Oppanna.com

ಹಳಸುವ ಮೊದಲು ಹಲಸಿನ ಬಳಶಿಗೊಳಿ..!

ಬರದೋರು :   ಒಪ್ಪಣ್ಣ    on   29/07/2011    56 ಒಪ್ಪಂಗೊ

ತರವಾಡುಮನೆ ರಂಗಮಾವನ ಶುದ್ದಿ ಎಷ್ಟು ಮಾತಾಡಿರೂ ಮುಗಿತ್ತಿಲ್ಲೆ.

ಅಟ್ಟಲ್ಲಿ ಹೇಮಾರ್ಸಿಮಡಗಿದ ಹಳೆಪಾತ್ರಂಗಳ ಅವು ಉದ್ದಿ ಮಡಗುತ್ತ ಸಮೆಯದ ಶುದ್ದಿ ಕಳುದವಾರ ನಾವು ಮಾತಾಡಿದ್ದು
ಅಲ್ಲಿದ್ದ ಎಲ್ಲಾ ಪಾತ್ರಂಗಳನ್ನೂ ಬೈಲಿನೋರು ಗುರ್ತ ಹಿಡುದು, ಕೆಲವು ಹೊಸ ಪಾತ್ರಂಗಳನ್ನೂ ತೋರುಸಿಕೊಟ್ಟವು.
ಕೆಲವು ಪಾತ್ರಂಗೊ ಹೇಳುಲೆ ಬಿಟ್ಟು ಹೋದ್ದಕ್ಕೆ ಬಂಡಾಡಿಅಜ್ಜಿ ಪರಂಚಿಯೂ ಆತು!
ಎಷ್ಟಾರೂ, ಅಜ್ಯಕ್ಕೊಗೆ ಗೊಂತಿಪ್ಪಟ್ಟು ನವಗೆ ಅರಡಿಯಲೆ ಎಡಿಗೋ!!

~
ಈಗ ಮಳೆಗಾಲ. ಈ ಹಿಂದೆಯೇ ಸುರು ಆಗಿ ಆಟಿ ಒರೆಂಗೂ ಎತ್ತಿ ಆತು.
ಎಲ್ಲಿನೋಡಿರೂ ಮಳೆಯ ಶೆಬ್ದ. ಮಳೆ ಶೆಬ್ದಕ್ಕೆ ಮಧುರ ನೆಂಪುಗೊ ಬಂದರೆ ಎಷ್ಟು ಚೆಂದ, ಅಲ್ಲದೋ?
ದೂರಲ್ಲಿ ಕಲಿಯಲೆ ಹೋದ – ಕಳುದೊರಿಶ ಒರೆಂಗೆ ಮನೆಲೇ ಇದ್ದ – ಮಗನ ಗ್ರೇಶಿರೆ ಸುಬಗಣ್ಣನ ಮನೆದೇವರಿಂಗೆ ಮಳೆಬಕ್ಕು ಒಂದೊಂದರಿ!
ಕೃಷಿಯ ಲೆಕ್ಕಾಚಾರದ ಸುಬಗಣ್ಣಂಗೆ ಈಗ ರಜಾ ಪುರುಸೊತ್ತು;  ಅಡಕ್ಕಗೆ ರಜ್ಜ ಜಾಸ್ತಿ ಆದ್ದುದೇ ಪುರುಸೊತ್ತಿಂಗೆ ಕೊಶಿಕೊಟ್ಟತ್ತು.
ಚೆನ್ನೈಬಾವನ ಹಾಂಗೆ ಮೊಬೈಲು ಕುಟ್ಟುತ್ತವಕ್ಕೆ ಶೋಬಕ್ಕ ಕರೆಂಟು ಕೊಡದ್ದೆ ಮಾ ಉಪದ್ರ ಮಾಡಿಹಾಕಿದ್ದಡ.
ಕರೆಂಟಿಲ್ಲದ್ದರೆ ಮೀಯಲೆ ನೀರು ಬೆಶಿ ಆವುತ್ತಿಲ್ಲೆ – ಹೇಳ್ತ ಕಾರಣಲ್ಲಿ ಅಜ್ಜಕಾನಬಾವ ನಿತ್ಯವೂ ಎಡಪ್ಪಾಡಿಗೆ ಹೋಗಿ ಉದಿಯಪ್ಪಗಾಣ ತಿಂಡಿ ಮುಗುಶಿಕ್ಕಿ ಬಪ್ಪದು!
ಸುವರ್ಣಿನಿ ಅಕ್ಕ° ಹಪ್ಪಳ ಸುಟ್ಟಾಕುವಗ ಕರೆಂಟು ಹೋಗಿ, ಹೊತ್ತಿದ ಪರಿಮ್ಮಳ ಬಂದಪ್ಪಗಳೇ ಗೊಂತಾದ್ದಡ!
ಪುತ್ತೂರಿನ ಪುಟ್ಟಕ್ಕ° ತಾಡುನ ಪೆತ್ತ ಬಂತು ಹೇಳಿಗೊಂಡು ಹಾಮಾಸು ಹಿಡುದ ಸಂಕಲ್ಲಿ ಓಡ್ಳೆ ಹೆರಟು ಗಡಿಬಿಡಿ ಆಯಿದಡ!
ಮದಲೇ ಚಳಿ, ಅದರ ಮೇಗಂದ ಬಂಡಾಡಿಅಜ್ಜಿ ಮಾಡಿಕೊಟ್ಟ ಮಜ್ಜಿಗೆಗೊಜ್ಜಿ ಉಂಡು ಶರ್ಮಪ್ಪಚ್ಚಿಗೆ ಶೀತ ಸುರು ಆಯಿದಡ!!
ಅದೇನೇ ಇರಳಿ, ಮಳೆಗಾಲ ಹೇಳಿರೆ ಹಾಂಗೇ ಅಲ್ಲದೋ?

~

ತರಾವಳಿ ನೆಟ್ಟಿ ತರಕಾರಿಗೊ ಈಗ ಕಮ್ಮಿ ಆದ ಕಾರಣ ಅಡಿಗೆಲಿ ವೈವಿಧ್ಯಂಗೊ ಕಮ್ಮಿ.
ಈಗೀಗ ಬಜಾರಿಲಿಯೋ, ಬಿಗ್ಗುಬಜಾರಿಲಿಯೋ ಮಣ್ಣ ಸಿಕ್ಕುಗು, ಆದರೆ ಮದಲಿಂಗೆ ಕಮ್ಮಿ.
ಹೀಂಗಿಪ್ಪಗ, ಏನಾರು ಪುನರ್ಪುಳಿ ಓಡಿನ ಸಾರೋ, ನೀರುಮಾವಿನಕಾಯಿ ಗೊಜ್ಜಿ – ಹೀಂಗಿರ್ತರ ಮಾಡಿ ಬಳುಸುಗು ಮನೆಲಿ.
ಅದರೊಟ್ಟಿಂಗೆ ಬಹೂಪಯೋಗಿ ಮಿತ್ರ ಒಂದು ಸಿಕ್ಕುತ್ತು – ಅದೇವದು? ಅದುವೇ ಹಲಸಿನಾಯಿ!

