಣ್ಣಿ ತಿಂದುಗೊಂಡಿದ್ದ ಬಾಬೆಗೆ ಅಶನ ತಿಂಬಲೆ ಹೇಳಿಕೊಟ್ಟಾತು. ನಾಳೆಂದ ಅದುವೇ ಹೆಜ್ಜೆಮಡಗಿ ಉಂಗೋ ಏನೋ,
ಉಮ್ಮಪ್ಪ!

ಸುರುವಾಣ ಹಂತಿ ಬಳುಸಿ, ಎರಡ್ಣೇ ಹಂತಿ ಉಂಡು, ಹೆರಡುವೋರ ಹೆರಡುಸಿ, ಒಂದೊರಕ್ಕು ಒರಗಿ ಎದ್ದೂ ಆತು.
ಒಂದು ಬೆಶಿಬೆಶಿ ಛಾಯ ಕುಡುದು ಮೋರೆ ಉದ್ದುವಗ ಗಾಯತ್ರಿ ಪೆರೆಪೆರೆ ಲಡಾಯಿಮಾಡುದು ಅಜನೆ ಆತು.
ಆರತ್ರೆ? – ಹೋ – ಇದು ಅವ° – ನಮ್ಮ ಬೊಂಬಾಯಿ ಬಾವನ ಮಗ° ಅಲ್ಲದೋ!
~

ಆಚಮನೆ ದೊಡ್ಡಣ್ಣನ ಸೋದರ ಮಾವನ ಮಗನೇ ಬೊಂಬಾಯಿಬಾವ.
ಸಣ್ಣ ಪ್ರಾಯಲ್ಲೇ ಕಾರ್ಯ ನಿಮಿತ್ತ ಊರಿಂದ ಹೆರಟ ಕಾರಣ, ಈಗ ಅಲ್ಲಿಯೇ – ದೂರಲ್ಲಿ ಇಪ್ಪದು.
ಬೊಂಬಾಯಿಲಿ ಎಲ್ಲಿ ಕೇಳಿರೆ ಒಪ್ಪಣ್ಣ ಟ್ಟೆಟ್ಟೆಟ್ಟೆ. ಇಲ್ಲಿಂದ ದೂರ, ಬೊಂಬಾಯಿಗೆ ಹತ್ತರೆ; ಅಂತೂ ನವಗೆಲ್ಲ ಬೊಂಬಾಯಿಲಿ – ಹೇಳಿ ಅಷ್ಟೇ ಗೊಂತು.
ಬೊಂಬಾಯಿಬಾವಂಗೆ ಬಂಙಬಂದರೆ ನಮ್ಮ ಭಾಶೆ ನೆಂಪಾವುತ್ತು – ಆದರೆ ಅವರ ಸಂಸಾರಕ್ಕೆ ನಮ್ಮಭಾಶೆ ಮಧ್ಯಮವೇ.
ಬೊಂಬಾಯಿಬಾವನ ಹೆಂಡತ್ತಿ ಗಟ್ಟದಮೇಗಾಣದ್ದಡ. ಅಲ್ಲೇ – ಬೊಂಬಾಯಿಲೇ ಸಿಕ್ಕಿ ಜಾತಕಲ್ಲಿ ಕೂಡಿಬಂದ ಬಗೆ! 😉

ಅದೇನೇ ಇರಳಿ, ಒರಿಶಕ್ಕೊಂದರಿಯೋ, ಎರಡೊರಿಶಕ್ಕೊಂದರಿಯೋ – ಊರಿಂಗೆ ಬಕ್ಕು; ನೆಂಪಾದರೆ ಆಚಮನಗೂ ಬಕ್ಕು.
ಈ ಸರ್ತಿ ಊರಿಂಗೆ ಬಂದಿಪ್ಪಗಳೇ ಈ ಬಾರ್ಸದ ಹೇಳಿಕೆ ಸಿಕ್ಕಿದ ಕಾರಣ – ತುಂಬ ಸಮೆಯ ಕಳುದ ಮತ್ತೆ ಸೋದರತ್ತೆ ಮನೆಗೆ ಜೆಂಬ್ರದೂಟಕ್ಕೆ ಬಂದವು.
ಒಪ್ಪಣ್ಣಂಗೆ ಸುರುವಿಂಗೆ ಗುರ್ತವೇ ಹಿಡಿಯಲೆ ಎಡಿಗಾತಿಲ್ಲೆ, ಹತ್ತನ್ನೆರಡೊರಿಶ ಮದಲು ಕಂಡದಲ್ಲದೋ!

~

ಬೊಂಬಾಯಿ ಬಾವಂಗೆ ಇಬ್ರು ಮಕ್ಕೊ. ಮಕ್ಕಳ ಹತ್ತರೆ ಅವು ಹಿಂದಿಯೇ ಮಾತಾಡುದಡ.
ದೊಡ್ಡ ಮಗಳು ಎಂಟುನೇ ಕ್ಳಾಸು; ಹಿಂದಿಲಿ ಮಾತಾಡಿ ಮಾತಾಡಿ ಈಗ ಹಿಂದಿಲಡ್ಕಿಯೇ ಆಗಿಬಿಟ್ಟಿದೋ ತೋರ್ತು.

ಎರಡ್ಣೇವ ಮಗ – ಗಾಯತ್ರಿಯ ಪ್ರಾಯದೋನು.
ಅವಂಗೂ ನಮ್ಮ ಭಾಶೆ ಬತ್ತಿಲ್ಲೆ – ಆದರೆಂತಾತು, ಗಾಯತ್ರಿಗೂ ಬತ್ತಿಲ್ಲೆ –  ಹಾಂಗಾಗಿ ಅವಿಬ್ರು ಒಳ್ಳೆ ಜೆತೆ.

ತೆಚೆಪೆಚೆ ಮಾತಾಡಿಗೊಂಡ್ರೆ – ಇವೆಂತ ಮಾತಾಡ್ತವು ಹೇದು ದೊಡ್ಡವೇ ಮೇಲೆನೋಡಿಗೊಂಡಿತ್ತವು.
ಆ ಜೆಂಬ್ರಲ್ಲಿ ನಿಸ್ಪೃಹವಾಗಿ, ನಿಸ್ಸಂಕೋಚವಾಗಿ ಮಾತಾಡಿಗೊಂಡದು ಇವಿಬ್ರೇಯೋದು.
~

ಜೆಂಬ್ರ ಕಳುದ ಹೊತ್ತೋಪಗ ಬೊಂಬಾಯಿಬಾವಂಗೆ – ಮಾಷ್ಟ್ರುಮಾವನ ಮನಗೆ ಹೋಯೇಕು – ಹೇದು ಅನುಸಿತ್ತು.
ಸುಮಾರೊರಿಶ ಮದಲೇ ಹೋದ್ಸಡ, ಈಗ ಪುನಾ ಹೋಗಿ ಹಳೆನೆಂಪಿನ ಹೊಸತ್ತು ಮಾಡೇಕು ಹೇಳಿಗೊಂಡು.
ದಾರಿ ಗೊಂತಾಗದ್ರೆ ಹೇದು ಆಚಮನೆ ದೊಡ್ಡಪ್ಪನೂ ಹೆರಟವು. ನವಗೂ ಹೊತ್ತಪ್ಪಗಾಣ ಚಾಯ ಬಯಿಂದು; ಇನ್ನೆಂತ ಬಾಕಿ? – ನಾವುದೇ ಹೆರಟತ್ತು.
ಬೆಳಿಬೆಳಿ ಬೊಂಬಾಯಿಬಾವ, ಅವನಿಂದಲೂ ಬೆಳಿ ಅವನ ಮಗ, ಕನ್ನಡ ಮಾತಾಡುವ ಬೊಂಬಾಯಿ ಅಕ್ಕ – ಅವರ ಮಗಳು.
ಮುಂದಂದ ನಾವು, ಹಿಂದಂದ ಆಚಮನೆ ದೊಡ್ಡಪ್ಪ – ಎಲ್ಲೋರುದೇ ಹೆರಟದು ಮಾಷ್ಟ್ರುಮಾವನ ಮನಗೆ.
ಆಚಮನೆ ದೊಡ್ಡಪ್ಪನಲ್ಲಿಂದ ಮಾಷ್ಟ್ರುಮಾವನಲ್ಲಿಗೆ ಅರ್ದಮೈಲೂ ಆಗ.
ಓ ಆ ಗುಡ್ಡೆ ಹತ್ತಿಳುದು ಹೋದರೆ ಮಾಷ್ಟ್ರುಮಾವನ ಮನೆಯೇ. ಮಾರ್ಗಲ್ಲೇ ನೆಡೆತ್ತರೆ ಅರ್ದ ಮೈಲು, ಇಲ್ಲೇ ವಳಚ್ಚಿಲಿಂದ ಹಾರಿ ಹೋವುತ್ತರೆ ಎರಡು ಪರ್ಲಾಂಗು.
ಎಡೆಲಿ ಸಿಕ್ಕುದು ಎರಡೇ ಗೇಟು – ಒಂದು ದೊಡ್ಡಪ್ಪನವರದ್ದು, ಇನ್ನೊಂದು ಮಾಷ್ಟ್ರುಮಾವನವರದ್ದು.
~

ಗುಡ್ಡೆದಾರಿಲಿ ಮಾತಾಡಿಗೊಂಡೇ ನೆಡವಗ ಉರುಟುರುಟು ಹಣ್ಣುಗೊಂಚಲು ಮದಾಲು ಗೋಷ್ಟಿಆದ್ಸು ಆ ಕುಂಞಿಮಾಣಿಗೆ.
ಸಣ್ಣ ಸಣ್ಣ ಪೊದೆಲುಗಳ ಎಡೆಲಿ ಬಂಬಲವಾಗಿಪ್ಪ ಆ ಕೆಂಪುಕೆಂಪು ಹೂಗುದೇ – ಹಣ್ಣುದೇ ಆ ಮಾಣಿಯ ಗಮನವ ಎಳಕ್ಕೊಂಡತ್ತು.
ಇದೆನಗೆ ಬೇಕೂ – ಹೇಳ್ತಾಂಗೆ ಹಟ ಮಾಡಿದ°.
ಚಿ, ಅದರ ತಿಂಬಲಾಗ – ನಿನಗೆ ಏಪುಲ್ ಕೊಡ್ತೆ ಮನಗೆತ್ತಿದ ಮತ್ತೆ – ಹೇದು ಅವನ ಅಮ್ಮ ಸಮದಾನ ಮಾಡ್ಳೆ ಸುರುಮಾಡಿತ್ತು.
ಮಾಣಿ ಕೇಳ್ತನೋ – ಬೊಬ್ಬೆ ನಿಂದಿದಿಲ್ಲೆ. ಕಂಡದರ ತಿಂದೇ ಕಳಿಯೇಕು.
ಅವಂಗೆ ಹಟ ಜಾಸ್ತಿ – ಹೇದು ಅವನ ಅಮ್ಮ ಪರಂಚಿಗೊಂಡಿದ್ದತ್ತು. ಅವನ ಅಪ್ಪಂಗೂ ಇಪ್ಪಗ ಹಾಂಗೇ ಇದ್ದತು – ಹೇದು ಆಚಮನೆದೊಡ್ಡಪ್ಪ° ಅನುಭವ ಹೇಳುವಗ ಬೊಂಬಾಯಿಬಾವ° ಕಣ್ಣುಸಣ್ಣಮಾಡಿ ನೆಗೆಮಾಡಿಗೊಂಡ°.
ಅಬ್ಬೆಯ ಸೊರ ಏರಿದ ಹಾಂಗೆ ಈ ಮಾಣಿದೂ ಗವುಜಿ ಏರಿತ್ತು.
ಗಲಾಟೆ ಜೋರಪ್ಪಗ ಹೋಗಿ ನೋಡಿದೆ – ಅವ° ಹಟ ಹಿಡುದ್ದು ಎಂತ ಹಣ್ಣಿಂಗೆ ಹೇದು ನೋಡಿರೆ –
ಅದೆಂತರ? ಕೇಪುಳೆ ಹಣ್ಣು!

ಚೆಂದಚೆಂದದ ಕಿಸ್ಕಾರ ಹೂಗಿನ ಗೊಂಚಲಿನ ಒತ್ತೊತ್ತಿಂಗೇ – ಕಡುಕೆಂಪು ಬಣ್ಣದ ಕೆಲವು ಹಣ್ಣುಗಳ ಗೊಂಚಲೂ ಇದ್ದತ್ತು.
‘ಹೋ, ಇದರನ್ನೋ ಅವ° ತಿನ್ನೇಕು ಹೇದು ಹಟ ಮಾಡಿದ್ಸು ಅಕ್ಕ, ಇದರ ತಿಂಬಲಾವುತ್ತು’ – ಒಂದು ಗೊಂಚಲು ಮುರುದು, ಹಣ್ಣಿನ ಕೈಲಿ ತೆಗದು ಬಾಯಿಗೇ ಹಾಕಿಯೂ ತೋರ್ಸಿತ್ತು ನಾವು.
ಕೇಪುಳುಹಣ್ಣು ತಿಂಬಲಕ್ಕು ಹೇಳ್ತದರ ಬೊಂಬಾಯಿಬಾವನೂ ಒಪ್ಪಿದವು, ಆ ಮಾಣಿಯೂ ಒಪ್ಪಿದ° – ಆದರೂ ಅವನ ಅಮ್ಮ ಒಪ್ಪಿದ್ದಿಲ್ಲೆ. ಆತಂಬಗ – ಆ ಹಣ್ಣುಗಳ ಒಳುದೋರಿಂಗೆ ಹಂಚಿ, ತಿಂದು ಮುಗುಶಿ ಆತು.

ಮಾಣಿಯ ಬೊಬ್ಬೆ ಕಮ್ಮಿ ಅಪ್ಪಲೆ ಬೇಗಿಂದ ಏಪುಳು ತೆಗದೂ ಕೊಟ್ಟತ್ತು ಆ ಅಬ್ಬೆ. ಅಲ್ಲದ್ದೆ ಬಾಯಿಮುಚ್ಚೆಕ್ಕೆ ಅವ°!
ಕೇಪುಳುಹಣ್ಣಿನ ಆಕಾರದ್ದು, ಅದೇ ಬಣ್ಣದ್ದು, ಆದರೆ ಚೆಂಡಿನಷ್ಟು ದೊಡ್ಡ – ಕೆಂಪು ಏಪುಳು ಕಂಡಪ್ಪದ್ದೆ, ಕೈಲಿಡೀ ಹಿಡ್ಕೊಂಡು ತಿಂಬಲೆ ಸುರುಮಾಡಿದ° ಆ ಮಾಣಿ.
~

ಮತ್ತೆ ರಜ್ಜ ನೆಡದರೆ ಮಾಷ್ಟ್ರುಮಾವನ ಮನೆಯೇ; ಅಲ್ಲಿಗೆ ಎತ್ತುವನ್ನಾರವೂ ನಮ್ಮ ತಲೆಲಿ ಇದೇ ಓಡಿಗೊಂಡಿತ್ತು.
ಆ ಮಾಣಿಗೆ ಕೇಪುಳುಹಣ್ಣು ತಿಂಬಲೆ ಅವನ ಅಮ್ಮ ಬಿಟ್ಟತ್ತಿಲ್ಲೆ. ಸಣ್ಣ ಇಪ್ಪಗ ನಾವು ತಿಂದುಗೊಂಡಿದ್ದ ಹಣ್ಣುಗೊ ನೆಂಪಾತು ಒಂದರಿ.
ಶಾಲೆಂದ ಮನಗೆತ್ತುವ ದಾರಿಲಿ ಹಣ್ಣಿನೆ ಗೆಡುಗೊ ಎಲ್ಲೆಲ್ಲಿ ಇದ್ದೋ –ಎಲ್ಲ ಗುರ್ತ ಮಡಿಕ್ಕೊಂಡು, ಆಯಾ ಸಮೆಯದ ಹಣ್ಣುಗೊ ನೆಂಪು ಮಡೂಗಿ ತಿಂದುಗೊಂಡಿದ್ದತ್ತು.

ತಿಂಬದು ಹೇದರೆ ಹೇಂಗೆ? ಅನುಭವಿಸಿ ತಿಂಬದು. ಮನಗೆತ್ತುವಗ ಅಮ್ಮಂಗೆ – ಇಂದು ಇಂತಾ ಹಣ್ಣನ್ನೇ ತಿಂದಿದ ಹೇದು ಗೊಂತಕ್ಕು, ನಮ್ಮಂದ ಮದಲು ಅಂಗಿಚಡ್ಡಿಯೇ ಹೇಳುಗು! ಹು!
ಇದೆಲ್ಲ ಈಗಾಣ ಮಕ್ಕೊಗೆ ಅರಡಿಗೊ! ಟೀಚರು ಬೈಗು – ಕ್ಲೀನು ಇಲ್ಲೆ ಹೇದು!!
~

ಕೇಪುಳು ಮಾಂತ್ರ ಅಲ್ಲದ್ದೆ, ಅದರೊಟ್ಟಿಂಗೆ ಸುಮಾರು ಹಣ್ಣುಗೊ ಬಾಲ್ಯಕಾಲಲ್ಲಿ ತಿಂದಿದು.
(ಕೆಲವೆಲ್ಲ ನೆಂಪುಮಾಡಿ ಇಲ್ಲಿ ಪಟ್ಟಿಮಾಡಿದ್ದೆ, ಬಿಟ್ಟುಹೋದ್ದಿದ್ದರೆ ನಿಂಗೊಗೆ ನೆಂಪಾದರೆ ತಿಳಿಶಿಕ್ಕಿ, ಆತೋ?)