ಇದು ಬೆಂದಿಮಾಡ್ಳೆ ತರಕಾರಿಯೂ ಅಪ್ಪು, ಚೀಪ್ಸಿನ ಹಾಂಗಿರ್ತದು ಮಾಡೇಕಾರೆ ಅದಕ್ಕಪ್ಪದೂ ಅಪ್ಪು – ಅಂತೇ ತಿಂಬಲೆ ಹಣ್ಣೂ ಅಪ್ಪು!
ಹೆಚ್ಚಿನ ಮನೆಲಿಯೂ ಇದರ ಬಹೂಪಯೋಗ ಇದ್ದೇ ಇದ್ದು.
ಮಳೆಗಾಲಲ್ಲಿ ಸುಬಗಣ್ಣನ ಮನೆದೇವರಿಂಗೇ ಇದು ಮನೆದೇವರು – ಹೇಳಿರೆ ಅರ್ತ ಮಾಡಿಗೊಳ್ಳಿ ನಿಂಗೊ; ಹೆಮ್ಮಕ್ಕೊಗೆ ಇದು ಎಷ್ಟು ಉಪಕಾರಿ ಹೇಳಿಗೊಂಡು!!
ಅಂಬಗ, ಹಲಸಿನ ಬಹೂಪಯೋಗದ ಬಗ್ಗೆ ಈ ವಾರ ಶುದ್ದಿ ಮಾತಾಡುವನೋ?!
~

ದೊಡ್ಡಬಾವನ ದೊಡ್ಡ ತೋಟದ ತಲೇಲಿ ಒಂದು ದೊಡ್ಡ ಹಲಸಿನ ಮರ ಇದ್ದು; ಎಲ್ಲೋರಿಂಗೂ ಅರಡಿವದೇ ಅದು.
ಅದೊಂದು ವಿಶಿಷ್ಟ ಜಾತಿಯ ಮರ. ದೊಡ್ಡಮಾವ “ತಲೆಂಬಾಡಿ” ಹೇಳ್ತವು ಅದರ. ತೋಟದ ತಲೇಲಿ ಇರ್ತದಕ್ಕೆ ಹಾಂಗೆ ಹೇಳ್ತದೋ, ಅಲ್ಲಲ್ಲ, ಅದರ ಮೂಲ ಊರಿನ ಹೆಸರೋ; ಉಮ್ಮಪ್ಪ!
ದೊಡ್ಡಮಾವ° ಹೇಳಿದಹಾಂಗೆ ದೊಡ್ಡಬಾವ° ಹೇಳುದು; ದೊಡ್ಡಬಾವ° ಹೇಳಿದ ಹಾಂಗೆ ದೊಡ್ಡಳಿಯ ಹೇಳುಗು ಮುಂದಕ್ಕೆ. ಅದಿರಳಿ, ಹೆಸರು ಮುಖ್ಯ ಅಲ್ಲ – ರುಚಿ ಮುಖ್ಯ. 😛
ಅಪ್ಪು, ಆ ಮರದ ವಿಶೇಷ ಎಂತರ ಹೇಳಿರೆ, ಹಣ್ಣು ತುಂಬ ಪರಿಮ್ಮಳ, ತುಂಬಾ ಸೀವು!

ಈ ಒರಿಶ ಅದರ್ಲಿ ಗುಜ್ಜೆ ಬಿಟ್ಟದರ ನೋಡಿ ಅಂದೇ ದೊಡ್ಡಬಾವ° ಸಮೋಸ ಕಳುಗಿದ್ದ – ಹೀಂಗೀಂಗೆ ಹೇಳಿಗೊಂಡು.
ಅದು ಯೇವ ಸಮೆಯಕ್ಕೆ ಬೆಳಗು ಹೇಳ್ತರ ಅಜ್ಜಕಾನಬಾವ° ಲೆಕ್ಕ ಹಾಕಿ ಮಡಗಿತ್ತಿದ್ದ! ಅವ ಲೆಕ್ಕ ಹಾಕಿ ಮಡಗಿರೆ ಎಂತ ಗುಣ; ಕೊಯಿವಲಪ್ಪಗ ಕೈಗೆ ಸಿಕ್ಕದ್ದರೆ!
ಕೆಳಂಗೆ ಎತ್ತುತ್ತದರ ಎಲ್ಲ ದೊಡ್ಡಬಾವನ ದೊಡ್ಡ ಕೊಕ್ಕೆಲಿ ಬಲುಗಿ (ಎಳದು) ಕೊಯಿದು ಆಗಿತ್ತು. ಸುಮಾರು ಬಗೆ ಮಾಡಿ ಮುಗುಶಿಯೂ ಆಗಿತ್ತು.
ಮೇಗಾಣ ಕೊಬೆಲಿ ಇರ್ತ ಹಲಸಿನಣ್ಣು ಬಾಕಿ ಒಳುದಿತ್ತಿದಾ, ಅದರ ಕೊಯ್ವಲೆ ಜೆನ ಏರ್ಪಾಡು ಆಗಿಂಡಿತ್ತಿಲ್ಲೆ ದೊಡ್ಡಬಾವಂಗೆ.