  • ಕೇಪುಳು ಹಣ್ಣು:
    ಕಾಡಿಲಿರ್ತ ಕಾಟುಕಿಸ್ಕಾರ ದುರ್ಗೆಗೆ ಹೇಂಗೆ ವಿಶೇಷವೋ, ಅದರ್ಲಿ ಆವುತ್ತ ಹಣ್ಣು ಮಕ್ಕೊಗೂ ವಿಶೇಷವೇ!
    ಕೇಪುಳೆಹಣ್ಣು ತಿಂತ ಸರಿಯಾದ ಕ್ರಮ ಹೇಂಗೆ? ಅದರ ಮಕ್ಕಳತ್ರೇ ಕೇಳೇಕು – ಕೇಪುಳೆ ಹಣ್ಣಿನ ಗುಳ ತಿಂದು, ಒಳುದ ಬಿತ್ತಿನ ಹಲ್ಲಿಲಿ ಕಚ್ಚಿ ಒಡದು – ಅದರೊಳ ಇಪ್ಪ ಚಮ್ಚದ ಹಾಂಗಿರ್ತ ಬೆಳೀ ಆಕೃತಿಯ ತೆಗದು ಚೆಂಙಾಯಿಗೊಕ್ಕೆ ತೋರುಸುದು! ಚಮ್ಚ ತೆಗವಲೆಡಿಯದ್ದೋನು ಬೂಸು – ಹೇದು ಲೆಕ್ಕ!
  • ಚೂರಿ :
    ಮೈಲಿಡೀ ಮುಳ್ಳು ತುಂಬಿದ ಸೆಸಿಯ ಬಗ್ಗುಸಿ, ಪಳಗುಸಿರೆ ಅದರ್ಲಿ ಬಿಟ್ಟ ಕರಿಕರಿ ಹಣ್ಣು ಸಿಕ್ಕುಗು. ಹುಳಿ, ಸೀವಿನ ಒಟ್ಟಿಂಗೆ ಅದರದ್ದೇ ಆದ ಪರಿಮ್ಮಳ. ಅದುವೇ ಚೂರಿಹಣ್ಣಿನ ರುಚಿ.
  • ಕಾರೆ:
    ಕಾರೆಲಿ ಎರಡು ಜಾತಿ ಇದ್ದು, ನಾವು ತಿಂಬಲೆ ಸಣ್ಣಜಾತಿ ಆಯೇಕು, “ಮೂಡುಕಾರೆ” ಹೇಳುದದರ. ದೊಡ್ಡಜಾತಿ ಕಾರೆಕಾಯಿ – ವಿಷಯುಕ್ತ. ಸಾರಡಿತೋಡಿಲಿ ಮೀನಿಂಗೆ ಕಡುಹಾಕಲೆ ಸುಂದರ° ಉಪಯೋಗುಸುಗು.
  • ಜೇಡೆಹಣ್ಣು:
    ಬದಿಯೆಡ್ಕ ಆಸುಪಾಸಿನ ಪಾರೆಗುಡ್ಡೆಲಿ, ಕಲ್ಲಿಲಿ ಬೆಳೆತ್ತ ಮುಳ್ಳಿನ ಪೊದೆಲುಸೆಸಿ. ಆ ಸೆಸಿಯ ಎಡಕ್ಕಿಲಿ ಮಾಲೆಮಾಲೆ ಇಕ್ಕು ಈ ಜೇಡೆ ಹಣ್ಣು. ಒಳ್ಳೆತ ಸೀವು. ಮೂಡ್ಳಾಗಿ ಇದು ಕಾಂಬಲೆ ಸಿಕ್ಕ ಅಡ, ಮಾಷ್ಟ್ರುಮಾವ° ಹೇಳುಗು.
  • ಕೊಟ್ಟೆಮುಳ್ಳು:
    ಬೆಳೀ ಬಣ್ಣದ ಸೀವು ಹಣ್ಣು ತಿಂಬಲೆ ಬಲುರುಚಿ. ಶಾಲಗೆ ಹೋಪಗ ಬಪ್ಪಗ ಇದೊಂದು ತಿನ್ನದ್ದರೆ ಆಗಲೇ ಆಗ.
  • ಚಾಕೊಟೆ:
    ಮುಳ್ಳುಮುಳ್ಳು ಉಂಡ್ಳಕಾಳಿನಷ್ಟಕೆ ಉಂಡೆಯ ಒಳ ಪಿಚಿಪಿಚಿ ಹಣ್ಣು – ಹುಳಿಪಿಂಡ,
    ಆದರೂ ತಿನ್ನದ್ದೆ ಕಳಿಯ ಮಕ್ಕೊಗೆ.  ಜಾಸ್ತಿ ತಿಂದರೆ ಹೊಟ್ಟೆಬೇನೆ ಏಳುಗಡ. ಉಮ್ಮ, ಒಪ್ಪಣ್ಣಂಗೆ ಹಾಂಗೆಂತೂ ಆಯಿದಿಲ್ಲೆ.
  • ಅಬ್ಳುಕ° :
    ವಿಚಿತ್ರ ಹೆಸರಿನ ಈ ಸೆಸಿಗೆ ಮುಳ್ಳುಸಂಪಗೆ ಹೇಳಿಯೂ ಹೇಳ್ತವವಡ. ಈ ಹಣ್ಣು ಅದರ “ಒಗರು” ಗುಣಕ್ಕಾಗಿಯೇ ಪ್ರಸಿದ್ಧ! ಆಹಾ – ಎಂತಾ ರುಚಿ!
  • ಮಡಕ್ಕೆ ಹಣ್ಣು:
    ಅಡಕ್ಕೆ ಹಣ್ಣಿನ ಹಾಂಗೇ ಇಪ್ಪ ಇನ್ನೊಂದು ಹಣ್ಣು – ಮಡಕ್ಕೆ ಹಣ್ಣು. ಸೀವುಸೀವಾಗಿ ಒಳ್ಳೆ ರುಚಿ ಅಕ್ಕು ಮಕ್ಕಳ ನಾಲಗ್ಗೆ.
    ಇದೇ ನಮುನೆ ಕಾಂಬಲೆ ಒಂದು ವಿಷದ ಹಣ್ಣು ಇದ್ದಾಡ –ಮದಲಿಂಗೆ ಈ ಹಣ್ಣು ಹೇಳಿ ಗ್ರೇಶಿ ಆಚದರ ತಿಂದು ಮಕ್ಕೊ ಕೆಲವು ಹೋಯಿದವಡ.
  • ಶಾಂತಿಬೊಂಡು:
    ಶಾಂತಿಕಾಯಿ ಗೊಂತಿಲ್ಲೆಯೋ?
    ಕೈಕ್ಕೆ ಚೋಲಿಯ ಒಳ ಇಪ್ಪ ಗಟ್ಟಿ ಕರಟವ ಗುದ್ದಿರೆ ಒಳ ನೆಲಕಡ್ಳೆಯ ಹಾಂಗಿರ್ತ ಬೊಂಡು ಸಿಕ್ಕುಗು.
    ಹೆಚ್ಚು ತಿಂದರೆ ಪಿತ್ಥ ಕೆದರುಗಡ, ಅಣಿಲೆಡಾಗುಟ್ರು ಬೈಗು. ಉಮ್ಮ! ನವಗೆ ಅಂದಾಜಿ ಆಯಿದಿಲ್ಲೆ.
  • ನೆಲ್ಲಿಕಾಯಿ:
    ಹುಳಿ!! ಗ್ರೇಶಿರೇ ಹುಳಿ ಎಳಗಿ ಬಾಯಿಲಿ ನೀರು ಬಕ್ಕು. ಆದರೂ ತಿನ್ನದ್ದೆ ಕಳಿಯ!
  • ಸರಳಿ ಹಣ್ಣು:
    ಚಿನ್ನದ ಬಣ್ಣದ ಈ ಹಣ್ಣಿಲಿಪ್ಪ ಹುಳಿಮಿಶ್ರಿತ ಸೀವು ಅದರ ರುಚಿಯ ಹೆಚ್ಚಿಸಿರ್ತು! ಮಳೆಬಂದ ಮರದಿನ ನೀರಹನಿ ನಿಂದಿಪ್ಪದು ಕಂಡ್ರೆ ಕೆಮರದ ಅಣ್ಣಂದ್ರಿಂಗೆ ಕೊದಿ ಎಳಗ್ಗು – ಪಟತೆಗವಲೆ!
  • ಕುಂಟಾಂಗಿಲ:
    ಬಟ್ಯ ಇದರ ಕುಂಟಲ ಹೇಳುಗು, ಕನ್ನಡಲ್ಲಿ ಕುಂಟುನೇರಳೆ ಹೇಳಿಯೂ ಹೇಳ್ತವಡ. ಗುಡ್ಡೆತಲೆಲಿ ಧಾರಾಳ ಮರಂಗೊ ಇದ್ದು. ಕರಿಕರಿ ಹಣ್ಣಿನ ತಿಂಬಲೆ ಹೆರಟ್ರೆ ಕೈ-ಬಾಯಿ ಪೂರ ನೀಲಿ!
    ಇದರ ತಿಂದೂ ತಿಂದಿದಿಲ್ಲೆ ಹೇದು ಲೊಟ್ಟೆ ಹೇಳೇಕಾರೆ ಅದು ಬೋಚಬಾವನೇ ಆಗಿರೆಕ್ಕಷ್ಟೆ.
  • ನೇರಳೆ ಹಣ್ಣು:
    ಕುಂಟಾಂಗಿಲ ಹಣ್ಣಿನ ದೊಡ್ಡಬ್ಬೆ ಮಗ°. ದೊಡ್ಡದೊಡ್ಡ ಹಣ್ಣುಗೊ. ಇದುದೇ ಹಾಂಗೇ, ತಿಂಬಲೆ ಸುರುಮಾಡ್ರೆ ತಲೆಒರೆಂಗೆ ನೇರಳೆ ಬಣ್ಣ ಹಿಡಿಯದ್ದೆ ಇರ. ಚಡ್ಡಿ ಕಿಸೆ, ಬೆಳಿಅಂಗಿ – ಎಲ್ಲವೂ ಉಜಾಲದ ಬಣ್ಣ!

    ರುಚಿ ಯೇವದು ಜಾಸ್ತಿ? (ಪಟ: ಇಂಟರ್ನೆಟ್ಟಿಂದ)
  • ಕರಗಳ ಕಾಯಿ:
    ಮದಲಿಂಗೆ ಬೈಲ ಗೆದ್ದೆಕರೆಗಳಲ್ಲಿ ಧಾರಾಳ ಇಕ್ಕಡ ಈ ಕರಗಳ ಕಾಯಿ.
    ಕಾಂಬಲೆ ತೊಂಡೆಕಾಯಿಯ ನಮುನೆ, ತಿಂಬಲೆ ಸೌತ್ತೆ ಮೆಡಿ ತಿಂದಾಂಗೆ ಆವುತ್ತು. ಕಂಡ್ರೆ ಎರಡು ಮೆಡಿ ಕೊಯಿದು ಕರುಕುರು ತಿಂದೊಂಡು ಮನಗೆತ್ತುಗು ಮಕ್ಕೊ!
  • ಚವಿ ಹಣ್ಣು:
    ಹುಳಿರುಚಿ ಆದರೂ, ರುಚಿಯ ಕೊದಿಬರುಸುವ ಇನ್ನೊಂದು ಹಣ್ಣು ಈ ಚವಿ.
    ಜಾಲಕರೆಲಿ, ತೋಟದೊಳ ಒಂದೊಂದಾರೂ ಇರದ್ದೆ ಇರ ಮನೆಗಳಲ್ಲಿ. ಉದಾಸನ ಅಪ್ಪಗ ಒಂದರಿ ತೋಟಕ್ಕೆ ಹೋಪಗ ಹಣ್ಣಾದ ಒಂದು ಗೊಂಚಲು ಮುರುದು ತಿಂಬಲೆ ಸುರುಮಾಡುಗು. ಬಿತ್ತುಬಿತ್ತಟೆ ಗುಳ ತಿಂಬಲೆ ಬಲು ರುಚಿ.
  • ಕಂಬುಳಿಹಣ್ಣು:
    ಮೈ ಇಡೀ ಕಜ್ಜುಕಜ್ಜು, ಹುಳಿಪ್ಪಟೆ ರುಚಿ. ಕನ್ನಡಲ್ಲಿ ಹಿಪ್ಪುನೇರಳೆ ಹೇಳಿಯೂ ಹೇಳ್ತವಡ.
    ಈಗೀಗ ರೇಷ್ಮೆ ಸಾಂಕಲೆ ಇದರದ್ದೇ ಎಲೆಗೊ ಪಷ್ಟಾವುತ್ತು ಹೇದು ಈ ಕಾಟು ಸೆಸಿಯ ಹೈಬ್ರೀಡು ಮಾಡಿ ಬೆಳೆಶುತ್ತವಡ.
  • ಬೀಂಪುಳಿ:
    ಹುಳಿ, ಹುಳಿಯನ್ನೇ ತಿಂತೋರಿಂಗೆ ಇಷ್ಟ ಅಪ್ಪ ಇನ್ನೊಂದು ಹಣ್ಣು.
    ನೀರುನೀರಟೆ ಈ ಹಣ್ಣಿನ ಕರುಕುರುನೆ ತಿಂಬ ಶಬ್ದವೂ ಎದುರಾಣವಂಗೆ ಕೇಳುಗು – ಆದರೂ ತಿನ್ನದ್ದೆ ಬಿಡವು ಮಕ್ಕೊ.
  • ಓಟೆಹುಳಿ:
    ಹುಣಸೆಹುಳಿ ಹೇದು ಕನ್ನಡಲ್ಲಿ ಹೆಸರು. ಎಲ್ಯಾರು ಮರ ಇದ್ದರೆ ಕಲ್ಲಿಡ್ಕಿಯೇ ಅದರ ಕೊಂಬುಗಳ ಉದುರ್ಸುಗು ಮಕ್ಕೊ.
    ಒಂದೊಂದರ ಚೀಪಿಂಡು ಹೋದರೆ ಶಾಲೆಂದ ಮನೆ ಒರೆಂಗೆ ಸಾಕಕ್ಕು. ಕದ್ರಿ ವಾಲಗ ಉರುಗುವಗ ಎದುರಾಣೋನು ಈ ಓಟೆಹುಳಿ ಚೀಪಲೆ ಸುರುಮಾಡಿರೆ ವಾಲಗ ಮಡುಸಿ ಏಳೆಕ್ಕಟ್ಟೆ ಅದು – ಆ ನಮುನೆ ಹುಳಿಲಿ, ಬಾಯಿ ನೀರು ಬಂದುಬಿಡ್ತು!!
  • ಮಾವಿನ ಮೆಡಿ:
    ಮಾವಿನ ಹೂಗುಹೋಪ ಸಮೆಯಲ್ಲಿ ಮತ್ತೆ ಕೇಳುದೇ ಬೇಡ, ಯೇವ ಮರದ ಯೇವ ಮೆಡಿ ಆದರೂ ಆವುತ್ತು.
    ಬಾಡಟೆ, ಹಿಸ್ಕಟೆ ಮೆಡಿ ಸಿಕ್ಕಿರೂ ಅಕ್ಕು. ಆರ ಮರಲ್ಲಿದ್ದರೂ ಅಕ್ಕು – ಕಲ್ಲಿಡ್ಕಿ ಕೊಯಿದು ತಿಂದೊಂಡು ಹೋಕು.
  • ಪೇರಳೆಹಣ್ಣು:
    ಸೀಬೆಕಾಯಿ ಹೇಳ್ತ ಕನ್ನಡ ಹೆಸರಿನ ಈ ಹಣ್ಣು, ಬಾವಲಿ ಬಿಟ್ರೆ ಮಾಂತ್ರ ನವಗೆ ಸಿಕ್ಕುದು. ಶಾಲೆದಾರಿ ಕರೇಲಿ ಈ ಸೆಸಿ ಇದ್ದರೆ ಬಾವಲಿಗೂ ಸಿಕ್ಕ!! ಹಣ್ಣು ಬಾವಲಿ ಮಡುಗದ್ದ ಕಾರಣ ಹೆಚ್ಚಾಗಿ ಕಾಯಿಯೇ ತಿಂದು ಮುಗಿತ್ತು. 😉

(ಯೇವದು ಬಾಕಿ ಆತಪ್ಪಾ, ನೆಂಪಾವುತ್ತಿಲ್ಲೆ!!)

~

ಬೈಲಿನ ಮಕ್ಕೊ ಸಣ್ಣ ಇಪ್ಪಗ ಈ ನಮುನೆ ಎಷ್ಟೆಲ್ಲ ತಿಂದುಗೊಂಡಿತ್ತವು.
ಈಗಾಣೋರಿಂಗೆ ಹೀಂಗಿರ್ತದರ ರುಚಿಯೇ ಕಂಡು ಗೊಂತಿರದೋ ಹೇದು ಆವುತ್ತು ಒಪ್ಪಣ್ಣಂಗೆ.
ಈಗ ಇದೇವದೂ ರುಚಿ ಇಲ್ಲದ್ದೆ, ಪೇಟೇಹಣ್ಣುಗೊ ಮಾಂತ್ರ ತಿಂತದು ಹೇಳಿ ಆಗಿಬಿಟ್ಟತ್ತೋ!
ಇದ್ದರೂ ಪೇಟೆಯ ಏಪುಳು, ಮುಸುಂಬಿ, ಚಿತ್ತುಪುಳಿ, ಹೀಂಗಿರ್ಸರನ್ನೇ ತಂದು ಕೊರದಾಯೆಕ್ಕು ತಿನ್ನೇಕಾರೆ.
ಒಂದೊಂದರಿ ಈ ಹಳೆಹಣ್ಣುಗಳ ಗ್ರೇಶಿ ಚೆ –ಅದಕ್ಕೆ ಗಿರಾಕಿಯೇ ಇಲ್ಲೇನ್ನೇಪ್ಪಾ – ಹೇದು ಬೇಜಾರಪ್ಪಲಿದ್ದು,.

~

ಅನ್ನಪ್ರಾಶನದ ದಿನವೇ ಈ ತಿಂತ ಬಗೆ ತಲಗೆ ಹೋದ್ಸಕ್ಕೆ ಒಪ್ಪಣ್ಣಂಗೆ ಆಶ್ಚರ್ಯ ಆತು!
ಮಾಷ್ಟ್ರುಮಾವನ ಮನಗೆ ಎತ್ತಿದ ಮತ್ತೆ ಈ ಶುದ್ದಿ ಎಂತಕೆ ಅಲ್ಲದೋ!

~

ಒಂದೊಪ್ಪ: ಪೈಸೆ ಕೊಟ್ಟು ತಪ್ಪದಾದರೆ ಯೇಪುಳೂ ರುಚಿಯೇ, ಕೇಪುಳೂ ರುಚಿಯೇ! ಅಲ್ಲದೋ ಭಾವಯ್ಯ?!

78 thoughts on “ಏಪುಲು ಹಣ್ಣೇ ತಿಂತವಕ್ಕೆ ‘ಕೇಪುಳು ಹಣ್ಣು’ ಮೆಚ್ಚುಗೋ?

  1. ಶುದ್ದಿ ತುಂಬ ಲಾಯ್ಕಾಯ್ದು ಒಪ್ಪಣ್ಣ. ಸಣ್ಣದಿಪ್ಪಗ ಶಾಲೆಗೆ ಹೋಪಗ, ಹೀಂಗಿರ್ತ ಹಣ್ಣುಗಳ ತಿಂಬಲೆ ಬೇಕಾಗಿ ಎಲ್ಲೆಲ್ಲೊ ಗುಡ್ಡೆ ಸುತ್ತಿಗೊಂಡು ಹೋಗ್ಯೊಂಡಿದ್ದದೆಲ್ಲ ನೆಂಪಾತು. ಹುಳಿ ಅಪ್ಪ ಸಮಯಲ್ಲಿ ಹುಳಿಮರ ಸಿಕ್ಕುವ ಒಳದಾರಿಲಾಗಿ ಹೋಗಿ ಹುಳಿ ಹೆರ್ಕಿಗೊಂಡಿತಿದೆಯ. ಕಾಯಿ ಹುಳಿಯೂ ರುಚಿಯೇ, ಹಣ್ಣು ಹುಳಿಯೂ ರುಚಿಯೇ. ಅದರ ಗ್ರೇಶುವಗಳೇ ಬಾಯಿಲಿ ನೀರು ಬತ್ತೀಗ. ಮುಂದೆ ಒಂದು ದಿನ ಮಕ್ಕೊಗೆಲ್ಲ ಹುಳಿ ಅಂಗಡಿಲಿ ಸಿಕ್ಕುದು ಹೇಳಿ ಮಾಂತ್ರ ಗೊಂತಿಕ್ಕಷ್ಟೆಯೋ ಏನೊ.
    ನವಗೆಲ್ಲ ಈ ಹಣ್ಣುಗಳ ಶುದ್ದಿ ಕೇಳುವಾಗ ಬಾಲ್ಯದ ನೆಂಪಾವುತ್ತು. ದಾರಿಲಿಪ್ಪ ಕಾರೆಕಾಯಿ, ಚೂರಿಮುಳ್ಳು, ಅಬ್ಳುಕ, ಕುಂಟಾಗಿಲ ಇತ್ಯಾದಿ ಎಲ್ಲಾ ಸೆಸಿಗೊಕ್ಕೂ ನಮ್ಮ ಗುರ್ತ ಇದ್ದೇ ಇಕ್ಕು ಆವ್ಗ. ಈಗಾಣ ಮಕ್ಕೊಗೆ ಅದರ ಹೆಸರು ಕೇಳಿಯೂ ಗೊಂತಿಲ್ಲೆ ಹೆಚ್ಚಿನವಕ್ಕೆ.
    ಮತ್ತೆ ಈಗ ಅಪ್ಪಾಮ್ಮ ಹಾಂಗಿಪ್ಪ ದಾರಿಕರೆ ಹಣ್ಣುಗಳ ತಿಂಬದು ಬೇಡ ಹೇಳುದಕ್ಕೆ ಇನ್ನೊಂದು ಕಾರಣವೂ ಇದ್ದು. ಈಗ ಬರೇ ಕಾಲುದಾರಿ ಹೇಳಿ ಇಪ್ಪದು ಕಮ್ಮಿಯೇ ಅಲ್ದ. ಎಲ್ಲವೂ ವಾಹನ ಸಂಚಾರ ಇಪ್ಪಂಥ ದಾರಿಗಳೇ. ದಾರಿ ಇಪ್ಪ ಕಾರಣ ವಾಹನಂಗಳೂ ಧಾರಾಳ. ಒಂದು ವಾಹನ ಬಂದು ಭರಾನೆ ಧೂಳು ಹಾರ್ಸಿಕ್ಕಿ ಹೋದರೆ ಕೇಪುಳು ಕಾಯಿಯೂ ಕೆಂಪಾವುತ್ತು! ಮೊದಲು ಹಾಂಗೆ ವಾಹನ ಸಂಚಾರ ಎಲ್ಲ ಕಮ್ಮಿ ಇದಾ. ಇದು ಎನ್ನದೊಂದು ಸಣ್ಣ ಊಹೆ ಅಷ್ಟೆ . ಮನೆಲಿ ಕಸವು ಉಡುಗುವಾಗ ಬಪ್ಪ ಧೂಳಿಂಗೇ ಆ..ಕ್ಷೀ ಮಾಡುವ ಮಕ್ಕೊಗೆ ಆ ದಾರಿಕರೆ ಧೂಳು ಹೇಂಗೂ ರೋಗ ತಕ್ಕು!

  2. ಎಂಗೊ ಶಾಲೆಗೆ ಹೋಪಗ ಬೀಜದ ಹಣ್ಣು, ಕುಂಟಾಲ, ರೆಂಜೆ, ಚೂರಿ ಮುಳ್ಳು ಮತ್ತೆ ಚೀಮುಳ್ಳು (ಇದೆರಡು ಬೇರೆ ಬೇರೆ), ಒಂದೊಂದಾರಿ ಜಾರಿಗೆ ಮತ್ತೆ ಅಬ್ಳುಂಕ… ಇವಿಷ್ಟು ಹೊಟ್ಟೆಗೆ ಇಳುಕ್ಕೊಂಡಿತ್ತು. ಒಳುದ ಹಣ್ಣುಗೊ ಎಂಗಳ ರೂಟಿಲಿ ಇತ್ತಿದವಿಲ್ಲೆ ಹೇಳಿ ಕಾಣುತ್ತು 🙂

    1. ಬೀಜದ ಹಣ್ಣು ತಿಂದು ಅಂಗಿ ಕಲೆ ಆದ್ಸು ಈಗಳೂ ಹೋಯಿದಿಲ್ಲೇಡ, ಅಪ್ಪೋ?
      ಮನ್ನೆ ಚಿಕ್ಕಮ್ಮ ಪರಂಚಿಗೊಂಡಿತ್ತವು! 😉

      { ಬೇರೆ ಎಂತಾರು ಹೆಸರು ಕೊಟ್ಟಿದೆಯೋ?? }
      ಹ ಹ, ಇಲ್ಲೆಪ್ಪ. ಅದು ಬಿಟ್ಟು ಹೋದ್ಸರ ಬೈಲಿನೋರು ಒಪ್ಪಲ್ಲಿ ನೆಂಪುಮಾಡಿಕೊಟ್ಟಿದವಿದಾ.

      { ಎಂಗಳ ರೂಟಿಲಿ ಇತ್ತಿದವಿಲ್ಲೆ }
      ಅಪ್ಪು, ಹೀಂಗಿರ್ಸ ಹಣ್ಣಿಂಗೆ ಬೇಕಾಗಿ ನಿಂಗೊ ಬೇಲಿ ಹಾರೆಯಿ – ಹೇದು ಒಪ್ಪಣ್ಣಂಗೂ ಅಂದಾಜಿದ್ದು! 😉

  3. ಜಾರಿಗೆ ಹಣ್ಣು, ರೆಂಜೆ ಹಣ್ಣು ಬಿಟ್ಟು ಹೋಯಿದಾ ಒಪ್ಪಣ್ಣ? ಅಲ್ಲ ಅದಕ್ಕೆ ಬೇರೆ ಎಂತಾರು ಹೆಸರು ಕೊಟ್ಟಿದೆಯೋ?? 🙂

  4. {ಏಪುಲು ಹಣ್ಣುದೇ ಕೇಪುಲು ಹಣ್ಣುದೇ ಒಟ್ಟಿಂಗೆ ತೋರಿಸಿ “ನಿನಗೆ ಯಾವುದು ಬೇಕು” ಹೇಳಿ ಕೇಳಿದರೆ ಕೇಪುಲು ಹಣ್ಣಿಂಗೇ ಮೊದಲು ಕೈ ಹೋಕ್ಕಷ್ಟೆ ಅಲ್ಲದಾ} Depends. ಮಾರಾಟಕ್ಕಾರೆ ಕೇಪುಳು, ಧರ್ಮಕ್ಕಾರೆ ಏಪುಲು ಮೇಲೆ ಕೈ ಹೋಕು 🙂

  5. ಒಪ್ಪಣ್ಣೋ….
    ಏಪುಲು ಹಣ್ಣುದೇ ಕೇಪುಲು ಹಣ್ಣುದೇ ಒಟ್ಟಿಂಗೆ ತೋರಿಸಿ “ನಿನಗೆ ಯಾವುದು ಬೇಕು” ಹೇಳಿ ಕೇಳಿದರೆ ಕೇಪುಲು ಹಣ್ಣಿಂಗೇ ಮೊದಲು ಕೈ ಹೋಕ್ಕಷ್ಟೆ ಅಲ್ಲದಾ 🙂 ಲೇಖನ ತುಂಬಾ ಒಪ್ಪ ಆಯಿದು.

  6. ಬೊಳುಂಬಿಂದ ನೀರ್ಚಾಲಿಂಗೆ ಶಾಲೆಗೆ ಹೋಪಗ ಎಂಗೊ ಮಾಡಿದ ಕಾರ್ಬಾರೆಲ್ಲ ಒಂದರಿ ನೆಂಪಾತು. ಪೆರ್ವದ ಅಳಿಯ ಹೇಳಿದ ಹಾಂಗೆ, ಕಂಬುಳಿ ಹಣ್ಣು ಬಿಟ್ಟು ಬಾಕಿ ಎಲ್ಲ ಹಣ್ಣುಗಳ ಗುರ್ತ ಇದ್ದು. ಕಾಡು ಹಣ್ಣುಗಳ ಬಗೆಲಿ ಸಮಗ್ರ ಮಾಹಿತಿ ಕೊಟ್ಟತ್ತು ಲೇಖನ. ಅನುಪಮ ಹೇಳಿದ ಪೂಚೆ ಹಣ್ಣುದೆ ತಿಂಬಲೆ ಭಾರಿ ರುಚಿ. ಅಜ್ಜಿ ಪುಟ್ಳದ ಹಳದಿ ಹಣ್ಣಿನ ನಾಲಗೆಲಿ ಹಲ್ಲಿನ ಎಡೆಂಗೆ ಮಡಗಿ ಅರಚ್ಚುವಗ ಆವ್ತ ಅನುಭವವೇ ವರ್ಣನಾತೀತ. ಅಜ್ಜಿ ಪುಟ್ಳ ಕಾಯಿಯ ಬೆರಳಿಲ್ಲಿ ಒತ್ತಿ ಒತ್ತಿ ಅದರ ಒಳಾಣ ನೀರಿನ ಹೆರ ತೆಗದು, ಸೀಡ್ ಲೆಸ್ ದ್ರಾಕ್ಷೆ ಹಾಂಗೆ ಮಾಡುವ ಪ್ರಕ್ರಿಯೆ ಎಲ್ಲೋರಿಂಗು ಗೊಂತಿಕ್ಕು. ಗೇರು ಬೀಜದ ಹಣ್ಣಿನ ಕಲೆ ಅಂಗಿಲಿ ಸಾಮಾನ್ಯ. ಮತ್ತೆ ಹುಣಸೆ ಹುಳಿ ಬೀಜ, ಹೊರುದ್ದದು ಏವತ್ತುದೆ ಕಂಪಾಸು ಪೆಟ್ಟಿಗೆ ಒಳ ಇದ್ದ್ಕು. ಕೂಸುಗವಕ್ಕೆ ಇದು ಹೇಳಿರೆ ಭಾರೀ ಪ್ರೀತಿ.
    ಶಾಂತಿಕಾಯಿಯ ಒಳಾಣ ಬೊಂಡು, ಈಗಾಣ ಮಕ್ಕೊಗೆ ಗೊಂತಿಪ್ಪ ಬಾದಾಮಿ,ಪಿಸ್ತಕ್ಕಿಂತಲೂ ರುಚಿ. ಕೆಲವೊಂದರಿ ಶಾಂತಿಕಾಯಿ, ಒಣಗಿ ಹೊಡಿಯಾದ ಸಗಣಲ್ಲಿಯೂ ಕಂಡುಬಕ್ಕು, ಅದನ್ನುದೆ ಮಕ್ಕೊ ಬಿಡವು !!

    ಹಿಂದಾಣ ದಿನಂಗಳ ಮತ್ತೆ ನೆಂಪು ಮಾಡಿದೆ ಒಪ್ಪಣ್ಣ. ಒಪ್ಪಣ್ಣಾ, ಒಪ್ಪ ಲೇಖನಕ್ಕೆ ಹೀಂಗೊಂದು ಪ್ರೀತಿಯ ಒಪ್ಪ.

    1. ಬೊಳುಂಬುಮಾವಾ,
      { ನಾಲಗೆಲಿ ಹಲ್ಲಿನ ಎಡೆಂಗೆ ಮಡಗಿ ಅರಚ್ಚುವಗ ಆವ್ತ ಅನುಭವ}
      ಆಹಾ,ಎಷ್ಟು ಚೆಂದ ಒಪ್ಪ ಬರದ್ದಿ ನಿಂಗೊ! ಪಷ್ಟಾಯಿದು!! 🙂
      ಗೊಂತಿಲ್ಲದ್ದೋನಿಂಗೆ – ಈಗ ಹೋಗಿ ತಿಂಬೊ – ಹೇದು ಅನುಸುಗು ಒಂದರಿ! 😉

      ಶಾಂತಿಕಾಯಿಯ ರುಚಿ ಹಿಡುದೋರು – ಬಾಗ್ಯಕ್ಕ ಹೇಳಿದಾಂಗೆ- ಕೈ ಅರಚ್ಚುವನ್ನಾರ ಬಿಡವು! 😉

  7. ಒಪ್ಪಣ್ಣಾ..ಜೀವನದ ಸುಮಾರು ವರುಷ ಹಿ೦ದ೦ಗೆ ಹೋತೊ೦ದರಿ.
    ಆದರೆ,ಈಗಳೂ ಇದೆಲ್ಲಾ ಸಿಕ್ಕುತ್ತೋ ಹೇಳಿ ಗುಡ್ಡೆಲಿ ತಿರುಗುವ ಅಭ್ಯಾಸ ಬಿಟ್ಟಿದಿಲ್ಲೆ ! ಈಗ ಬೀಜದ ಹಣ್ಣು ಅಪ್ಪ ಸಮಯ ಇದಾ.ರಜಾ ಕಲ್ಲುಪ್ಪು ಒಟ್ಟಿ೦ಗೆ ಕಾಗದಲ್ಲಿ ಕಟ್ಟಿಗೊ೦ಡೇ ಹೆರಡೆಕ್ಕು ಮಿನಿಯಾ.