ಕಳುದವಾರ ಸುಬಗಣ್ಣ ಒಯಿವಾಟಿಲಿ ಕೆಣುದ ಕತೆ ಗೊಂತಿದ್ದಲ್ಲದೋ?
ಅವರ ಮನೆದೇವರು ಅಪ್ಪನಮನೆಗೆ ಹೋಗಿಪ್ಪಾಗಳೇ ಸುಂದರ ಮದ್ದುಬಿಡ್ಳೆ ಬಂದದು. ಹೇಂಗೂ ಅಡಕ್ಕೆಮರಕ್ಕೆ ಹತ್ತುತ್ತನ್ನೆ, ಬರಿಕ್ಕೆಯ ಎರಡು ಹಲಸ್ನಾಯಿ ಎಳದು ಹಾಕು ಮಾರಾಯ – ಹೇಳಿದವು.
ಹಾಂಗೆ ಬೆದುರ ಕೊಕ್ಕೆಗೆ ಮನೆದೇವರು ಹುಲ್ಲುಕೆರಸುತ್ತ ಕತ್ತಿಯ ಕಟ್ಟಿ ಸುಬಗಣ್ಣ ಸುಂದರನ ಕೈಗೆ ಎತ್ತುಸಿದವು.
ಸುಂದರಂಗೆ ಕುಡುದಿಪ್ಪಗ ಮಾಂತ್ರ ಸರಿ ಕಾಂಬದು; ಅಲ್ಲದ್ದರೆ ಎರಡೆರಡು ಕಾಣ್ತು.
ಹಾಂಗೆ ಗೆಲ್ಲಿಲಿ ಇರ್ತ ಹಲಸಿನಾಯಿ ಎರಡೆರಡು ಕಂಡತ್ತು; ಸುಬಗಣ್ಣನ ಕೊಕ್ಕೆಯ ಎರಡ್ಣೇದಕ್ಕೆ ಹಾಕಿ ಬಲುಗಿತ್ತು. ಉಹೂಂ! ಬಯಿಂದೇ ಇಲ್ಲೆ.
ಚೆಲ, ಹಲಸಿನಾಯಿ ತೊಟ್ಟು ಇಷ್ಟು ಗಟ್ಟಿ ಇದ್ದೋ – ತ್ರಾಣ ಪೂರ ಹಾಕಿ ಇನ್ನೊಂದರಿ ಬಲುಗಿತ್ತು.  ಕೊಕ್ಕೆಯ ಕಡೆ ಸುಂದರನ ಕೈಲಿ, ಕತ್ತಿ ಕಟ್ಟಿದ ಕೊಡಿ ಗೆಲ್ಲಿಲೇ ಬಾಕಿ.
ಸುಬಗಣ್ಣ ಕಣ್ಣಡ್ಕ ಮಡಗಿ ನೋಡಿಯಪ್ಪಗ ಗೊಂತಾತು, ಸುಂದರಂಗೆ ಎರಡೆರಡು ಕಂಡದರ್ಲಿ ಕೊಕ್ಕೆ ಹಾಕಿದ್ದು ಗೆಲ್ಲಿನ ಬುಡಕ್ಕೆ.
(ಓಯ್, ಒಪ್ಪಣ್ಣಂಗೆ ಲೊಟ್ಟೆ ಅರಡಿಯ. ಇದಾ, ಶ್ರೀಅಕ್ಕನ ಗುಜ್ಜೆಬಿರಿಯಾಣಿ ಶುದ್ದಿಯ ಒಪ್ಪಲ್ಲಿ ಇದೇ ಮಾತುಕತೆ ಆಯಿದು – ನೋಡಿಕ್ಕಿ.)
ಅದಿರಳಿ.
ಈ ಸಂಗತಿ ದೊಡ್ಡಬಾವಂಗೆ ಮದಲೇ ಗೊಂತಾದ್ದ ಕಾರಣ, ದೊಡ್ಡಬಾವನಲ್ಲಿ ಹಲಸಿನಾಯಿ ತೆಗವಲಿದ್ದು ಹೇಳ್ತ ಸಂಗತಿ ಸುಬಗಣ್ಣಂಗೆ ಹೇಳಿದ್ದವೇ ಇಲ್ಲೆ, ಬಚಾವ್!
ಅಪ್ಪು, ಹಾಂಗೆಲ್ಲ ಪ್ರಯೋಗ ಮಾಡ್ಳೆ ಹೆರಟ್ರೆ ಆಗ; ಇಪ್ಪದೇ ಒಂದು ಕೊಕ್ಕೆ! ದೊಡ್ಡಕ್ಕ° ಅಪ್ಪನಮನಗೆ ಹೋಯಿದವಿಲ್ಲೆ ಇದಾ! 😉
ಅದಕ್ಕೇ ದೊಡ್ಡಜಾಲಿಲಿ ಬಾಕಿ ಆದ ಸುಬಗಣ್ಣನ ಮನೆದೇವರ ಮೆಟ್ಟಿನಜೋಡಿನ ಉಪಾಯಲ್ಲಿ ದೊಡ್ಡತ್ತಿಗೆ ಕೈಲಿ ಕೊಟ್ಟು ಕಳುಗಿದ್ದು.
(ಓ, ಆ ಸಂಗತಿ ಗೊಂತಿಲ್ಲೆ ಅಲ್ಲದೋ? ಬೈಲಿಲಿ ಆ ಬಗ್ಗೆ ನಿದಾನಕ್ಕೆ ಶುದ್ದಿಹೇಳುಗು ಆರಾರು!)
~

ಎಯ್ಯೂರುಭಾವ° ಮೊನ್ನೆ ಸೂರಂಬೈಲಿಂದ ಮನೆಗೆ ಹೋಪಗ, ದೊಡ್ಡಬಾವನ ಮನಗೆ ಆಗಿಂಡು ಬಂದದು.
– ಎಯ್ಯೂರುಬಾವಂಗೆ ಕೃಷಿ ಅರಡಿಗು; ಕೃಷಿಯ ವಿಚಾರದ ಎಲ್ಲಾ ಕೆಲಸಂಗಳೂ ಅರಡಿಗು.
ನೆರೆಕರೆಯೋರಿಂಗೆ ಸ್ಪೂರ್ತಿ ಕೊಡ್ತ ವೆಗ್ತಿತ್ವ ಅವರದ್ದು. ಅವರ ಬಗ್ಗೆಯೇ ಇನ್ನೊಂದರಿ ಮಾತಾಡುವೊ. ಆಗದೋ?
ದೊಡ್ಡಬಾವಂಗೆ ಗೊಂತಿದ್ದ ಮಟ್ಟಿಂಗೆ ಅವರ ಮನೆಲಿ ಕೊಕ್ಕೆ ತುಂಡಾದ ಬಗ್ಗೆ ಘಟನೆ ಎಂತ್ಸೂ ಆಯಿದಿಲ್ಲೆ.
ಹಾಂಗಾಗಿ ಸುಬಗಣ್ಣನ ಬದಲು ಎಯ್ಯೂರುಬಾವನ ಹತ್ತರೇ ಹೇಳಿಕ್ಕುವೊ°- ಹೇಳಿ ದೊಡ್ಡಬಾವ° ನಿಗಂಟು ಮಾಡಿದವು. 😉
ಮೊನ್ನೆ ಬಂದಿಪ್ಪಗ ಹೇಳಿದವುದೇ!
ಅದಕ್ಕೆಂತಾಯೆಕ್ಕು, ಹೇಳಿ ರಪರಪನೆ ಮರಕ್ಕೆ ಹತ್ತಿ ಮರದ ಕೊಡಿಲಿ ಇದ್ದ ನಾಕು ಹಲಸಿನಾಯಿಯ ಎಳದು ಹಾಕಿದವು.
ಅದರ್ಲಿ ಎರಡು ಕಾಯಿ, ಎರಡು ಅರೆಹಣ್ಣು!
~
ಮೊನ್ನೆ ಒಪ್ಪಣ್ಣ ಬೈಲಿಲೇ ನೆಡಕ್ಕೊಂಡು ದೊಡ್ಡಜಾಲಿಂಗೆ ಎತ್ತುವಗ ದೊಡ್ಡ ಮೆಟ್ಟುಕತ್ತಿಯ ಮಡಿಕ್ಕೊಂಡು ದೊಡ್ಡಬಾವ° ಕೂಯಿದ.
ದೊಡ್ಡಳಿಯ ಪಕ್ಕನೆ ಕೈ ಹಾಕಿಕ್ಕದ್ದ ಹಾಂಗೆ ನೋಡಿಗೊಂಬಲೆ ದೊಡ್ಡಮಾವಂದೇ ಕೂದಿತ್ತಿದ್ದವು.
ಗಡಿಮಾಡಿ ಹಾಕಿದ ಸೊಳೆಯ ಆದು ಹಾಕಲೆ ಎದುರೇ ಕೂದುಗೊಂಡಿದವು ದೊಡ್ಡತ್ತೆ ದೊಡ್ಡಕ್ಕ°!
ಸ್ವಕಾರ್ಯವೂ ಆವುತ್ತು – ಹೇಳಿಗೊಂಡು ನಾವುದೇ ಸೇರಿಗೊಂಡತ್ತು. ಸುರುವಿಂಗೆ ಹತ್ತನ್ನೆರಡು ನಿಮಿಶ ದೊಡ್ಡಳಿಯನ ಕೈಲೇ ಮಾತಾಡಿ ಆತು.
ಮತ್ತೆ ಮೆಲ್ಲಂಗೆ ದೊಡ್ಡವರ ಕೈಲಿ ಮಾತಾಡ್ಳೆ ಸುರು.
ದೊಡ್ಡಕ್ಕಂಗೆ ನಾಳ್ತಿಂಗೆ ಅಪ್ಪನ ಮನೆಗೆ ಹೋಪಲಿದ್ದಾಡ – ಆಟಿಯ ಲೆಕ್ಕಲ್ಲಿ!
ಈ ಸರ್ತಿ ದೊಡ್ಡಬಾವಂಗೆ ಪುರುಸೊತ್ತಿಲ್ಲದ್ದ ಕಾರಣ ದೊಡ್ಡಳಿಯನೇ ಕರಕ್ಕೊಂಡು ಹೋಪದಡ.
ದೊಡ್ಡಬಾವಂಗೆ ನಾಳಂಗೆ ತೆಂಕ್ಲಾಗಿ ಹೋಪಲೆ ಇದ್ದಾಡ. ಎಂತದೋ ಪಾಟಪುಸ್ತಕದ ವಿಶಯ – ಹೀಂಗೆಲ್ಲ ಮಾತುಕತೆ ನೆಡಕ್ಕೊಂಡು ಇದ್ದತ್ತು.
~