    1. ಅದಾ, ಬೀಜದಣ್ಣು ತುಂಡುಸಿ ಕಲ್ಲುಪ್ಪು ಸೇರ್ಸಿ ತಿಂತದು ಒಳ್ಳೆ ಚೇರ್ಚೆ.
      ಆದರೆ ಹಾಂಗೇ ತಿಂಬದೂ ಇನ್ನೊಂದು ಕುಶಿ.
      ಅಕೇರಿಗೆ ಹಲ್ಲೆಡೆಲಿ ಹಣ್ಣಿನ ನಾರು ನಿಂದು – ಎರಡು ನಿಮಿಶಲ್ಲಿತಿಂದ ಹಣ್ಣು ಎರಡು ಗಂಟೆ ಉಪದ್ರ ಕೊಡ್ತು, ಅಪ್ಪೋ!

      ಪೆರ್ಲಲ್ಲಿ ಪಿಕ್ಲಾಟ ಮಾಡುವಗ ಇದುದೇ ಇದ್ದೋ ಹೇಂಗೆ? 😉

  8. ಬರದ್ದು ಬಾರೀ ಲಾಯಿಕ ಆಯಿದು ಒಪ್ಪಣ್ಣೋ…ಈಗಾಣ ಮಕ್ಕೊಗೆ ಮೊದಲಾಣಸ್ತ್ತು ಸ್ವಾತಂತ್ರ ಇಲ್ಲೆ.ಮನೆಂದ ಅಪ್ಪನ ಒಟ್ಟಿಂಗೋ ,ರಿಕ್ಶ್ಲಲ್ಲಿಯೋ ಸೀದ ಶಾಲಗೆ ಹೋಪಲಾತು ..ಎಡಕ್ಕಿಲಿ ಮರಂಗಳನ್ನೂ ಹಣ್ಣುಗಳನ್ನೂ ನೋಡುವ ಭಾಗ್ಯವೇ ಇಲ್ಲೆ..ಹೇಳಿದ ಹಾಂಗೆ ಒಂದು ಹಣ್ಣು ಬಾಕಿ ಆಯಿದು ರೆಂಜೆ ಹಣ್ಣು ಇದು ಬಾರೀ ರುಚಿಯ ಹಣ್ಣು …ಹೂಗು ಬಿಟ್ಟಪ್ಪಗ ಬಿದ್ದ ಹೂಗಿನ ಮಾಲೆ ಮಾಡಿ ಸೂಡುಗು ಹಣ್ಣಪ್ಪಗ ಮಕ್ಕಳ ಕಾಲ..ಹಣ್ಣು ತಿಂದು ಬಿತ್ತಿನ ಮನಗೆ ತಪ್ಪಲೆ ಹೇಳುಗು ಬಿತ್ತಿನ ಗುದ್ದಿ ೨ ಕಲ್ಲು ಉಪ್ಪು ಸೇರ್ಸಿ ಬೇನೆ ಹಲ್ಲಿಂಗೆ ರಜ್ಜ ಹೊತ್ತು ಮಡಗಿದರೆ ಯಾವ ಹಲ್ಲು ಬೇನೆ ಇತ್ತದು ಹೇಳಿ ಗೊಂತಾಗ ….ಒಂದು ಒಪ್ಪ..

    1. ಮಾವ ಅನುಭವಂದ ಹೇಳುವ ರೆಂಜೆ ಬಿತ್ತಿನ ಹಾಂಗಿಪ್ಪ ಮದ್ದುಗೋ ಎಂಗೊಗೆಲ್ಲ ತುಂಬಾ ಖುಷಿ ಅಪ್ಪದು…

      1. ಮಾವನ ಒಪ್ಪಕ್ಕೆ ಒಪ್ಪಂಗೊ. ಪಷ್ಟಾಯಿದು ನಿಂಗೊ ಬರದ್ಸು.
        ಮದಲಾದರೆ ಐದಾರು ಮಕ್ಕೊ ಒಟ್ಟಿಂಗೆ ಹೋಕು, ಒಂದೇ ಶಾಲೆಯೋರು.
        ಈಗ ಒಂದು ಶಾಲಗೆ ಹೋವುತ್ತೋನು ಒಬ್ಬನೇ ಅಲ್ಲದೋ.
        ಎರಡ್ಣೇ ಮಗ ಇಲ್ಲೆ, ಹತ್ತರಾಣೋರ ಒಟ್ಟಿಂಗೆ ಸೇರ್ಲಾಗ.

        ಅದಾ, ರೆಂಜೆಬಿತ್ತಿನ ಕತೆ ನೆಂಪುಮಾಡಿದ್ಸು ಒಳ್ಳೆದಾತು. ಬೇರೆ ಎಂತೆಲ್ಲ ಇದ್ದು? ಮದ್ದುಗಳ ಪಟ್ಟಿಗೆ ಸೇರುಸಿ ಹೇಮಾರ್ಸಿ ಮಡಗುವೊ, ಅಲ್ಲದೊ? 🙂

        1. ಒಪ್ಪಣ್ಣಾ… ಹೇಮರ್ಸಿ ಮಡುಗುಲೆ ಅಲ್ಲ ಆತಾ… ಮೇಲೆ ಹೇಳಿದ ಹಾಂಗೆ ‘ಇಂದ್ರಲೋಕ ಧರೆಗಿಳಿಯೇಕ್ಕಾರೆ’ ಮಾವನ ಹಾಂಗಿದ್ದ ಅನುಭವಸ್ಥರು ಸಹಾಯ ಮಾಡೆಕ್ಕಷ್ಟೇ… ಆ ಸಮಯಲ್ಲಿ ಹಲ್ಲು ಬೇನೆ ಬಂದರೆ ಮಾವನ ಹಾಂಗಿದ್ದ ಅನುಭವಸ್ಥರೆ ನಮಗೆಲ್ಲ ಡಾಗುಟ್ರು…

  9. ತುಂಬಾ ಒಲ್ಲೆ ಲೇಖನ.

    ಒಂದರಿ ಬಾಲ್ಯ ನೆಂಪಾತು. ಊರಿಲಿ ಬಂದರೆ ಜಾಲಿಓಗೆ ಇಳಿವಲೂ ಜೆಗಿಲಿಂದಲೆ ಮೆಟ್ಟು ಹಾಕುವ ಇವರ ನೊಡಿರೆ ಕನಿಕರ ಬತ್ತು. ಯಾವುದೊ ಒಂದು ತಮ್ಮದಲ್ಲದ್ದ ಜಗತ್ತಿನ ಜಂತುಳ ಹಾಂಗೆ ಕಾಣ್ತು. ಎಲ್ಲಿಗೆ ಹೊದರೂ ನಮ್ಮತನವ ಉಳಿಸಿ ಬೆಳೆಸೆಕ್ಕು.

    1. ಅಪುರೂಪದ ನಂದನಣ್ಣಂಗೆ ಒಪ್ಪಂಗೊ.
      ಎಂತ ಅಣ್ಣ ಕಾಂಬಲಿಲ್ಲೆ, ಸುಮಾರು ಸಮೆಯ ಆತು?!

      ನಿಂಗೊ ಹೇಳಿದ ವಿಶಯ ಅಪ್ಪು. ನಮ್ಮ ಬೈಲಿಂಗೆ ದಿನಿಗೆಳಿ ನಮ್ಮವರ ಹಾಂಗೇ ಮಾಡುವೊ. ಅಲ್ಲದೋ?

  10. ಕೆಪುಳು ಹಣ್ಣು ತಿಂಬಲಾಗ. ಕುಂಡೆಲಿ ಕುರು ಅಕ್ಕು. ಹಾಂಗಾಗಿ ಆನು ಕೊಟ್ರೂ ತಿನ್ನೇ.

    1. ಅಕ್ಕು ನಿಂಗೊಗೆ ದಾಸನ ರೊಟ್ಟಿ ಮಾಡಿ ಕೊಡುವೋ

  11. ಇಲ್ಲಿ ಹೇಳಿದ ಹಲವಾರು ಹಣ್ಣುಗಳ ಹೆಸರು ಕೇಳಿ ಮಾತ್ರ ಗೊಂತು. ಶಾಲೆಗೆ ಹೋಪ ದಾರಿಲಿ ಕಾಡುಗೊ ಇಲ್ಲದ್ದ ಕಾರಣ ಕಂಡು, ತಿಂದು ಅನುಭವ ಅಯಿದಿಲ್ಲೆ.
    ಅಂಜೂರ ಹಣ್ಣು ತಿಂದ ನೆಂಪು ಬತ್ತು. ಅದರ ಒಣಗಿಸಿ dry fruit ಚೀಟಿ ಅಂಟಿಸಿ, ಒಳ್ಳೆ ಕ್ರಯಕ್ಕೆ ಮಾರ್ತವು.
    ಕಾಡು ಹಣ್ಣುಗಳ ಬಗ್ಗೆ ಒಳ್ಳೆ ಮಾಹಿತಿ ಕೊಟ್ಟ ಲೇಖನ.
    ಎಲ್ಲದರದ್ದೂ ಪಟ ನೇಲ್ಸಿದ್ದರೆ (ಸಿಕ್ಕುತ್ತರೆ) ಆವ್ತಿತ್ತು.

    1. ಅಪ್ಪಚ್ಚಿ,
      { ಅದರ ಒಣಗಿಸಿ dry fruit ಚೀಟಿ ಅಂಟಿಸಿ } ಅದು ಕ್ಲೀನು ಇರ್ತು. ಅದರ್ಲಿ ಕೊಲೆಷ್ಟ್ರಾಲ್ ಇರ್ತಿಲ್ಲೆ, ಅದರ್ಲಿ ಕ್ಯಾಲೊರಿ ಇರ್ತು – ಹಾಂಗೆ ಹೀಂಗೆ ಹೇದು ಬರಕ್ಕೊಂಡಿರ್ತಡ ಆ ಚೀಟಿಲಿ. ಅಪ್ಪೋ?
      ಅಂಬಗ ನಮ್ಮ ಕೇಪುಳೆಗಳಲ್ಲಿಯೂ ಹಾಂಗೇ ಅಲ್ಲದೋ?
      ಆರಾರೊಬ್ಬ ಪೆಕೆಟು ಮಾಡುವನ್ನಾರ ಗೊಂತಾಗ. ಮತ್ತೆ ಇವಕ್ಕೆ ಒಳಿಯ!

      ಪಟಂಗೊ ಇರೆಕ್ಕು ಹೇದು ಒಪ್ಪಣ್ಣಂಗೂ ಇದ್ದು ಅಪ್ಪಚ್ಚಿ, ವೆಂಕಟೇಶಣ್ಣ ಕಳುಸುಗೋ.
      ಉಮ್ಮ!

  12. ನವಗಿದೆಲ್ಲ ಮರದ್ದಿಲ್ಲೆ ಒಪ್ಪಣ್ಣೊ,ಸಣ್ಣಾಗಿಪ್ಪಾಗ ಆನುದೇ ಎನ್ನ ಅಣ್ಣನೂ ಸೇರಿಯೊಂಡು ಸಣ್ಣ ಒಂದು ಸರಳಿ ಮರವನ್ನೇ ಕಡುದು ಹಣ್ಣು ತಿಂದದು ನೆಂಪಾತು.ಸಪೂರದ ಉದ್ದ ಮರ,ಹತ್ತಲೆ ಗಟ್ಟಿ ಸಾಲ.ಮತ್ತೆಂತ ಮಾಡ್ಸು?ಗುಟ್ಟಿಲ್ಲಿ ಕತ್ತಿ ಕೊಂಡೋಗಿ ಕಡ್ದೇ ಮರವ.ಎನ್ನ ಅಪ್ಪ° ಮಕ್ಕೊಗೆ ಬಡಿವ ಕ್ರಮ ಇಲ್ಲದ್ದ ಕಾರಣ ಬೆನ್ನು ಇನ್ನೂ ಗಟ್ಟಿ ಇದ್ದದ.
    ಅದಿರಲಿ ಒಪ್ಪಣ್ಣೋ,ಯೇವದೇ ಪೇಟೆಲಿಪ್ಪ ಹೆಮ್ಮಕ್ಕಳ ಬಗ್ಗೆ ಬರವಗ ಆ ಸಿನಿಕಲ್ (ಕೋಂಗಿ ಕಟ್ಟುದು) ಬಣ್ಣ ಎಂತಕೆ?
    ಹವಿಕರಲ್ಲದ್ದವು ಮನುಷ್ಯರೇ ಅಲ್ಲದೋ ಹೇಳಿ ಸಂಶಯ ಬತ್ತು ಎನಗೆ.
    ಕಾರಣಾಂತರಂದ ಬೇರೆ ಜಾತಿಯೋರ ಮದುವೆ ಆದವು ಎನ್ನ ಪೈಕಿಲಿ ತುಂಬ ಮಕ್ಕೊ ಇದ್ದವು.ಆರುದೇ ಹೞಿಗೆ ಬಂದರೆ ನೀ ಬರದ ಹಾಂಗೆ ವರ್ತನೆ ಆರದ್ದೂ ಇಲ್ಲೆ.
    ಹಾಂಗೆ ನೋಡಿರೆ ನಮ್ಮ ಜಾತಿಯವರಲ್ಲೇ ಇಂತಾದ್ದೆಲ್ಲ ಇದ್ದಲ್ಲದೊ?
    ಅದು ಬಿಟ್ರೆ ಬರದ್ದದು ಭಾರೀ ಲಾಯಕಾಯಿದು.ಬೆಂಗ್ಳೂರಿಲ್ಲಿಪ್ಪವು ಊರಿಂಗೆ ಬಂದರೆ(ಬೊಂಬಾಯಿಲಿಪ್ಪವೂ)ಇದೆಲ್ಲ ಕಾಟಂಕೋಟಿ ತಿಂಬದು ಊರಿನ ಒಪ್ಪಣ್ಣಂಗೆ ಗೊಂತಿಲ್ಲದ್ದಲ್ಲ,ಅಲ್ದೋ?

    1. {ಎನ್ನ ಅಪ್ಪ° ಮಕ್ಕೊಗೆ ಬಡಿವ ಕ್ರಮ ಇಲ್ಲದ್ದ ಕಾರಣ ಬೆನ್ನು ಇನ್ನೂ ಗಟ್ಟಿ ಇದ್ದದ.}
      ಹ್ಹ ಹ್ಹಾ!! ಇದು ಪಷ್ಟಾಯಿದು!!

      { ಹವಿಕರಲ್ಲದ್ದವು ಮನುಷ್ಯರೇ ಅಲ್ಲದೋ ಹೇಳಿ ಸಂಶಯ ಬತ್ತು ಎನಗೆ.}
      ಅಲ್ಲಪ್ಪಾ ಅಲ್ಲ! ಹವಿಕರಲ್ಲದ್ದೋರ ಬಗ್ಗೆ ಧಾರಾಳ ಬರದ್ದು ಮಾವ.
      ನಮ್ಮ ಈ ಬೈಲು ಜಾತಿ ಆಧಾರಿತ ಅಲ್ಲ, ಭಾಶೆ ಆಧಾರಿತ.
      ನಿಂಗೊ ಒಂದರಿ ನೋಡಿಕ್ಕಿ ಕೆಲವು ಶುದ್ದಿಗಳ. ನೆಂಪಕ್ಕು.
      ಬಟ್ಯ° ನವಗೆಲ್ಲರಿಂಗೂ ಹತ್ತರೆಯೇ. ಅದಾ, ಅಂದೊಂದರಿ – ನೂಡುಲ್ಸು ಬಿಟ್ಟು ಊರಿಂಗೆ ಬಂದ ಶುದ್ದಿ!

      ನಿಜಜೀವನಲ್ಲಿ ಕೋಂಗಿಕಟ್ಟುವವರ ಬಗ್ಗೆ ಹೇಳುವಗ ಒಪ್ಪಣ್ಣಂದೇ ಹಾಂಗೆ ಬಿಂಗಿ ಮಾಡ್ತನೋ ಏನೋ!
      ಕೋಂಗಿ ಜಾಸ್ತಿ ಆದರೆ ನಿಂಗೊ ಇಂಜೆಕ್ಷನು ಕೊಟ್ಟು ನಿಲ್ಲುಸಿ. 😉

      ಆಯಾ ಊರಿಂಗೆ, ಆಯಾ ಜೀವನಪದ್ಧತಿಗೆ ಅನುಸರ್ಸಿ ಆಹಾರ ಕ್ರಮಂಗೊ ವಿತ್ಯಾಸ ಆವುತ್ತು ಹೇಳ್ತದು ಸಾರ್ವಕಾಲಿಕ ಸತ್ಯ. ಆದರೆ ಒಂದರಿಂದ ಇನ್ನೊಂದಕ್ಕೆ ಬದಲಪ್ಪಗ ಹಳತ್ತರ ನೆಂಪು ಮಡಗುತ್ಸು ಬೈಲಿನೋರ ಅಭಿರುಚಿ. ಅಲ್ಲದೋ?

      ಒಪ್ಪ ಒಪ್ಪಕ್ಕೆ ಒಪ್ಪಂಗೊ..

      1. ಆದರೂ ಹೆಮ್ಮಕ್ಕಳ ಬಗ್ಗೆ ಬರವಾಗ ಒಪ್ಪಣ್ಣ ಕೋಂಗಿ ಕಟ್ಟುದು ರಜ ಜಾಸ್ತಿಯೇಃ)ಶುಭತ್ತೆಯ ಬಗ್ಗೆ ಬರದ ಹಾಂಗೆ…….

  13. ಕೆಲವು ಹಣ್ಣುಗಳ ಹೆಸರೂ ಶುರು ಕೇಳುದು.
    ಆದರೆ ಕೇಪಳದ ಹಣ್ಣು ನೋಡಿಯೂ ಗೊಂತಿದ್ದು,ರುಚಿಯೂ ಗೊಂತಿದ್ದು. ಕುಂಟಾಲ, ನೇರಳೆ, ಪೇರಳೆ , ಕರಂಡೆ ಗಳ ರೇಟು ಹೆಚ್ಚಿಗೆ ಮಡಗಿ ಪೇಟೆಲಿ ಕೂದರೆ ಖಂಡಿತ ಒಳ್ಳೆ ಕಾಯಸಕ್ಕು, ಅಪ್ಪೋ. ಹಾಂಗೆ ಒಂದರಿ ಆದರೆ ಪೇಟೆಯವಕ್ಕೂ ಹೀಂಗಿಪ್ಪ ಹಣ್ಣುಗಳ ಪರಿಚಯ ಅಕ್ಕು, ಅಲ್ಲದ್ದ್ದರೆ ಏಪುಲೇ ಒಳ್ಳೆದು ಹೇಳುಗು.

    1. ಬೊಂಡದಂಗುಡಿಲಿ ಒಂದು ಕರೇಲಿ ಹೆಡಗೆಲಿ ಮಡುಗಿ ಸುರುಮಾಡುವನೋ ಕೇಳ್ತವಪ್ಪ ಪೆಂಗಣ್ಣ!!

      1. ನೇರಳೆ ಹಣ್ಣು,ಜಂಬು ನೇರಳೆ,ನೆಲ್ಲಿ ಕಾಯಿ,ಮಾವಿನ ಮೆಡಿ ಅಬ್ಳುಕ್ಕ ಇತ್ಯಾದಿ ಮಾರ್ತದು ಸಣ್ಣ ಪೇಟೆಗಳಲ್ಲಿ ಇದ್ದು. ಇತ್ತೀಚಗೆ ನೆಟ್ಟಿ ಕಾಯಿ ತೆಕ್ಕೊಂಬಾಗ ಕಾನ ಕಲ್ಯಾಟೆ ಕಂಡಿತ್ತಿದ್ದೆ.

        1. ಅದಾ, ಕೇಜಿಮಾವ ಶುದ್ದಿ ಹೇಳಿದವದ – ಕಾನಕಲ್ಲಟೆ ಎತ್ತಿತ್ತು, ಇನ್ನು ಕೇಪುಳು ಎತ್ತದ್ದೆ ಇಕ್ಕೋ?

          ಟೀಕೆಮಾವನ ಒಪ್ಪ – ಒಪ್ಪ ಆಯಿದು.
          ನೋಡುವೊ, ನಮ್ಮ ಬಾಲಣ್ಣನೋ ಮಣ್ಣ ಮನಸ್ಸು ಮಾಡಿರೆ ಇದಕ್ಕೂ ಒಂದು ಕಾಲಲ್ಲಿ ಕಾಯಿಸಕ್ಕು. ಅಲ್ಲದೋ?

          1. ಈಗಳೇ ಕಾಯಿಸಿದ್ದು,ತಂದರೆ ಪೇಟೆ ವ್ಯಾಪಾರಿಗೊ ಹವೀಕರ ಢೋಂಗಿ ಮಾಡದ್ದಿಕ್ಕೋ?ನಮ್ಮವು ಮದಲೇ ವ್ಯವಹಾರಲ್ಲಿ ಮೋಸ.ಪೇಟೆ ವ್ಯಾಪಾರಿಗೊ ಗಾಳಿ ಹಾಕಿರೆ ಬೆಲೂನಿಂದ ಹೆಚ್ಚು ಉಬ್ಬುಗು,ರೊಟ್ಟಿಯ ಹಾಂಗೆ.

    1. ಮಂಗ್ಳೂರುಮಾಣಿ ಕೊಡೆಯಾಲಲ್ಲೇ ಇದ್ದರೂ ’ಕೆಲವರ’ ಗುರ್ತ ಇದ್ದಪ್ಪೋ!
      ಬೀರಂತಡ್ಕಲ್ಲೇ ಬಂದು ಕೂದರೆ ಎಲ್ಲ ಗೊಂತಾವ್ತಿತೋದು! 🙂

  14. ತು೦ಬಾ ಲಾಯಿಕಾಯಿದು.. ಓದಿ ಅಪ್ಪಗ ಎನ್ನ ಸಣ್ಣದಿಪ್ಪಗಾಣದ್ದೆಲ್ಲ ನೆನಪ್ಪಾತು.ತಿಮ್ಮ ಕೊಯಿದು ಕೊದುವ ಅಬ್ಳುಕ್ಕ,..ಪೇರಳೆಹಣ್ಣು,ನೇರಳೆ ಹಣ್ಣು, ಮತ್ತೆ.ಆನು ಅಕ್ಕ ಎಲ್ಲಕೊಯಿದ ಕುಂಟಲ್ ಹಣ್ಣು,ಸರಳಿ,ಬೀಂಪುಳಿಎಲ್ಲ ಕ೦ಡಾ೦ಗೆ ಆವುತ್ತು, . ಶಾಂತಿಕಾಯಿ ಈಗ ಕಾ೦ಬಲೆ ಇಲ್ಲೆ.ಕಲ್ಲಿಲಿ ಅದರ ಗುದ್ದಿ ತಿ೦ಬ ದು ಆ ರುಚಿ…ಎಲ್ಲ ನೆನಪ್ಪು ಮತ್ತೇ .. ಮತ್ತೇ ..ಬತ್ತಾ ಇದ್ದು..

    1. ಅತ್ತೇ, ಶಾಂತಿಕಾಯಿ ಒಪ್ಪಣ್ಣನ ಮನಗೆ ಬತ್ತ ದಾರಿಕರೆಲಿ ಧಾರಾಳ ಇದ್ದು.
      ಮದಲಿಂಗೆ ಮೋಳಮ್ಮ ಅದರ ಚೋಲಿತಿಂದು ಬರೇ ಓಡುಮಾಂತ್ರ ಮಡಗ್ಗು. ನಾಕುದಿನ ಸಮಾ ಒಣಗಿರೆ ಅದರ ಗುದ್ದಲೂ ಸುಲಾಬ!!

      ನಿಂಗಳ ಬಾಲ್ಯಲ್ಲಿ ಬೇರೆಂತ ಕಿತಾಪತಿ ಆಯಿದು?ನೆಂಪುಮಾಡಿ ಒಂದು ಶುದ್ದಿ ಹೇಳಿ ಅತ್ತೆ! 🙂

  15. ಒಪ್ಪಣ್ಣೋ ಶುದ್ದಿ ಒಪ್ಪ ಆಯಿದು.

    ಆನು ಸಣ್ಣ ಇಪ್ಪಗ ಪುಚ್ಚೆ ಕಣ್ಣು ಹಣ್ಣು ಹೇಳಿ ತಿಂದುಗೊಂಡು ಇತ್ತಿದ್ದ ನೆಂಪು ಆವುತ್ತು. ಅದಕ್ಕೆ ಬೇರೆ ಹೆಸರು ಇದ್ದಾ ಹೇಳಿ ಗೊಂತಿಲ್ಲೆ. ಸೆಸಿಲಿ ಅಪ್ಪ ಒಂದು ಹಣ್ಣು. ಕಾಯಿ ಇಪ್ಪಗ ಚೋಲಿ ಪಚ್ಚೆ ಇರ್ತು. ಹಣ್ಣಪ್ಪಗ ಅರಿಶಿನ ಆವುತ್ತು. ಹಣ್ಣು ಕಾಂಬಲೆ ಪುಚ್ಚೆಯ ಕಣ್ಣಿನ ಹಾಂಗೆ . ಹಾಂಗಾಗಿ ಆ ಹೆಸರು ಬಂದದಾಯಿಕ್ಕು.

    ಶಾಲೆಗೆ ಹೋವುತ್ತ ದಾರಿ ಕರೆಲಿ ಸೆಸಿ ಇದ್ದತ್ತು. ದಿನಾ ಶಾಲೆಗೆ ಹೋಪಗ ಬಪ್ಪಗ ಆ ಸೆಸಿ ನೋಡುದೇ ಕೆಲಸ. ಕಾಯಿ ಕಂಡರಂತೂ
    ದಿನಾ ಮರೆಯದ್ದೆ ನೋಡ್ಲಿದ್ದು. ಕೆಲವು ಸರ್ತಿ ಕಾಯಿ ಕಂಡದು ಹಣ್ಣಪ್ಪಗ ಬೇರೆ ಮಕ್ಕೊಗೆ ಕಂಡು ನಾವು ಬಪ್ಪಗ ಹಣ್ಣು ಕಾಣೆ….! ಆ ದಿನ ಇಡೀ ಬೇಜಾರು……..

    ಒಪ್ಪಣ್ಣೋ ನಿಂಗಳ ಶುದ್ದಿ ಓದಿ ಆನಂತೂ ಬಾಲ್ಯಕ್ಕೆ ಹೋದೆ…..ಧನ್ಯವಾದಗಳು.;)

    1. ಅನುಪಮಕ್ಕಾ,
      { ಕೆಲವು ಸರ್ತಿ ಕಾಯಿ ಕಂಡದು ಹಣ್ಣಪ್ಪಗ ಬೇರೆ ಮಕ್ಕೊಗೆ ಕಂಡು ನಾವು ಬಪ್ಪಗ ಹಣ್ಣು ಕಾಣೆ….! }
      ಹಹ್ಹಾ! ಮಕ್ಕಳ ಕೋಳಿಜಗಳಂಗೊ ನೆಂಪಾತು ಅಕ್ಕ.
      ಹಣ್ಣು ಆಚವ ತಿಂದರೆ, ಇವಂಗೆ ಸಿಕ್ಕದ್ದರೆ, ಮತ್ತೊಬ್ಬಂಗೆ ಕೊಡದ್ದರೆ – ಜಗಳವೇ ಜಗಳ.
      ಬೇಗಿಲಿ ನಿತ್ಯ ನಾಕು ಪುಳಿಂಕೊಟೆಯೂ, ಎರಡು ನೆಲ್ಲಿಕಾಯಿಯೂ ಇಲ್ಲದ್ದರೆ ಅದು ಕೂಸುಗಳ ಬೇಗು ಅಲ್ಲ ನಿಘಂಟು! ಅದನ್ನೂ ಆಚವಕೆ ಕೊಡದ್ದರೆ ಜಗಳ!
      ಕೋಪ ಇದ್ದರೂ – ಮತ್ತಾಣ ಸರ್ತಿ ಕುಂಟಾಂಗಿಲ ಕೊಯಿವಲೆ ಒಟ್ಟಿಂಗೇ ಇದಾ! 🙂

      ಅಲ್ಲದಾ ಅಕ್ಕ?

  16. ಎನ್ನ ಮಾವನ ಮನೆಲಿ(ಮಾಪಲತೋಟ) ಸುಮಾರು ಬಗೆಯ ಹಣ್ಣುಗೊ ಇದ್ದು. ಅದರಲ್ಲಿ ಕೆಲವು- ರೆಂಜೆ ಹಣ್ಣು, ಮಂತುಪುಳಿ, ಪುಚ್ಹೆ ಹಣ್ಣು, ಅಂಬಟೆ, ನೆಲ್ಲಿ, ಕಂಬುಳಿ ಹಣ್ಣು, ಕರಗಳ ಕಾಯಿ, ನೇರಳೆ ಹಣ್ಣು, ಕುಂಟಲ್ ಹಣ್ಣು,, ಸರಳಿ ಹಣ್ಣು, ಚವಿ ಹಣ್ಣು, ಬೀಂಪುಳಿ, ಪೇರಳೆ, ಮಡಕ್ಕೆ ಹಣ್ಣು, ಮ್ಯೆಂದ ಹಣ್ಣು (ಕೋಳಿ ಜುಟ್ಟು), ಚೂರಿ ಹಣ್ಣು, ಕೊಟ್ಟೆ ಹಣ್ಣು, ಸೋಮವಾರದ ಹಣ್ಣು, ಕಾರೆ ಕಾಯಿ, ಕರಂಡೆ ಹಣ್ಣು, ಕಂಚುಳಿ, ಚಕ್ಕೋತ, ಮುಸುಂಬಿ, ಮಾಪಲ ಹಣ್ಣು ಹೀಂಗಿಪ್ಪ ಕೆಲವು ದೇಸೀ ಹಣ್ಣುಗಳೊಟ್ಟಿಂಗೆ ಏಪಲ್, ಮ್ಯಾಂಗೋಸ್ಟಿನ್, ಚೆರ್ರಿ, ಸೀಶೋರ್, ರಂಬುಟಾನ್, ಲಿಚಿ, ಮಲಯನ್ ಎಪಲ್, ಪೆಲ್ಲೋಟ್, ವೆಲ್ವೆಟ್ ಎಪಲ್ ಎಲ್ಲಾ ಇದ್ದು. ಇದಲ್ಲದ್ದೆ ೫೦ಕ್ಕೂ ಹೆಚ್ಚಿನ ಬೇರೆ ಬೇರೆ ಜಾತಿಯ ಮಾವಿನ ಮತ್ತೆ ಹಲಸಿನ ತಳಿಗಳ ಸಂಗ್ರಹ ಇವರ ತೋಟಲ್ಲಿ ಇದ್ದು.

      1. ಯೇ ಚೆನ್ನೈ ಭಾವ

        ಅತ್ಲಾಗಿ ಕಾಟು ಹಂದಿ ಕಾಟಿ ಜಾಸ್ತಿ ನಿನಿಗೆ.. ಅದಕ್ಕೆ ವೆವಸ್ಥೆ ಮಾಡುಲೆಡಿಗಾರೆ ಅಕ್ಕು ನಿನಿಗೆ ಹೇಳಿದವು ಪಂಜ ಚಿಕ್ಕಯ್ಯಾ.. ಓ ಆಚಿಗೆ ಕೂದೊಂಡು..

        ಅಷ್ಟೆಲ್ಲ ಇದ್ದು ಹೇದರೆ ದೊಡ್ಡ ಅಗಳು ಮಾಡಿಕ್ಕೇ.. ಬೋಚಬಾವಂಗೆ ಗೊಂತಾಗದ್ದರೆ ಅಕ್ಕು ಹೇಳಿತ್ತು ಇತ್ಲಾಗಿಂದ!

        1. ಕಾಟಿಗೆ ಹಂದಿಗೆ ಅಡ್ಕತ್ತಿಮಾರು ಮಾವನತ್ರೆ ಏನಾರು ಇಕ್ಕು ಕೆಣಿ. ಮತ್ತೆ ಭಾವ…, ತೋಟ ಮಾಡ್ಲೆ ಹಾಕುವ ಬಂಡವಾಳ ಹಿಂದೆ ಪಡವಲೆ ಸಾರ್ವಜನಿಕ ವೀಕ್ಷಣೆಗೆ ಬಿಟ್ಟು ಗೇಟು ಹಾಕಿ ಟಿಕೇಟು ಮಡುಗುವ ಸಲಹೆ ಮಂಗ್ಲೂರ ಮಾಣಿದು!!.