ಸೊಳೆ ಆದಾಕಿದಷ್ಟೂ ಮುಗುದ್ದಿಲ್ಲೆ! ಒಂದಲ್ಲ, ಎರಡಲ್ಲ – ನಾಕಿದ್ದತ್ತು ಹಲಸ್ನಾಯಿ.
ಹೀಂಗೆ ಎಲ್ಲ ಒಂದೇ ದಿನ ಎಳದು ಹಾಕಿರೆ ಎಂತರ ಮಾಡ್ಸು – ಕೇಳಿದೆ.
ಹಲಸಿನಕಾಯಿಲಿ ಎಲ್ಲವೂ ಮಾಡ್ಳಾವುತ್ತು; ಎಂತರ ಮಾಡ್ಳಾವುತ್ತಿಲ್ಲೆ?– ಹೇಳಿದ ದೊಡ್ಡಬಾವ°.
ಹಲಸ್ನಾಯಿಲಿ ನಾನಾನಮುನೆ ಬಗೆಗೊ ಮಾಡ್ಳಾವುತ್ತು. ಅದು ಬೈಲಿಲಿ ಎಲ್ಲೋರಿಂಗೂ ಗೊಂತಿಪ್ಪದೇ.
ಆದರೂ – ಮಾತಿಂಗಾತು ಹೇಳಿಗೊಂಡು ಮಾತುಮುಂದುವರುಸಿದೆ.
ಈ ವಾರಕ್ಕೆ ಅದೇ ಶುದ್ದಿಮಾತಾಡುವೊ ಹೇಳಿಗೊಂಡು –  ಅಂಬಗ ದೊಡ್ಡಬಾವಾ; ಹಲಸಿನಕಾಯಿಲಿ ಎಂತೆಲ್ಲ ಮಾಡ್ಳಾವುತ್ತು ಹೇಳ್ತರ ಒಂದು ಪಟ್ಟಿಮಾಡುವನೋ – ಕೇಳಿದೆ.
ಸಮೋಸಕಳುಗುವಗ ಆದರೆ ದೊಡ್ಡಬಾವ° ಮಾತಾಡ°, ಈಗ ಮೊಬಯಿಲು ಮುಟ್ಟಿಕ್ಕಲೆ ಎಡಿಯ, ಕೈಲಿ ಇಡೀ ಮೇಣ ಇದ್ದು!
ಹಾಂಗಾಗಿ ಲೋಕಾಭಿರಾಮ ಮಾತಾಡ್ಸಕ್ಕೆ ತೊಂದರೆ ಇಲ್ಲೆ ಇದಾ!
~
ಹಾಂಗೆ ಪಟ್ಟಿ ಸುರು ಆತು.
ಎಡೆಡೆಲಿ ದೊಡ್ಡತ್ತೆ, ದೊಡ್ಡಕ್ಕ° ಸ್ವಾನುಭವಂದ ಕೆಲವು ತಿಂಡಿಗಳ ನೆಂಪುಮಾಡಿದವು. ಒಂದೊಂದರಿ ದೊಡ್ಡಮಾವನೇ ಸ್ವತಃ ಅಡಿಗೆ ಮಾಡ್ಳಿದ್ದು, ಆಸಕ್ತಿ ಎಳಗಿರೆ!
ಹಾಂಗಾಗಿ, ಎಲ್ಲೋರೂ ಸೇರಿ ರಜ್ಜ ಹೊತ್ತಿಲಿ ದೊಡ್ಡಪಟ್ಟಿ ಇಷ್ಟುದ್ದ ಆತು.
ಸೊಳೆಮುಗಿವಗ ಪಟ್ಟಿಯೂ ಮುಗುದ್ದು.

ಹಲಸ್ನಾಯಿ ಇನ್ನೂ ಸೀವು ಹಿಡಿಯೇಕಟ್ಟೆ ಹೇಳುವ ಚೆಪ್ಪೆಯ ಸಮೆಯಲ್ಲಿ ಖಾರದ ಬಗೆಗಳ ಮಾಡ್ಳಾವುತ್ತು.
ಒಂದರಿ ಅದರ ಸ್ವಾಭಾವಿಕ ಸೀವು ತೆಕ್ಕೊಂಡ ಮತ್ತೆ ಚೀಪೆಗಳ ಮಾಡ್ಳಾವುತ್ತು.
ಹಾಂಗಾಗಿ ಹಲಸ್ನಾಯಿ ಬಗೆಗಳ ಪಟ್ಟಿಮಾಡುವಗ ಎರಡು ಬೇರೆಬೇರೆ ಗೀಟು ಸುರುವಿಂಗೇ ಹಾಯೇಕಾವುತ್ತು – ಹೇಳಿದ ದೊಡ್ಡಬಾವ°.
ಎಷ್ಟಾರೂ ಮಾಷ್ಟ್ರ° ಅಲ್ಲದೋ – ಗೀಟು, ಗೆರೆಪೆಟ್ಟಿಗೆ, ಮಾರ್ಜಿನು ಎಲ್ಲ ನಾಲಗೆಕೊಡಿಲಿ ಇರ್ತು! 😉
~

ಹಲಸಿನಕಾಯಿಲಿ ಮಾಡ್ಳಾವುತ್ತ ಬಗೆಗಳ ಒಂದೊಂದೇ ನೆಂಪುಮಾಡಿಗೊಂಡು, ಪಟ್ಟಿ ದೊಡ್ಡ ಆತು.