      2. ಏ ಭಾವಾ ತೋಟ ಮಾಡಿಗೊಂಬದೆಲ್ಲಾ ಸರಿ ಆದರೆ ಏವ ಹಣ್ಣು ಮೊದಾಲು ಕೊಯಿವದೂ ಹೇಳ್ತ ಸಮಸ್ಯೆ ಒಂದು, ಮತ್ತೆ ನಮ್ಮ ಬಯಲಿನ ಪುಳ್ಳಾರುಗಳ ಎಂತ ಮಾಡ್ಸು? ಒಂದು ಸರ್ತಿ ನುಗ್ಗಿರೆ ಮಂಗಂಗಳ ಪುಂಡು ಹೊಕ್ಕಿದಾಂಗೆ, ಪೂರಾ ರಚ್ಚ್ಗಾಪಚ್ಚಾ ಮಾಡಿ ಮಡುಗುಗು ಹು! ಹೀಂಗಿರ್ತ ಒಂದು ತೋಟ ಇದ್ದರೆ ಮಂಗ್ಳೂರು ಮಾಣಿಯ ಐಡಿಯವುದೇ ಸರಿಯೇ ಎಷ್ಟಾದರೂ ಲೆಕ್ಕಾಚಾರದವಲ್ಲದೋ, ಅದಪ್ಪು ಆ ಮಾವನ ಈ ಅಳಿಯ ಎಂತ ಹೇಳುಗು………..?

        1. [ಆ ಮಾವನ ಈ ಅಳಿಯ ಎಂತ ಹೇಳುಗು………..?] – ಹ ಹಾ…. ಅದಪ್ಪು ಈ ಅಳಿಯನೂ ಬಿಡ° ಅಪ್ಪೋ!!

          1. ಅಲ್ಲ ಭಾವಾ ,
            ಈ ಅಳಿಯನೇ ಆನೆಹಿಡುದು ಮಡುಗಿದ್ದವು ಇನ್ನು ಆಮಾವ ಎಂತೆಲ್ಲಾ ಹಿಡುದು ಮಡುಗಿದ್ದವೋ ಉಮ್ಮಪ್ಪ ನವಗರಡಿಯ , ಇನ್ನು ಕೋಟೆಕಟ್ಟುತ್ತು,ಬೀಗಹಾಕುತ್ಸು ಎಲ್ಲಬೇಕಾಗ ಗೇಟಿಲಿಕೂದು ಎಣುಸುದು ಮಾತ್ರಾ ಬಾಕಿಇಕ್ಕಷ್ಟೇ ನವಗೆ ಹೇಳಿ ತೋರ್ತು ನಿಂಗ್ಳ ಅಭಿಪ್ರಾಯ….?

        2. ಸುದ್ದಿ ಹೇಳಿ ಕೆಟ್ಟತ್ತೋ ಹೇಂಗೆ?, ಹೇಳಿದಾಂಗೆ ಅಲ್ಲಿ ಹಂದಿ ಉಪದ್ರ ಇಲ್ಲೆ, ಬರೀ ಆನೆಗಳದ್ದು ಮಾತ್ರ

          1. ಇಲ್ಲೆಪ್ಪಾ ಇಲ್ಲೆ ಶುದ್ದಿ ಹೇಳಿ ಕೆಟ್ಟಿದಿಲ್ಲೆ ನವಗೂ ಗೊಂತಾತಿದಾ ನಮ್ಮ ಊರಿಲಿ ಹೀಂಗಿರ್ತ ಒಂದು ತೋಟ ಇದ್ದೂಳಿ- ಧನ್ಯವಾದಂಗೊ,
            ಆನೆ ಉಪದ್ರ ಇದ್ದು ಹೇಳಿದಿ ನಿಂಗಳಪಟಲ್ಲಿ ಆ ಆನೆಯನ್ನೇ ಕೊಂಗಾಟ ಮಾಡ್ತಹಾಂಗೆ ಕಾಣ್ತನ್ನೇ…!

          2. ಮಾಪಲ್ತೋಟದ ಅಳಿಯ ವೆಂಕಟೇಶಣ್ಣನ ಒಪ್ಪ ಕಂಡು ತುಂಬಾ ಕೊಶಿ ಆತು.
            ಮಾಪಲಮಾವನ ತೋಟದ ಬಗ್ಗೆಯೇ ಒಂದು ಶುದ್ದಿ ಹೇಳುವಿರೋ ನಿಂಗೊ?
            ಎಡಿಗಾರೆ ಒಂದೊಂದು ಪಟವೂ ತೆಗದು ಕೊಡಿ, ಮೊನ್ನೆ ಗಿರಿಗೆದ್ದೆಲಿ ತೆಗದ ಹಾಂಗೆ 😉
            ಬೈಲಿನೋರ ಯೇವತ್ತು ಕರಕ್ಕೊಂಡು ಹೋವುತ್ತಿ? ಅಳಿಯನೊಟ್ಟಿಂಗೆ ಹೋದರೆ ಸಲಿಗೆ ಜಾಸ್ತಿ ಸಿಕ್ಕುತ್ತಿದಾ!!

            ಯಶಸ್ವಿನಿಯ ಕೊಂಗಾಟಲ್ಲಿ ಹಿಡುದ್ದು ಕಂಡ್ರೆ ಮನೆಲಿ ನಿಂಗೊಗೆ ಕೇಪುಳು ಅಡ್ರು ಹೊಡಿಅಕ್ಕು ಕಾಣ್ತು! 😉

      3. ಮತ್ತೆ ಎಂತರ…………

        ವಿಧ ವಿಧವಾದ ಫಲಂಗಳ ಪೂಜೆಗೆ ನೈವೇದ್ಯ ಮಾಡುಲೆ,ಮಕ್ಕೊಗೆ ತಿಮ್ಬಲೇ ಕೊಯ್ದು ಕೊಡುವವು ಒಂದು ಕಡೆ… ಅದರ ತಿನ್ದುಗೊಂಡು ಪ್ರಕೃತಿಯ ಮಡಿಲಿಲ್ಲಿ ಆಟ ಆಡಿಗೊಂಡು ಆಟದ ಜೊತೆ ಪಾಠ ಕಲಿವ ಬೈಲಿನ ಮಕ್ಕೋ ಒಂದು ಕಡೆ… ಸುಂದರವಾದ ಲತೆ,ಪುಷ್ಪಗಳಿಂದ ಕಂಗೊಳಿಸುವ ಉದ್ಯಾನವನಲ್ಲಿ ಹೂ ಸಂಗ್ರಹಿಸುವ ಬೈಲಿನ ಹೆಮ್ಮಕ್ಕೋ ಒಂದು ಕಡೆ… ಅಂಬಾ…ಅಂಬಾ ಹೇಳುವ ಹಸುಗಳ ಮಧುರ ದನಿ ಒಂದು ಕಡೆ… ರುದ್ರ,ವೇದ ಘೋಷ,ಗೀತಾ ಪಾರಾಯಣ ಒಂದು ಕಡೆ… ಹೋಮ,ಹವನಂಗೋ ಒಂದು ಕಡೆ… ನೃತ್ಯ,ಸಂಗೀತ,ವಿವಿಧ ಕಲಾ ಪ್ರಕಾರಂಗೋ ಒಂದು ಕಡೆ… ಆಹಾ: ‘ಇಂದ್ರ ಲೋಕವೇ ಧರೆಗಿಳಿವದು’ ಹೇಳಿರೆ ಹೀಂಗಲ್ಲದ??????

    1. @ವೆಂಕಟೇಶಣ್ಣ,
      ನಿಂಗಳ ಮಾವನ ತೋಟದ ಬಗ್ಗೆ ಒಂದು ಶುದ್ದಿ ಬರೆವಿರೋ. ಒಳ್ಳೆ ಉಪಯುಕ್ತ ಮಾಹಿತಿ ಕೊಟ್ಟಿದಿ. ನವಗೂ ಒಂದು ಹೊಸ ಪರಿಚಯ ಸಿಕ್ಕಿದ ಹಾಂಗಾವುತ್ತು.

  17. ಒಪ್ಪಣ್ಣ,
    ನೀನು ಹೇಳಿದ ಎಲ್ಲಾ ಹಣ್ಣುಗೋ ತಿಂಬಲೂ ಕೂಡಾ ಸೀವು, ಹುಳಿ, ಕಾಂಬಲೂ ಬಣ್ಣ ಬಣ್ಣ. ಸಣ್ಣ ಸಣ್ಣ ಹಣ್ಣುಗೋ ಆದರೂ ರುಚಿಯೂ ಅದರ ಒಟ್ಟಿಂಗೆ ಇಪ್ಪ ನೆನಪುಗೋ ತುಂಬಾ ದೊಡ್ಡದು. ಶುದ್ದಿಯೂ ಹಾಂಗೆ ಆಯಿದು.
    ಹುಳಿ ಆದರೂ ತಿಂಬಲೆ, ಉಪ್ಪಿನ ಕಾಯಿಗೆ ಕರಂಡೆಕಾಯಿಯೂ ಲಾಯ್ಕಾವುತ್ತು.
    ನಾವು ಈಗಾಣ ವರೆಂಗೆ ಈ ಎಲ್ಲಾ ಕಾಡು ಗುಡ್ದೆಲಿ ಬೆಳವ ಹಣ್ಣುಗಳ ತಿಂದಿದು. ಈಗಾಣ ಮಕ್ಕೋ ಶಾಲೆಗೆ ಹೋಪದು ಬಪ್ಪದು ವಾಹನಲ್ಲಿ ಆದ ಕಾರಣ ಅವಕ್ಕೆ ಇದರ ಎಲ್ಲಾ ಅನುಭವಿಸುವ ಯೋಗವೂ ಇಲ್ಲೆ, ಮನಸ್ಸೂ ಇಲ್ಲೆ.
    ನಮ್ಮ ಊರಿನ ಎಲ್ಲಾ ಗುಡ್ದೆಗಳಲ್ಲಿ ರಬ್ಬರ್ ಕಾಡು ತುಂಬುತ್ತಾ ಇಪ್ಪಗ ನಮ್ಮ ನಂತರದ ತಲೆಮಾರಿಂಗೆ ಈ ಹಣ್ಣುಗಳೂ, ಮದ್ದಿನ ಗೆಡುಗಳೂ ಆದ ಈ ವನಸಂಪತ್ತು ಚಿತ್ರಲ್ಲಿಯೂ ಕಾಂಬಲೆ ಸಿಕ್ಕ ಅಲ್ಲದಾ?

    [ಆರ ಮರಲ್ಲಿದ್ದರೂ ಅಕ್ಕು – ಕಲ್ಲಿಡ್ಕಿ ಕೊಯಿದು ತಿಂದೊಂಡು ಹೋಕು.]
    ಅಪ್ಪಪ್ಪು! ಮೊನ್ನೆ ಸುಭಗಣ್ಣ ಮಗನ ಕಾಂಬಲೆ ಹೋಪಗ ದಾರಿಲಿ ಬೈಕ್ಕು ನಿಲ್ಲುಸಿ- ಕೈಲಿ!! ಕಲ್ಲಿಲಿ, ಮಂತ್ರಲ್ಲಿ ಅಲ್ಲ, ಮಾವಿನಕಾಯಿ ಉದುರ್ಸಿ ತೆಕ್ಕೊಂಡು ಹೋಯಿದವು!!!! 😉

    ಶುದ್ದಿಲಿ ಬಾಲ್ಯದ ನೆನಪುಗ ಕಾಡುಹಣ್ಣುಗಳ ರೂಪಲ್ಲಿ ಸವಿದ ಹಾಂಗೆ, ನಮ್ಮ ಮಕ್ಕೊಗೂ ಹೀಂಗಿಪ್ಪ – ಪ್ರಕೃತಿಯೇ ಸೀಂಚಿದ ಗೆಡುಗಳಿಂದಲೇ ಶುದ್ಧವಾದ ಹಣ್ಣುಗಳ ಆವ್ವೇ ಸೀದಾ ಕೊಯ್ದು ತಿಂಬ ಹಾಂಗೆ – ಇಪ್ಪ ವಾತಾವರಣಂಗ ಸಿಕ್ಕಲಿ…
    ನಮ್ಮ ಮುಂದಾಣ ಪೀಳಿಗೆಗೆ ನೈಸರ್ಗಿಕವಾಗಿ ಬೆಳೆದ ಗುಡ್ದೆಗಳೂ, ಫಲಂಗಳೂ ಸಿಕ್ಕಲಿ ಹೇಳಿ ಹಾರಯಿಕೆ..

    1. ಶ್ರೀ ಅಕ್ಕಾ,
      ಈಗಾಣ ಮಕ್ಕೊ ವಾಹನಲ್ಲಿ ಹೋಗಿ ವಾಹನಲ್ಲಿ ಬಪ್ಪದು – ಅಪ್ಪಾದ ವಿಚಾರವೇ.
      ಕೆಳ ಇಳುದು, ಕಟ್ಟಪುಣಿಲಿ ನೆಡದು, ಹಳ್ಳ ದಾಂಟಿ, ಗುಡ್ಡೆ ಹತ್ತಿ, ಅಗಳು ಹಾರಿ, ತೋಡಿಲಿ ಮೀಸಿ, ಒಂಟಿಪಾಲ ದಾಂಟಿ – ಏಯ್, ಇದೆಲ್ಲ ಕಾಂಬಲೇ ಇಲ್ಲೆ ಈಗ.

      ಅದೇ ಮಕ್ಕೊ ದೊಡ್ಡ ಆದ ಮತ್ತೆ ಕೈಲೊಂದು ಬೈಕ್ಕು ಇಲ್ಲದ್ದೆ ಎಲ್ಲಿಗೂ ಹೋತಿಕ್ಕಲೆಡಿಯ!!
      ಮತ್ತೆ ಕೇಪುಳು ಸಿಕ್ಕುದು ಎಲ್ಲಿಂದ – ಅಪ್ಪೋ! 🙂

      ಒಪ್ಪ ಒಪ್ಪಕ್ಕೆ ಒಪ್ಪಂಗೊ.

      ಅದೆಂತರ – ಸುಭಗಣ್ಣ ಮಾವಿನಕಾಯಿ ಕೊಯಿದ ಶುದ್ದಿ? ಬೈಲಿಂಗೆ ಹೇಳುವಿರೋ – ರಜ ವಿವರವಾ…ಗಿ..!? 😉

  18. ಎಲ್ಲೋರಿಂಗು ಅವರವರ ಬಾಲ್ಯವ ಹಣ್ಣುಗಳ ಮೂಲಕ ನೆನಪ್ಪು ಮಾಡಿ ಕೊಟ್ಟ ಒಪ್ಪಣ್ಣಂಗೆ ” ಲಾಯಿಕ ಆಯಿದು” ಹೇಳಿ ಒಂದು ಒಪ್ಪ.

    ಕೇಪುಳು ಹಣ್ಣಿಂದ ಚ೦ಚ ತೆಗದ್ದು ಒಪ್ಪಣ್ಣ ಹೇಳಿದ ಮತ್ತೆ ನೆನಪ್ಪಾದ್ದದು. ಶಾಂತಿಕಾಯಿ ಗುದ್ದಿ ಬೆರಳು ಬೇನೆ ಮಾಡಿಗೊಂಡದು ಮರತ್ತೇ ಹೊಯಿದಿಲ್ಲೆ.

    ಎನಗೆ ನೆನಪ್ಪಾದ ಕೆಲವು ಹಣ್ಣುಗೊಃ

    ಅಜ್ಜಿ ಬುಡ್ಕ- ಕೆಲವು ದಿಕ್ಕೆ ಇದರ ಅಜ್ಜಿ ಪಿಟ್ಳ ಹೇಳ್ತವು.ಚವಿ ಹಣ್ಣಿ೦ದ ರಜಾ ದೊಡ್ಡ. ಅದರದೇ ರುಚಿ ಹೇಳುಲಕ್ಕು. ಹಣ್ಣಿ೦ಗೆ ಒಂದು ಕವಚ ಇರುತ್ತು.
    ದಾರೆಪ್ಪುಳಿ -ಬೀಂಪುಳೀಂದ ದೊಡ್ಡ. ರುಚಿಲಿ ಅದರಿಂದ ಹೆಚ್ಹು ಸೀವು.
    ಪುನರ್ಪುಳಿ- ಕೆ೦ಪು ಬಣ್ಣದ ಹಣ್ಣು. ಇದರ ತಿಂದು, ಹಲ್ಲು ಅರುಶಿನ ಮಾಡಿಗೊಂಡು ಕ್ಲಾಸಿಂಗೆ ಹೋಗಿ ಮಾಷ್ಟ್ರುಮಾವನ ಕೈ೦ದ ”ಹಲ್ಲು ತಿಕ್ಕಿದ್ದಿಲ್ಲೆಯೊ?” ಹೇಳಿ ಬೈಗಳ ತಿಂದದು ಆರಪ್ಪಾ?
    ಅಂಬಟೆ- ಎಲ್ಲೊರಿಂಗು ಗೊಂತಿಪ್ಪದೆ.
    ಚಳ್ಳೆ ಹಣ್ಣು -ಇದರ ತಿಂದ ನೆನಪ್ಪು ಮಾತ್ರ. ಈಗ ಸೆಸಿ ನೊಡೀದರುದೆ ಗುರ್ತ ಸಿಕ್ಕ. ರಜ್ಜ ಅ೦ಟು. ಒತ್ತಿದರೆ ರಟ್ಟುತ್ತು. ರಾಮನ ಪಟ್ಟಾಭಿಷೇಕದ ಕಥೆಲಿ ಬಪ್ಪ ಹಣ್ಣು.
    ಜ೦ಬು ನೇರಳ- ಬೆಳೀ ಮಿಶ್ರಿತ ಗುಲಾಬಿ ಬಣ್ಣ. ಬಜಕ್ರೆ ಮೇಲೆ ಬಿದ್ದ ಇದರ ಗುಲಾಬಿ ಬಣ್ಣದ ಹೂಗು ತಿ೦ಬದೇ ಮಕ್ಕೊಗೆ ಒಂದು ಗೌಜಿ.
    ಪನ್ನೇರಳೆ- ಹೊನ್ನ ಬಣ್ಣದ ಹಣ್ಣು.

    ಈಗಾಣ ನಮುನೆ ಜೀವನಲ್ಲಿ ಕೇಪುಳಿಂಗು ಬೆಲೆ ಬಕ್ಕು. ಕು೦ಟಾಲಿಂಗು ಬೆಲೆ ಇಕ್ಕು. ನವಗೆ ಮಾರ್ಕೆಟ್ಟಿಂಗು ಟೆಕ್ನಿಕ್ಕು ಗೊಂತಿಲ್ಲೆ . ಸಂಗತಿ ಇಪ್ಪದು ಅಲ್ಲಿ .

    1. ಭಾಗ್ಯಕ್ಕಂಗೆ ನಮಸ್ಕಾರಂಗೊ.
      ಹ ಹ, ಸುಮಾರು ಸಂಗತಿಗಳ ನೆಂಪು ಮಾಡಿದಿ ಅಪ್ಪೋ!

      ಶಾಂತಿಕಾಯಿಯ ಗುದ್ದುವಗ ಸಣ್ಣ ಗುಳಿಲಿ ಮಡಗೆಕ್ಕು, ಅಲ್ಲದ್ದರೆ ಅದು ಹೊಡಚ್ಚುತ್ತು.
      ಹೊಡಚ್ಚದ್ದ ಹಾಂಗೆ ಹಿಡ್ಕೊಂಡ್ರೆ ಬೆರಳು ಅರಚ್ಚಿಯೇ ಅರಚ್ಚುತ್ತು!!
      ಅಷ್ಟಪ್ಪಗ ತಿಂಬ ಕೊದಿ ಒಂದರಿಯಂಗೆ ಹೋವುತ್ತು, ಅಲ್ಲದೊ? 😉

      ಇಷ್ಟು ಹಣ್ಣುಗೊ ಇದ್ದೋ? ಒಂದರಿ ಬೈಲಿನೋರ ಕರಕ್ಕೊಂಡು ಬಂದಿಕ್ಕುದೋ ಗ್ರೇಶುದು, ಹೇಂಗಕ್ಕು? 🙂

  19. ಆಚಮನೆ, ದೊಡ್ಡಣ್ಣ,ಗಾಯತ್ರಿ… ಈ ಸಂಬಂಧಂಗ ಎಲ್ಲ ಜಯಕ್ಕಂಗೆ ಸರಿ ಗೊಂತಿಲ್ಲದ್ದ ಕಾರಣ ಜಯಕ್ಕ ಟ್ಟೆಟ್ಟೆಟ್ಟೆ… “ಟ್ಟೆಟ್ಟೆಟ್ಟೆ” ಈಗ ಈ ಶಬ್ದಂಗೋ ಎಲ್ಲ ಕೇಳುದೆ ಕಮ್ಮಿ…. ಒಪ್ಪಣ್ಣ ಅದರ ನೆನಪು ಮಾಡಿಯಪ್ಪಗ ಹೀಂಗಿದ್ದ ಶಬ್ದಂಗಳ ನೆನಪು ಮಾಡಿಗೊಂಡು ಖುಷಿ ಪಡುದು…

    “ಮಣ್ಣಿ ತಿಂದುಗೊಂಡಿದ್ದ ಬಾಬೆಗೆ ಅಶನ ತಿಂಬಲೆ ಹೇಳಿಕೊಟ್ಟಾತು. ನಾಳೆಂದ ಅದುವೇ ಹೆಜ್ಜೆಮಡಗಿ ಉಂಗೋ ಏನೋ, ಉಮ್ಮಪ್ಪ!” ಕಂಪ್ಯೂಟರ್ ಯುಗಲ್ಲಿ ಯಾವುದನ್ನೂ ಅಸಾಧ್ಯ ಹೇಳುಲೇ ಎಡಿಯ…

    “ಅವಂಗೆ ಹಟ ಜಾಸ್ತಿ – ಹೇದು ಅವನ ಅಮ್ಮ ಪರಂಚಿಗೊಂಡಿದ್ದತ್ತು.”… ಇವರ ಅಣ್ಣನ ಮಗ ಕಿಶೋರ ಸಣ್ಣ ಇಪ್ಪಗ ಆರಾರೂ ‘ಗೆಂಟು ಮಾಡುಲಾಗ…’ ಹೇಳಿ ಅವನ ಜೋರು ಮಾಡಿರೆ ಅವ ಕೂಗಿಗೊಂಡೆ ವಾಪಾಸ್ ಹೇಳುಗು… ‘ನಿಂಗ ಎಂತಕೆ ಗೆಂಟು ಮಾಡುದು?’. ಅವನ ಲೆಕ್ಕಲ್ಲಿ ದೊಡ್ದವೆಲ್ಲ ಅವನ ಹತ್ತರೆ ಗೆಂಟು ಮಾಡುದು… ನಿಜವಾಗಿಯೂ ಅಪ್ಪು ಅದು… ದೊಡ್ಡವು ಗೆಂಟು ಮಾಡದ್ದರೆ ಮಕ್ಕೋ ಗೆಂಟು ಕಲಿವದಾದರೂ ಎಲ್ಲಿಂದ? ನಾವು ಮಕ್ಕೊಗೆ ಕಲಿಷೆಕ್ಕಾದ್ದು ಎಂತದೂ ಇಲ್ಲೇ… ಮಕ್ಕಳ ಕೈಂದ ಕಲಿವಲೇ ತುಂಬಾ ಇದ್ದು… ಆನು ಕಿಶೋರನ ಕೈಂದ ತುಂಬಾ ತುಂಬಾ ಕಲ್ತಿದೆ… ಮಗ ಶ್ರೀಚರಣನ ಬಾಲ ಲೀಲೆಗಳಿಂದಲೂ ಹೆಚ್ಹಾಗಿ ಮನಸ್ಸಿಲ್ಲಿ ಅಚ್ಚಳಿಯದ್ದೆ ಇಪ್ಪದು ಕಿಶೋರನ ಬಾಲ ಲೀಲೆಗ…

    “ಈಗಾಣ ಮಕ್ಕೊಗೆ ಅರಡಿಗೊ! ಟೀಚರು ಬೈಗು – ಕ್ಲೀನು ಇಲ್ಲೆ ಹೇದು!!”… ‘ಕ್ಲೀನು’ ಗೆ ಇಷ್ಟು ಮಣ್ಣು… ಆ ಪ್ರೀತಿಯ ಸಂಬಂಧಲ್ಲಿ ಇಪ್ಪ ಆನಂದ ಈ ‘ಕ್ಲೀನು’ ಮಕ್ಕೊಗೆ ಗೊಂತಿಕ್ಕೋ?

    “ಪೈಸೆ ಕೊಟ್ಟು ತಪ್ಪದಾದರೆ ಯೇಪುಳೂ ರುಚಿಯೇ, ಕೇಪುಳೂ ರುಚಿಯೇ! ಅಲ್ಲದೋ ಭಾವಯ್ಯ?!”… ಮಂಗಳೂರಿಲ್ಲಿ ಸಾವಯವ ತರಕಾರಿಗಕ್ಕೆ ಇತರ ತರಕಾರಿಂದ ೨೦-೩೦ ರುಪಾಯಿ ಜಾಸ್ತಿ… ಇನ್ನು ಕೇಪುಳಿಂಗೆ ಯೇಪುಳಿಂದ ಜಾಸ್ತಿ ಕ್ರಯ ಬಂದು ಆಯೆಕ್ಕಷ್ಟೇ ಕೇಪುಳಿನ ರುಚಿ ಗೊಂತಾಯೇಕ್ಕಾರೆ…

    1. ಜಯಕ್ಕಾ,
      ಚೆಂದದ ಒಪ್ಪ ಬರದ್ದು ಕಂಡು ತುಂಬಾ ಕೊಶೀ ಆತು.

      ಕಿಶೋರ ಸಣ್ಣ ಇಪ್ಪಾಗ ಹೇಳಿದ್ದರ ಗ್ರೇಶಿ ನೆಗೆ ಬಂತು. ಅಲ್ಲದ್ದರೂ, ಅವನ ದೃಷ್ಟಿಲಿ ದೊಡ್ಡೋರೇ ಗೆಂಟು ಮಾಡ್ತದು ಅಪ್ಪೋ!

      { ಪ್ರೀತಿಯ ಸಂಬಂಧಲ್ಲಿ ಇಪ್ಪ ಆನಂದ ಈ ‘ಕ್ಲೀನು’ ಮಕ್ಕೊಗೆ ಗೊಂತಿಕ್ಕೋ?}
      ನಿಜವಾಗಿಯೂ ಯೋಚನೆ ಮಾಡೇಕಾದ ಸಂಗತಿ ಇದು!

  20. ಒಪ್ಪ ಒದುಗ ಬಾಲ್ಯದ ದಿನಗಳತ್ತ ಮನಸ್ಸು ಓಡಿತ್ತು. ದನ್ಯವಾದ೦ಗೊ..

    1. ಹರೀಶಣ್ಣೋ,
      ಕೇವಳದ ಗುಡ್ಡೆಲಿ ಕೇಪುಳಿ ಇಲ್ಲೆಯೋ?
      ಕೇಪುಳೆ ಕೋಲು ಮಾಷ್ಟ್ರಂಗೂ ಕುಶಿ ಅಡ,
      ನಾಕೆರಡ್ಳಿ ಆರು – ಹೇಳುವಗ ಜಬುಕ್ಕ ಜಬುಕ್ಕನೆ!!
      – ಅದುದೇ ನೆಂಪಾತೋ ಹೇಂಗೆ? 😉

      1. ಒಪ್ಪಣ್ಣ ಹುಳಿ ಅಡರು, ಮ೦ದಾರದ ಅಡರು ಜೋರು ನೆ೦ಪಾವ್ತು ಈಗ ಃ)

  21. ಕಾಡು ಹಣ್ಣುಗಳಲ್ಲಿ ಸತ್ತ್ವ ಇದ್ದು.ನೇರಳೆ,ಕಿಸ್ಕಾರ ಹಣ್ಣುಗೊ ಹೊಟ್ಟೆಗೆ ಉತ್ತಮ.ನೆಂಪು ಮಾಡಿದ್ದಕ್ಕೆ ಧನ್ಯವಾದ.ಕಾಡು ಮಾವಿನ ಬಗ್ಗೆ ಒಪ್ಪಣ್ಣ ಮತ್ತೊಂದು ಲೇಖನವನ್ನೇ ಬರೆಯೆಕು.

    1. ಗೋಪಾಲಣ್ಣಾ,
      ಕಾಡು ಹಣ್ಣುಗಳಲ್ಲಿ ಸತ್ವ ಇಪ್ಪ ಸಂಗತಿಯ ಹೊಸಬ್ಬರು ನಂಬವು. ಕುಪ್ಪಿಲಿ ಪೆಕೆಟಿಲಿ ಬಂದದು ಮಾಂತ್ರ ಮಾತ್ರೆ ಮದ್ದು ಹೇದು ಲೆಕ್ಕ ಇದಾ! 🙁

      {ಕಾಡು ಮಾವಿನ ಬಗ್ಗೆ } ಖಂಡಿತಾ ಶುದ್ದಿ ಹೇಳೇಕಪ್ಪೋ..
      ಕಳುದೊರಿಶ ಶ್ರೀಅಕ್ಕ° ತಂದುಕೊಟ್ಟ ಮೆಡಿಯ ಮಾಷ್ಟ್ರಮನೆಅತ್ತೆ ಉಪ್ಪಿನಾಯಿ ಹಾಕುವಗಳೇ ಶುದ್ದಿ ಮಾತಾಡುವೊ ಗ್ರೇಶಿದ್ದು. ಈ ಒರಿಶ ಪುನಾ ತಂದುಕೊಟ್ರೆ ಹೇಳುವೊ 😉

  22. ಎನ್ನ ಪ್ರಾಥಮಿಕ ಶಾಲಾ ದಿನಂಗೊ ಎಲ್ಲ ಕಣ್ಣ ಮುಂದೆ ಕಟ್ಟಿದ ಹಾಂಗೆ ಆತು ಒಪ್ಪಣ್ಣ.
    ಹಾಂಗಿಪ್ಪ ಹಣ್ಣುಗಳ ತಿಂದ ಎನ್ನ ಸುದ್ದಿಗಳ ಬರವಲೆ ಈಗ ಸುರು ಮಾಡಿರೆ ನಿಲ್ಲಲೆ ನಿಲ್ಲ ಪಕ್ಕಕ್ಕೆ ಹೇಳಿ ಕಾಣ್ತು.
    ಶಾಲೆಗೆ ಹೋಪಗ ತಮ್ಮ, ತಂಗೆಕ್ಕೊ ಮತ್ತೆ ನೆರೆಕರೆಯ ಮಕ್ಕಳೊಟ್ಟಿಂಗೆ ಸರಳಿ ಹಣ್ಣು, ಅಬ್ಳುಕ್ಕ, ಚಾಕೊಟೆ ಎಲ್ಲ ತಿಂದದು ನೆಂಪಾತು.
    ಅಪ್ಪಚ್ಚಿಯಕ್ಕಳ ಒಟ್ಟಿಂಗೆ ತೋಟ, ಗುಡ್ಡೆಗೆ ಹೋದಪ್ಪಗ ಕುಂಟಾಂಗಿಲ, ಸರಳಿ, ನೇರಳೆ, ಕೇಪುಳ, ಚೂರಿ, ಶಾಂತಿ ಕಾಯಿ ಇತ್ಯಾದಿ ತಿಂದದು ನೆಂಪಾತು.
    ಚವಿ ಹಣ್ಣು, ಕಂಬ್ಳಿ ಹಣ್ಣಿನ ಅಪ್ಪ ಕೊಯಿಕ್ಕೊಂಡು ಬಂದು ಎಂಗೊ ಮಕ್ಕೊಗೆಲ್ಲ ಇದಾ ಹೇಳಿ ಹಂಚಿದ್ದು ಎಲ್ಲ ನೆಂಪಾತು…
    ಬೀಂಪುಳಿ ಬಗ್ಗೆ ಓದುವಗಳೆ ಬಾಯಿಲಿ ನೀರು ಬಂತು.
    ‘ಹರಿಯೊಲ್ಮೆ’ಲಿ ಇದ್ದ/ಇಪ್ಪ ೨ ಬೀಂಪುಳಿ ಮರಂಗೊ ಕಣ್ಣಿಂಗೆ ಕಾಣ್ತಾ ಇದ್ದು.
    ಈಗಾಣ ಮಕ್ಕ್ಪೊಗೆ ಅದೆಲ್ಲ ನಿಜವಾಗಿ “ಮಿಸ್” ಅಕ್ಕು ಕಾಣ್ತೆನಗೆ.
    ಲಾಯಿಕದ ಶುಧ್ಧಿ ಒಪ್ಪಣ್ಣ,
    ಸುಮನಕ್ಕ….

    1. ಸುಮನಕ್ಕಾ,
      ಪ್ರಾಥಮಿಕ ಶಾಲಾ ದಿನಂಗಳಲ್ಲಿ ಈ ಸುಮನಕ್ಕ ತಮ್ಮ ತಂಗೆಕ್ಕಳ ಒಟ್ಟಿಂಗೆ ಬೊಬ್ಬೆಗವುಜಿ ಮಾಡಿಂಡು ಸರೊಳಿ-ಕುಂಟಾಂಗಿಲ ಕೊಯಿಶಿ ಹಂಚುದರ ಗ್ರೇಶಿ ನೆಗೆಬಂತು!