ಕೆಲವು ಎಂಗೊಗೆ ಬಿಟ್ಟು ಹೋದ್ಸರ ದೊಡ್ಡತ್ತೆ, ದೊಡ್ಡಕ್ಕ° ನೆಂಪುಮಾಡಿದವು.
ಅಲ್ಲಿ ನೆಂಪಾದ ಹೆಚ್ಚಿಂದರನ್ನೂ ನೆಂಪುಮಡಾಗಿ ಬೈಲಿಂಗೆ ಹೇಳ್ತಾ ಇದ್ದೆ. ಪಕ್ಕನೆ ಬಿಟ್ಟುಹೋಗಿದ್ದರೆ ನಿಂಗೊ ನೆಂಪುಮಾಡಿಕ್ಕಿ ಆತೋ, ಬಂಡಾಡಿಅಜ್ಜಿ ನೋಡಿ ಪರಂಚುವ ಮದಲೇ ಬರ್ತಿಮಾಡಿಗೊಂಬೊ! 😉

ಕುಜುವೆ:

ಹಲಸ್ನಾಯಿ ಬೆಳೇಕಾರೆ ಮದಲೇ ಅದರ ಬಗೆಗಳ ಅವಕಾಶ ಸುರು ಆವುತ್ತು. ಎಳೆಹಲಸಿನ ಕಾಯಿಯ ಕುಜುವೆ ಹೇಳುದು.  – ಬಟ್ಯ ತುಳುವಿಲಿ ಇದನ್ನೇ ಗುಜ್ಜೆ ಹೇಳುಗು.
ಹಲಸಿನಕಾಯಿ ಬೆಳದ ಮತ್ತೆ ಸೊಳೆಬೇರೆ, ಹಾರೆ ಬೇರೆ, ಪಂಚಸಾರೆ ಬೇರೆ – ಎಲ್ಲ ಲೆಕ್ಕ ಇರ್ತು. ಆದರೆ ಎಳತ್ತರ್ಲಿ ಎಂತ ವಿತ್ಯಾಸ?
ಹೆರಾಣ ಮುಳ್ಳು ಹೋಪಷ್ಟು ಕೊರದತ್ತು, ಒಳುದ್ದರ ಒಟ್ಟಿಂಗೆ ಹಾಕಿ ಬೆಂದಿಂಗೆ ಮಡಗಿತ್ತು! ಮಾಷ್ಟ್ರಮನೆ ಅತ್ತೆ ಇದರ ’ಸಮೂಲ’ ಕೊರವದು ಹೇಳುಗು.

ಕುಜುವೆ ತಾಳು:
ಕೊರದ ಕುಜುವೆಯ ಒಂದು ಒಗ್ಗರಣೆ ಹಾಕಿ, ಉಪ್ಪುಮೆಣಸು ಹಾಕಿ, ಬೇಶಲೆ ಮಡಗಿರೆ ಒಂದು ಗಳಿಗೆಲಿ ಕುಜುವೆ ತಾಳು ತೆಯಾರಿ!!
ಒಳ್ಳೆ ಬೆಶಿಬೆಶಿ ಅಶನಕ್ಕೆ ಎಣ್ಣೆಯ ಒಟ್ಟಿಂಗೆ ಕೂಡಿಂಡು ಉಂಬಲೆ ಇದು ಹೇಳಿ ಮಾಡುಸಿದ ಖಾದ್ಯ!
ಪಾರೆ ಮಗುಮಾವನಲ್ಲಿ ಕುಜುವೆ ಬಾಡಿ ಬಿದ್ದರೆ, ಮೇಗಾಣ ಹಣ್ಣು ತೆಗವಗ ಬಿದ್ದರೆ ಮಣ್ಣ ಮರದಿನ ಕುಜುವೆ ತಾಳು ಖಂಡಿತ.

ಬೇಳೆಚೆಕ್ಕೆ ಬೆಂದಿ:
ಕೊರದು ಮಡಗಿದ ಕುಜುವೆಯ ಲಾಯಿಕ ಬೇಶಿ, ಬೆಂದಿ ಅರಪ್ಪಿಂಗೆ ಹಾಕಿರೆ ಬೇಳೆಚೆಕ್ಕೆ ಬೆಂದಿ ಆತು.
ಅರೆ ಬೆಳದ ಬೇಳೆಯೂ ಇರೇಕು, ಕುಜುವೆಯೂ ಇರೆಕ್ಕು, ಚೆಕ್ಕೆಯೂ ಇರೇಕು – ಎಲ್ಲ ಒಟ್ಟಿಂಗೆ ಇಪ್ಪ ಕೊದಿಲೇ ಅಲ್ಲದೋ ಬೇಳೆಚೆಕ್ಕೆ ಬೆಂದಿ.

ಹಲಸಿನ ಕಾಯಿ:

ಕುಜುವೆ ರಜಾ ಬೆಳದರೆ ಮತ್ತೆ ಹೊದುಂಕುಳು ಗಟ್ಟಿಗಟ್ಟಿ ಆಗಿರ್ತು.  ಇಡೀ ಒಟ್ಟಿಂಗೆ ಹಾಕಿ ಬೇಶಿರೆ ತಿಂಬಗ ಹೊದುಂಕುಳು ತುಂಡೇ ಸಿಕ್ಕುಗಟ್ಟೆ.
ಮತ್ತೆ, ಕಲ್ಮಡ್ಕ ಅನಂತಂಗೆ ಹಾತೆ ಮಾಡ್ಳೂ ಹೊದುಂಕುಳು ಸಿಕ್ಕ!
ಹಾಂಗಾಗಿ, ಹಲಸಿನಾಯಿಲಿ ಮಾಡ್ಳೆ ಬೇರೆಯೇ ಬಗೆಗೊ ಇದ್ದು. ಲಾಯಿಕಲ್ಲಿ ಕೊರದು ಸೊಳೆಗಳ ತೆಗದರೆ ಸುಮಾರು ಬಗೆ ಮಾಡ್ಳಾವುತ್ತು.

ಸೊಳೆ ಹೊರುದ್ದು
ಹಲಸಿನಕಾಯಿಯ ಸೊಳೆಯ ಒಳಾಣ ಬೇಳೆಯ ಮದಾಲು ತೆಗದಿಕ್ಕುದು.
ಬಿಡುಸಿದ ಸೊಳೆಯ ನೀಟನೀಟಕೆ ಕೊರೆತ್ತದು.
ಮತ್ತೆ ಲಾಯಿಕದ ತೆಂಗಿನೆಣ್ಣೆಯ ಬಾಣಲೆಗೆ ಹಾಕಿ ಕಾಸಿತ್ತು. ಕಾದ ತೆಂಗಿನೆಣ್ಣಗೆ ಕೊರದ ಸೊಳೆತುಂಡುಗಳ ಹಾಕುತ್ತದು.
ಕೊರವದು ಹೇಂಗೆ? – ಒಂದೇ ದಪ್ಪಕೆ ಕೊರೇಕು. ಅಲ್ಲದ್ದರೆ ಒಂದು ಎಣ್ಣೆಲಿ ಕರಂಚುವಗ, ಇನ್ನೊಂದು ಬೇಯ್ತಷ್ಟೆ. ಹಾಂಗಾಗಿ, ಒಂದೇ ನಮುನೆ ಕೊರೇಕು.
ಮತ್ತೆ ನಿಂಗೊಗೆ ಸರಿಯಾಗಿ ತಿಳಿಯೆಕ್ಕಾರೆ ಸುಬಗಣ್ಣನ ಸಂಪರ್ಕ ಮಾಡ್ಳಕ್ಕು. ಸ್ವಾನುಭವಲ್ಲಿ ವಿವರ್ಸುದು ನವಗೆ ಹೆಚ್ಚು ಅರ್ಥ ಅಪ್ಪದಿದಾ. 😉
ಕೊರವಲೆ ಎಷ್ಟು ಹೊತ್ತು ಬೇಕೋ, ಹೊರಿವಲೂ ಅಷ್ಟೇ ಹೊತ್ತು ಬೇಕು.
ಒಂದು ಬಾಣಲೆ ಸೊಳೆಹೊರಿಯೇಕಾರೆ, ಹೊತ್ತೋಪಗ ಸುರುಮಾಡಿರೆ, ನೆಡುಇರುಳು ಒರೆಂಗೆ ಆವುತ್ತಡ; ಶಾಂತತ್ತೆ ಹೇಳಿತ್ತಿದ್ದವು.

ಹಲಸಿನ ಕಾಯಿ ತಾಳು
ಇದೇ ಹಲಸಿನಕಾಯಿಯ ಆಗಾಣ ಗುಜ್ಜೆ ಒಗ್ಗರಣೆ ಹಾಕಿದ ನಮುನೆ ಒಗ್ಗರಣೆ ಹಾಕಿರೆ ಹಲಸಿನಕಾಯಿ ತಾಳುದೇ ತೆಯಾರು.
ಹೊಟ್ಟೆಶುದ್ದಿಗೆ ಇದು ಭಾರೀ ಒಳ್ಳೆದಾಡ, ಚೌಕ್ಕಾರುಮಾವ° ಹೇಳುಗು.
ಮಾಡ್ಳೂ ಸುಲಾಬ ಹೇಳಿಗೊಂಡು, ಹಲಸ್ನಾಯಿ ಸಮೆಯಲ್ಲಿ ಇದೊಂದು ಇದ್ದೇ ಇಕ್ಕು!!

ಕೊದಿಲು:

ಹಲಸಿನಕಾಯಿಯ ಉರುಟುರುಟು ಹೋಳುಮಾಡಿ ಲಾಯಿಕಂಗೆ ಬೇಶುದು.
ಕೊತ್ತಂಬರಿ ಕುಂಟೆಮೆಣಸು ಹಾಕಿ ತೆಂಗಿನಕಾಯಿ ಮಸಾಲೆಮಾಡ್ತದು. ಬೆಂದಬಾಗಕ್ಕೆ ಈ ಮಸಾಲೆ ಸೇರುಸಿ ಲಾಯಿಕಂಗೆ ಕೊದಿಶುದು.
ಹಲಸ್ನಾಯಿ ಕೊದಿಲು ತೆಯಾರು.

ಮೇಲಾರ:
ಕೊದಿಲಿಂದಲೂ ಸಣ್ಣಕೆ ಕೊರದ ತುಂಡುಗಳ ಲಾಯಿಕಕ್ಕೆ ಬೇಶಿ, ಮೇಲಾರದ ಅರಪ್ಪುದೇ, ರಜ ಹುಳಿಮಜ್ಜಿಗೆಯೂ ಹಾಕಿರೆ – ಪಷ್ಟ್ಳಾಸು ಮೇಲಾರ ತೆಯಾರಿ.
ರಂಗಮಾವಂಗೆ ಬೆಶಿ ಹೆಜ್ಜೆಗೆ ಬೆಶಿ ಮೇಲಾರ ಸಿಕ್ಕಿರೆ ಪಾತಿಅತ್ತೆ ಸಾಕು ಹೇಳುವನ್ನಾರವೂ ಉಂಗು!

ಜೀರಕ್ಕಿಬೆಂದಿ:

ರಜ್ಜ ಬೆಲ್ಲ, ಅರಿಶಿನ ಹೊಡಿ ಹಾಕಿ ಬಾಗವ ರಜ್ಜ ಬೇಶುದು.
ಕಾಯಿಯ ಜೀರಕ್ಕಿ, ಹಸಿಮೆಣಸಿನ ಒಟ್ಟಿಂಗೆ ಹಾಕಿ ಲಾಯಿಕಂಗೆ ಕಡದು, ಬೇಶಿದ ಬಾಗದ ಒಟ್ಟಿಂಗೆ ಮಿಶ್ರಮಾಡ್ತದು.
ಸೀವುಸೀವು ಜೀರಕ್ಕಿಬೆಂದಿ ತೆಯಾರು!! ಕೊದಿಲೂ, ಮೇಲಾರವೂ ಅಲ್ಲದ್ದೆ ವೈಶಿಷ್ಟ್ಯಪೂರ್ಣ ನಮ್ಮ ಹಳೆಅಡಿಗೆಲಿ ಇದುದೇ ಒಂದು!

ಕಾಯಿಚೆಕ್ಕೆ ದೋಸೆ:
ನೊಂಪಿಂಗೆ ಕಡವಲೆಡಿತ್ತ ನಮುನೆಯ ಲಾಯಿಕ ಹಲಸ್ನಾಯಿ ಹೆಮ್ಮಕ್ಕೊಗೆ ಕೊಶಿಯೋ ಕೊಶಿ.
ಮಂದಕೆ ದೋಸೆಹಿಟ್ಟಿನ ಕಡದು, ಕಾವಲಿಗೆ ಮಡಗಿ ಕೈಲೇ ಎರಗು ಪಾತಿಅತ್ತೆ. ಅವಕ್ಕೆ ಸೌಟಿಲಿ ಎರದರೆ ತೆಳು ಆವುತ್ತಿಲ್ಲೆಡ, ಕೈಲಿ ಎರದರೆ ಮಾಂತ್ರ ಪೇಪರಿನಷ್ಟು ತೆಳು ಅಪ್ಪದಾಡ.
ಆ ದೋಸೆಯ ಜೇನು-ತುಪ್ಪ ಕಲಸಿ ಕೂಡಿ ತಿಂದರೆ ರುಚಿಯೇ ರುಚಿ!

ಹಲಸಿನ ಕಾಯಿ ಬೋಂಡ:
ಬೈಲಿಲಿ ಬಟಾಟೆ ಗೆಣಂಗು ಹೇಳಿ ಎಲ್ಲೋರುದೇ ಜಗಳಮಾಡಿಗೊಂಡೇ ಬಾಕಿ. ಆದರೆ ದೊಡ್ಡಕ್ಕ° ಹೊಸತ್ತರ ಕಲಿತ್ತದರ ನಿಲ್ಲುಸ.
ಈ ಕಾಯಿಸೊಳೆಯ ಬೋಂಡ ಮಾಡ್ಳಾವುತ್ತು – ಹೇಳ್ತದು ನವಗೆಲ್ಲಿ ಅರಡಿವದು – ದೀಪಕ್ಕ° ಹೇಳದ್ದರೆ.
ಹಾಂಗೆ, ಮಾತಾಡುವಗ ನೆಂಪುಮಾಡಿದವು: ಹಲಸ್ನಾಯಿ ಬೋಂಡ.
ಸೊಳೆಯ ಲಾಯಿಕಲ್ಲಿ ಕಡದು, ರಜ ಮೈದಾಹೊಡಿಯ ಒಟ್ಟಿಂಗೆ ಹಾಕಿ – ಕ್ರಮ ಹೇಂಗೆ ಹೇಳ್ತದು ಒಪ್ಪಣ್ಣಂಗೆ ಸರಿ ಅರಡಿಗಾಯಿದಿಲ್ಲೆ.
ಇನ್ನೊಂದರಿ ಕೂದು ಕೇಳಿ, ಬೈಲಿಂಗೆ ನಿಧಾನಕ್ಕೆ ಹೇಳುವೊ°.