      ಈಗಳೂ ಹರಿಯೊಲ್ಮೆಗೆ ಬಂದರೆ ಒಂದರಿ ತೋಟ ತಿರುಗಿ ಬೀಂಪುಳಿ ಇದ್ದೋ, ನೇರಳೆ ಹಣ್ಣು ಇದ್ದೋ, ಪನ್ನೇರಳೆ ಇದ್ದೋ – ನೋಡಿಕ್ಕಿ ಬತ್ತಿರೋ ಹೇಂಗೆ? 🙂

      ಒಪ್ಪ ಪಷ್ಟಾಯಿದು..

  23. ಅವು ಅಚ್ಚ ನಹಿ ಹೇಳಲಿ ನಾವು ಅಚ್ಚ ಸ್ವಚ್ಚ ಇದು ಹೇಳುವೊ. ಇದರೆಡೆಲಿ ಶಾಲೆಮಕ್ಕೊ ಮಧ್ಯಾಹ್ನ / ಹೊತ್ತೋಪಗ ಸೈಕಲು ಕಲಿವಲೆ ಹೇಳಿ ಬಾಡಿಗೆ ಸೈಕಲ್ ತೆಕ್ಕೊಂಡು ಈ ಹಣ್ಣುಗಳ ಹುಡಿಕ್ಯೊಂಡು ಅಂಗಿ ಚಡ್ಡಿಯೂ ಹರ್ಕೊಂಡು ಮೈಯನ್ನೂ ಪರಂಕಿಸ್ಯೊಂಡು ಹೋದ ಶಾಲೆ ಮಕ್ಕಳೂ ಇದ್ದವಪ್ಪೋ! (ಇದಿನ್ನು ಆನೋ ಹೇದು ಕೇಳುತ್ಸು ಬೇಡ – ನವಗರಡಿಯ ಸೈಕಲು ತೊಳಿವಲೆ ಹಾ!). ಹೇಳಿದಾಂಗೆ ನವಗೂ ನೆಂಪು ಆವ್ತಿಲ್ಲೆ ಏವುದೂ ಬಿಟ್ಟು ಹೋದ್ಸು ಹೇಳಿ ಪಟ್ಟಿಲಿ. ನೇರಳೆಲಿ ಹಲವು ಬಗೆ ಇದ್ದಲ್ಲದೋ ನಕ್ಷತ್ರ ನೇರಳೆ , ಪನ್ನೇರಳೆ, ಜಂಬೂನೇರಳೆ …. , ಮತ್ತೆ ಚಿಕ್ಕು (ಅರೆ ಹಣ್ಣಾದ್ದಾಯೇಕು ಅಂಗಿಗೆ ಮೇಣ ಉದ್ದಿ ಕರೆ ಹಿಡುಶಲೆ), ಹೆಬ್ಬಲಸು, ರಾಜನೆಲ್ಲಿಕ್ಕಾಯಿ ಈ ಪಟ್ಟಿಲಿ ಸೇರ್ಸಲಕ್ಕೊ?!, ಕೆಲವು ಕಂಡುಮುಟ್ಟೆ ಮಕ್ಕೊ ಸುಬ್ರಾಯಜ್ಜನ ತೋಟಲಿದ್ದ ಕೊಕ್ಕ ಹಣ್ಣು , ಕಾಪಿ ಹಣ್ಣುಗಳನ್ನೂ, ಮತ್ತೆ ಆ ಪಾತ್ರ ತೊಳವಲೆ ಉಪಯೋಗುಸುತ್ತ ಹುಳಿಯನ್ನೂ (ಉಮ್ಮ ಹೆಸರು ನೆಂಪು ಬತ್ತಿಲ್ಲೆ) ಪಜಂಬುಗಡಪ್ಪ! ಇರ್ಲಿ., ಭಾವ ವಿಷಯ ಅಪ್ಪು ಸಂಗತಿ ಪಷ್ಟಾಯ್ದು ನಿಂಗೊ ಹೇಳಿದ್ದು ಹೇಳಿತ್ತು – ‘ಚೆನ್ನೈವಾಣಿ’

    1. ಅಪ್ಪಪ್ಪು, ನಕ್ಷತ್ರ ನೇರಳೆ, raajanellikkaayi, ಚಿಕ್ಕು… ಹ್ಮ್…
      ನೀರ್ಚಾಲು ಶಾಲೆಲಿ, ಟೀಚರಕ್ಕಳ ಹಳೇ ಸ್ಟಾಫುರೂಮಿನ ಎದುರು ನೆಡುವ೦ಗಳಲ್ಲಿ ಇತ್ತಿದ್ದ ಆ ರಾಜನಲ್ಲಿಕ್ಕಾಯಿ ಮರ ಈಗಳುದೆ ಇದ್ದೋ ಅಲ್ಲ ಆ ಹೈಸ್ಕೂಲು ಕಟ್ಟೋಣದ ಎದುರು ಇತ್ತಿದ್ದ ಹಳೇ ಕಹಿಬೇವಿನ ಮರದ ಗೆತಿಯೇ ಆಯಿದೋ ಎ೦ತ್ಸೋ..

      1. ಚೆನ್ನೈಭಾವಾ.. ಅಚ್ಚನಹಿ ಹೇಳಿ ಆರು ಹೇಳಿರೂ, ನಾವು ತಿಂದು ಆರೋಗ್ಯವಂತರಾಗಿ ಬೆಳದ್ದು, ಅಪೋ!
        { (ಇದಿನ್ನು ಆನೋ ಹೇದು ಕೇಳುತ್ಸು ಬೇಡ } – ಅಪ್ಪಪ್ಪು, ನಿಂಗಳೇ – ನಿಂಗಳೇ! 😉
        ಬೋಚಬಾವಂದೇ ಒಪ್ಪಿದ್ದ° ನಿಂಗಳೇ ಅದು!

        ~
        ಅದಾ, ಪೆರುವದಣ್ಣನ ಪಟ್ಟಿ ಬೆಳೆತ್ತಾ ಇದ್ದನ್ನೇ! ಆಗಲಿ, ಉಶಾರಿ.
        ಹಳತ್ತೆಲ್ಲ ಒಂದರಿ ನೆಂಪಾಗಲಿ 🙂

  24. ವಾವ್!!!!!!!!
    ಓದಲೆ ಸುರುಮಾಡಿಯಪ್ಪಗ ನಿ೦ಗೊ ಕು೦ಟಾ೦ಗಿಲ ಹಣ್ಣು, ಅಲ್ಲದ್ರೆ ಸರಳಿ ಹಣ್ಣನ್ನಾದರೂ ಬಿಟ್ಟಿಪ್ಪಿ, ಅದೂ ಅಲ್ಲದ್ರೆ ಜೇಡೆ ಹಣ್ಣು ಆದರೂ ಬಿಟ್ಟಿಪ್ಪಿ, ಆನು ಅದರ ಒಪ್ಪಲ್ಲಿ ಕೊಟ್ಟು ಉಶಾರಿ ಆಯೆಕು ಹೇಳಿ ಗ್ರೇಶಿದ್ದದು.. ಎಲ್ಲಿ೦ದ!!! ಒಪ್ಪಣ್ಣನ ಹತ್ತರೆಯೊ ನಮ್ಮ ಕಾರ್ಬಾರು!!???
    ಇದರ್ಲಿ ಕ೦ಬುಳಿ ಹಣ್ಣು ಕೇಳಿ ಕೂಡ ಗೊ೦ತಿಲ್ಲೆ ಎನಗೆ.
    ಚವಿ, ಕರಗಳಕಾಯಿ, ನೇರಳೆ, ಚಾಕೊಟೆ, ಇಷ್ಟರ ಕೇಳಿ ಮಾ೦ತ್ರ ಗೊ೦ತಿಪ್ಪದು.
    ಬಾಕಿ ಇಪ್ಪದರ ಎಲ್ಲ ಕ೦ಡಿದೆ, ತಿ೦ದಿದೆ. (ಕಣ್ಣಿ೦ಗೆ ಕ೦ಡ್ರೆ ತಿನ್ನದ್ದೆ ಬಿಡುಗೊ ನಾವು? 😉 )
    ಒಪ್ಪ೦ಗೊ ಒಪ್ಪಣ್ಣಾ..

    1. ಆನುದೆ ಹಾಂಗೆ ಎನಗೆ ಎಂತಾರೂ ಸೇರ್ಸುಲೆ ಸಿಕ್ಕುಗು ಗ್ರೇಶಿದ್ದೇ ಬಂತು. ಎಲ್ಲ ಒಪ್ಪಣ್ಣನ ಪಟ್ಟಿಲಿ ಸೇರಿದ್ದು ಈಗಲೇ.

    2. ಏ ಪೆರುವದಣ್ಣಾ ನಿಂಗೊಗೆ ಒಂದು ಧನ್ಯವಾದ ಹೇಳ್ತು ನಾವು ನಿನ್ನೆ ಸರಿಗಟ್ಟು ಬಯಲಿಂಗೆ ಇಳಿವಲೆ ಆತಿಲ್ಲೆ ಆದರೂ ನಮ್ಮ ಕೋಟವ ನವಗೇ ಒಳುಶಿದ್ದಕ್ಕೆ ಇದಾ ನಮ್ಮತ್ರೆ ಇಪ್ಪ ಪಟ್ಟಿಲಿ ಕೆಲವು ಇದ್ದಿದಾ
      ಚೇರೆ ಹಣ್ಣು – ಸರಳಿಸೊಪ್ಪಿಲಿ ಉದ್ದಿ ತಿಂತದು ಚೋಲಿ ತಿಂದಿಕ್ಕೆಡಿ ಇನ್ನು,
      ಅಂಬಟೆ,ನಾತಗುಲಾಬಿ – ಹಣ್ಣು, ನಾಣೀಲುಹಣ್ಣು, ನಾಣೀಲು ಹೂಗು ಅದರೆ ಬಿತ್ತು ಎಣ್ಣಗಾವುತ್ತು ಈಗ ಹೆರ್ಕಲೆ ಆರಿಂಗೆ ಪುರುಸೊತ್ತಿದ್ದು,ಪೇರಳೆ ಕೊಡಿ,ಕಾಯರ್ಪುಳಿ ಮುಳ್ಳಿನ ಎಲೆ,ಹೂಗು, ಮಜ್ಜಿಗೆ ಸೊಪ್ಪುದೇ ಆಗೆಡುವಿನ ಕಾಯಿಯುದೇ,ಬೆಲ್ಲಂತೊಟ್ಟು ಹೇಳುದುನಾವು ಇಜಿನಿ ಹೇಳುಗು ತುಳುವರು ಪೇಟೆಲಿ ಪಲಾವು ಸೊಪ್ಪು ಹೇಳುಗು, ಆಮರದ ಚೆಕ್ಕೆಯೂ ಗುದ್ದಿ ತೆಗದು ತಿಂಬಲಾವುತ್ತು, ಜಾರಿಗೆ ಹಣ್ಣು ಅರುಶಿನರುಶಿನ ಹುಳಿರುಚಿ, ಬಾಳೆ ಕುಂಡಿಗೆಯ ಚೀಪೆ,ನೆಕ್ಕರಿಕನ ಹಣ್ಣು, ಸೀಗೆಸೊಪ್ಪು,ಚೋರೆ ಮಾರ್ಗದ ಡಾಮಾರಿಂಗೆ ಹಾಕಿತಿಕ್ಕಿ ಚೋಲಿತೆಗದು ತಿಂಬ ಮಜಾವೇ ಬೇರೆಮಾರ್ನೇದಿನ ತೊಡಿ ಹುಣ್ಣಕ್ಕು ಎಲ್ಲಿಯಾರು ಸೊನೆ ಮುಟ್ಟಿರೆ, ಬೀಜದ ಹಣ್ಣು ,ಮಳೆಗಾಲಸುರೂವಿಗೆ ಹುಟ್ಟಿದ ಬೀಜ,ಬೊಂಬಾಯಿ ಹುಳಿ ಹೇಳಿ ಎಂಗೊಹೇಳುದು ಅದರ ನಿಜಹೆಸರು ನವಗೊಂತಿಲ್ಲೆ, ಕೆಂಪು ಹೂಗಿನಗಾಂಗೆ ಇರ್ತುಮದ್ಯಲ್ಲಿ ಕಾಯಿ ,ಅಂಜೂರ, ಅತ್ತಿಹಣ್ಣು ಹುಳುಇಲ್ಲದ್ದು ಹುಡುಕ್ಕಿ , ಕಡಲಪೇರಳೆ – ಅಂತೇಕನರು ಬೆಳದರೆ ಚೋಲಿಯ ಒಳ ಕರಟದ ಹಾಂಗೆ ಗಟ್ಟಿ ಆವುತ್ತು, ಉಂಡೆಹುಳಿ ಹಣ್ಣಾದ್ದು, ಆಟಿಹಂಪೆ- ಕಾರೆಕಾಯಿಯ ಹಾಂಗೇ ಇರ್ತು ದೊಡ್ಡಮರಲ್ಲಿ ಅಪ್ಪದು ಆಟಿತಿಂಗಳಿಲಿ ಅಪ್ಪಕಾರಣ ಆಯಿಕ್ಕು ಆಹೆಸರು,ಇನ್ನೂಕೆಲವೆಲ್ಲಾಇದ್ದು ಈಗ ನೆನಪು ಬತ್ತಿಲ್ಲೆ,ನೆನಪಪ್ಪಗ ಹೇಳುವೊ ಆತಾ….

      1. ಪೆರುವದಣ್ಣಾ, ಪ್ರೀತಿಯ ಒಪ್ಪಕ್ಕೆ ತುಂಬಾ ಒಪ್ಪಂಗೊ.
        ಶುದ್ದಿ ಓದಿಯಪ್ಪದ್ದೇ ಕೊಶೀಲಿ ಉತ್ತರ ಬರದು ಒಪ್ಪಣ್ಣಂಗೂ ಕೊಶಿ ಕೊಡುದು ನೋಡುವಗ ಸಂತೋಷ ಆವುತ್ತು.

        ಶೇಡಿಗುಮ್ಮೆ ಪುಳ್ಳೀ, ಅದಾ – ಒಪ್ಪಣ್ಣನ ಸಣ್ಣ ಪಟ್ಟಿಯ ತುಂಬ ದೊಡ್ಡಮಾಡಿದೆ ನೀನು!
        ಗಟ್ಟಿಗ° ಆತೋ? 🙂

        1. ಈ ಶೇಪು ಭಾವನತ್ರೆ ಎಡಿಯಪ್ಪಾ… ಆಡು ಮುಟ್ಟದ ಸೊಪ್ಪಿಲ್ಲ ಹೇಳ್ತ ಗಾದೆ ಇದ್ದಡೋ… ಹಾಂಗೆ ಈ ಭಾವ ತಿನ್ನದ್ದ ಕಾಯಿಗ ಇಲ್ಲೆಯೋಳಿ ತೋರ್ತು… ಹು ಹು ಹು 🙂

          1. ಕೆಪ್ಪಣ್ಣೋ,
            ನಾವು “ಕಾಸರ್ಕನ” ಕಾಯಿಯ ಇಷ್ಟರ ವರೆಗೆ ತಿಂದಿದಿಲ್ಲೆ ಆತೋ, 😉
            (ಆಡು ಮುಟ್ಟದ ಸೊಪ್ಪಿಲ್ಲ ಹೇಳ್ತ ಗಾದೆ ಇದ್ದಡೋ)- ಆಡುಸೋಗೆ ಹೇಳ್ತ ಸೊಪ್ಪಿನ ಆಡುಗಳೂ ತಿಂತವಿಲ್ಲೆಡಾ ಆತೋ ನೀನಿನ್ನು ತಿಂಬಲೆ ಹೆರಡೆಡಾ ರಣ ಕೈಕ್ಕೆ ಅದು, 🙁
            ಅದಪ್ಪು ನಿನ್ನ ಪಟಕ್ಕೆಂತ ಹೊಗೆಹಿಡುದ್ದು..! ಬೈಕಿಂಗೆ ಕಮ್ಮಿಲಿಸಿಕ್ಕುತ್ತೂದು ಚಿಮ್ಣೆಣ್ಣೆಯೋ ಮಣ್ಣ ಹಾಕಿದೆಯೋ ಹೇಂಗೆ…? 😉

Comments are closed.

ಒಪ್ಪಣ್ಣ
ದೇವಸ್ಯ ಮಾಣಿ
ಕಾವಿನಮೂಲೆ ಮಾಣಿ
ಅಕ್ಷರ°
ಅನಿತಾ ನರೇಶ್, ಮಂಚಿ
ಅನು ಉಡುಪುಮೂಲೆ
ಎಬಿ ಭಾವ
ಬಂಡಾಡಿ ಅಜ್ಜಿ
ಬಟ್ಟಮಾವ°
ಪುಣಚ ಡಾಕ್ಟ್ರು
ಮಾಲಕ್ಕ°
ಬೋಸ ಬಾವ
ಒಪ್ಪಣ್ಣ
Menu
×