ನೀರ್ಸೊಳೆ / ಉಪ್ಪಿಲಿ ಹಾಕಿದ ಸೊಳೆ

ಕುಜುವೆ, ಹಲಸ್ನಾಯಿ ಹೇಳಿ ಪಟ್ಟಿಮಾಡುವಗ ಇಷ್ಟೊತ್ತು ಆದಾಕಿಂಡಿದ್ದಿದ್ದ ದೊಡ್ಡತ್ತೆ – ಉಪ್ಪಿಲಿ ಹಾಕಿದ ಸೊಳೆಯ ಶುದ್ದಿ ನೆಂಪುಮಾಡಿದವು.
ಅಪ್ಪು, ಒಳ್ಳೆ – ದಪ್ಪಜಾತಿಯ ಸೊಳೆಯ ಉಪ್ಪಿಲಿ ಹಾಕಿ ಮಡಗುತ್ತ ಮರಿಯಾದಿ ಇದ್ದು.
ಹಲಸ್ನಾಯಿ ಸಮೆಯಲ್ಲಿ ಹಾಂಗೆ ಮಡಗಿರೆ, ಹಲಸ್ನಾಯಿಯೇ ಇಲ್ಲದ್ದ ಸಮೆಯಲ್ಲಿ ತೆಗದು ಉಪಯೋಗ ಮಾಡಿಕ್ಕಲಾವುತ್ತು.

ಇದಕ್ಕೆ ನಮ್ಮ ಬೈಲಿಲೇ ಬೇರೆಬೇರೆ ಹೆಸರು ಹೇಳ್ತವು: ಉಪ್ಪಿನಸೊಳೆ, ನೀರುಸೊಳೆ, ಉಪ್ಪಿಲಿಹಾಕಿದ ಸೊಳೆ – ಹೀಂಗೆಲ್ಲ.
ಎಂತದೇ ಹೇಳಲಿ, ರುಚಿ ಒಂದೇ! 😉
ಉಪಯೋಗಕ್ಕಪ್ಪಗ ಉಪ್ಪಿನ ಅಳಗೆಂದ ತೆಗದು, ಒಂದರಿ ಚೆಂದಕೆ ತೊಳದು ಮಡಿಕ್ಕೊಂಗು.

ತಾಳು:
ನೀರ್ಸೊಳೆಯ ಚೆಂದಕೆ ತುಂಡುಸಿ, ಒಗ್ಗರುಸಿರೆ ತಾಳು ಆತು!
ಉಪ್ಪಿಲಿ ಹಾಕಿದ ಸೊಳೆಯ ಪೊಡಸು ರಜ ಇದ್ದರೂ, ಹಲಸಿನ ಸೊಳೆದೇ ರುಚಿ. ಇದರ ಪರಿಮ್ಮಳವ ಕೇಳಿರೇ ಅರ್ದ ಸೇರು ಅಶನ ಜಾಸ್ತಿ ಮುಗಿಗೋ ಹೇಳಿಗೊಂಡು!!

ಬೋಳುಬೆಂದಿ:
ಕಾಯಿಕಡದ ದಿನ ಬೆಂದಿ ಮಾಡ್ತನ್ನೆ, ಕಾಯಿಕಡೆಯದ್ದ ದಿನ ಎಂತರ – ಅದುವೇ ಬೋಳುಬೋಳು ಇಪ್ಪ ಬೋಳುಬೆಂದಿ.
ಬಾಗವ ಬೇಶಿ, ರಜ್ಜ ಹುಳಿ, ಬೆಲ್ಲ, ಉಪ್ಪು ಎಲ್ಲ ರುಚಿಗೆ ದಕ್ಕಿತ ಹಾಕಿಕ್ಕಿ, ಲಾಯಿಕದ ಒಗ್ಗರಣೆ ಕೊಡ್ತದು.
ಬೆಂದಿ ಬೋಳು ಆದರೂ ರುಚಿ ಬೋಳಲ್ಲ ಭಾವಾ! ಹೆಜ್ಜಗೆ ಕೂಡಿಂಡು ಉಂಬಲೆ ಪಷ್ಟಾವುತ್ತು.

ಸೊಳೆ ರೊಟ್ಟಿ:
ಉಪ್ಪಿನ ಸೊಳೆಯ ಒಂದೆರಡುಗಂಟೆ ನೀರಿಲಿ ಮಡಗುದು.
ತೆಗದು ರಜ ಅಕ್ಕಿಯೂ ಕಾಯಿಯೂ ಒಟ್ಟಿಂಗೆ ಹಾಕಿ ಗಟ್ಟಿಗೆ ಕಡವದು!
ಕಾವಲಿಗೆಗೆ ತಟ್ಟಿ ತಟ್ಟಿ ಬೇಶಿರೆ ಸೊಳೆ ರೊಟ್ಟಿ ತೆಯಾರು! ತಟ್ಟುವಗ ಕೈಬೆರಳಿನ ಗುರ್ತ ಮೂಡ್ತಿದಾ, ಅದರ ನೋಡ್ಳೇ ಚೆಂದ. 😉
ರುಚಿಯ ರೊಟ್ಟಿ ನಾಕರ ಗಟ್ಟಿಗೆ ತಿಂದರೆ ಮಧ್ಯಾನ್ನ ಆದರೂ ಕರಗ.

ಉಂಡ್ಳಕಾಳು:
ಸೊಳೆಯ ತೆಗದು ನೀರಿಲಿ ಹಾಕಿ ಒಂದೆರಡು ಗಂಟೆ ಮಡಗುದು.
ಕಾಯಿ ಹಾಕಿ ನೊಂಪಿಂಗೆ ಕಡವದು. – ಕೆಲವು ಜೆನ ಕಡವಗ ಅಕ್ಕಿಯನ್ನೂ ಮಿಶ್ರ ಮಾಡ್ತವಡ.
ಹಿಟ್ಟಿನ ಸಣ್ಣ ಸಣ್ಣ ಉಂಡೆ ಮಾಡುದು – ಕೆಲವು ಜೆನ ಉಂಡೆಮಾಡುವಗ ಉಂಡೆಯೆಡಕ್ಕಿಲಿ ಗೋಟುಕಾಯಿಯನ್ನೂ ಮಡಗ್ಗು.
ಎಣ್ಣೆಲಿ ಹಾಕಿ ಬೇಶಿರೆ, ಮಳೆಗಾಲ ತಿಂಬಲೆ ರುಚಿಯೋ ರುಚಿ!!
(ಬಂಡಾಡಿಅಜ್ಜಿ ಇದರ ಬಗ್ಗೆಯೇ ಒಂದು ಶುದ್ದಿ ಹೇಳಿದ್ದವು ಬೈಲಿಲಿ, ಗೊಂತಿದ್ದಲ್ಲದೋ?)

ಹಲಸಿನ ಹಣ್ಣು:
ಮಕ್ಕೊ ಹೆಮ್ಮಕ್ಕೊ ಇಷ್ಟೆಲ್ಲ ಬಗೆ ಮಾಡಿದ ಮೇಗೆಯೂ ಹಣ್ಣು ಒಳುದತ್ತೋ?
ಹಣ್ಣಿಂಗೂ ಕಾಯಿಯಷ್ಟೇ ಬೇಡಿಕೆ ಇದ್ದಿದಾ!!
ಮೇಗಂಗೆ ಕಾಂಬಗ ಎಲ್ಲವೂ ಹಲಸೇ ಆದರೂ, ಒಳ ಸುಮಾರು ಜಾತಿಪದ್ಧತಿ ಇದ್ದು. ಹಾಂಗೆ ಜೇನುಬರಿಕ್ಕ, ಬಡ್ಡಬರಿಕ್ಕೆ, ಉದ್ದ ತುಳುವ – ಹೀಂಗೆ ಹೆಚ್ಚಿನ ಮನೆಲಿಯೂ ಎರಡು ಮೂರು ಜಾತಿಯ ಮರಂಗೊ ಇರ್ತು.
ಇಂತಾ ಮರ ಇಂತಾದ್ದಕ್ಕೆ ಲಾಯಿಕಪ್ಪದು ಹೇಳಿಗೊಂಡು.

ಆಹಾ.. ಹಲಸಿನಣ್ಣು

ಹಣ್ಣು:
ಹಾಂಗೆ, ಜೇನಬರಿಕ್ಕ ಹೇಳಿರೆ – ಜೇನಿನಷ್ಟು ಸೀವಿನ ಹಣ್ಣಿನ ಸೊಳೆಗೊ ಇಪ್ಪ ಹಲಸಿನಣ್ಣು!!
ಆದರೂ, ಅದರ ಮೇಗಂದ ಕಾಡಜೇನ ಒಟ್ಟಿಂಗೆ ಮಿಶ್ರಮಾಡಿ ತಿಂದರೆ ಹೇಂಗಿಕ್ಕು? – ಇದು ನಮ್ಮ ಅನ್ವೇಷಣೆ ಅಲ್ಲ – ಕಾಡಿಲಿ ಇರ್ತ ಕರಡಿಯ ಅನ್ವೇಷಣೆ ಅಡ.
ಅಪ್ಪು! ಒಂದು ಲಾಯಿಕದ ಹಣ್ಣಿನ ಬಿಚ್ಚಿ, ಒಂದು ಕೋಲುಜೇನು ಗೂಡಿನ ಒಕ್ಕಿ, ಎರಿಯ ತಂದು ಹಿಂಡಿ – ಕರಡಿ ತಿಂಗಡ.
ಹಾಂಗೆ ನಾವುದೇ ಇದೇ ನಮುನೆ ಮಾಡ್ಳಿದ್ದು.
ಬರಿಕ್ಕ ಸೊಳೆಯ ಲಾಯಿಕಕ್ಕೆ ಆದು, ಗಿಣ್ಣಲಿಲಿಪ್ಪ ಜೇನವ ಮಡಗಿ ಅದ್ದಿ ಅದ್ದಿ ತಿಂತದು ಆಚಮನೆದೊಡ್ಡಪ್ಪಂಗೆ ಭಾರೀ ಆನಂದದ ವಿಶಯ.
ಒಂದು ತಮಾಶೆ ನೆಂಪಾತು: ಜೋರು ಮಳೆಬಂದುಗೊಂಡಿಪ್ಪಗ ಒಂದು ಮಾಪುಳೆ ಉದಾಸ್ನ ಮಾಡಿಂಡು ಹೇಳಿತ್ತಡ –  ಛೆ, ಈಗ ಹಲಸಿನ ಹಣ್ಣು ಇದ್ದಿದ್ದರೆ, ಒಟ್ಟಿಂಗೆ ಜೇನವೂ ಇದ್ದಿದ್ದರೆ ಅದ್ದಿ ಅದ್ದಿ ತಿಂಬಲಾವುತಿತು- ಹೇಳಿಗೊಂಡು!
ಯೇವದಾರು ಒಂದು ಇದ್ದರೂ ಹಾಂಗೆ ಹೇಳುದಕ್ಕೆ ಅರ್ತ ಇದ್ದು. ಎರಡೂ ಇಲ್ಲದ್ದೆ ಆ ಯೋಚನೆ ಬಂದದೇ ಈ ಗಾದೆಯ ತಮಾಶೆ ತಾತ್ಪರ್ಯ.
ಕೈಂದ ಹರಿಯದ್ದ ಏನಾರು ಏರ್ಪಾಡುಗಳ ಹೊತ್ತೋಪಲೆ ಹೇಳಿರೆ ಮಾಷ್ಟ್ರುಮಾವ° ಈ ಗಾದೆಯ ನೆಂಪುಮಾಡುಸುಗು ಒಂದೊಂದರಿ! 😉

ಹಣ್ಣಿನ ಪಾಯಿಸ
ಹಲಸಿನಣ್ಣಿನ ಲಾಯಿಕಕ್ಕೆ ಕೊರದು, ಕೊಚ್ಚಿ ಬೆಲ್ಲವುದೇ ರಜ ಹಾಕಿ ಬೇಶಿರೆ ಪಾಯಿಸ ಮಾಡ್ಳಕ್ಕು.
ಕಾಯಾಲು ರಜ ಹಿಂಡಿರೆ ರುಚಿ ಏರುತ್ತು. ಕೆಲವು ಸರ್ತಿ ಕೊಬ್ಬರಿಯೋ – ಮಣ್ಣ ಹಾಕುಲೂ ಅಕ್ಕು.
ಹಲಸಿನಣ್ಣಿನ ಸಮೆಯಲ್ಲಿ ಒಂದರಿ ಆದರೂ ಇದು ಇದ್ದೇ ಇಕ್ಕು!

ಕಾಸಿದ್ದು:
ಹಲಸಿನ ಹಣ್ಣಿನ ಲಾಯಿಕಕ್ಕೆ ಕೊಚ್ಚಿ, ಕಾಸುತ್ತದು.
ಜಾಸ್ತಿ ಅಲ್ಲ, ಹದಾಕೆ. ಅದರ ಹೊಸತನದ ಅಂಶ ಬಿಟ್ಟು, ಹದಾಕೆ ಬಾಡ್ತಷ್ಟು ಕಾಸಿಕ್ಕುದು.
ಇಂದು ಕೊಯಿದ ಹಣ್ಣಿನ ನಾಳೆಲ್ಲ ನಾಳ್ತಿಂಗೆ ಕೊಟ್ಟಿಗೆ ಮಾಡ್ತರೆ, ಎರಡು ದಿನದ ಮಟ್ಟಿಂಗೆ ಮಡಲೆದಕ್ಕಿತ ಹದಾಕೆ ಕಾಸಿ ಮಡಗುತ್ತದು ಇನ್ನೊಂದು ಕ್ರಮ.
ಇದರ ಚೈಂಗುಳಿ ಹೇಳಿಯೂ ಹೇಳ್ತವು ಕೆಲವು ದಿಕ್ಕೆ.

ಸುಟ್ಟವು:
ಹಲಸಿನಣ್ಣಿನ ಕೊರದು, ಕೊಚ್ಚಿ, ಕಾಸಿ, ರಜ್ಜ ಅಕ್ಕಿಹಿಟ್ಟಿನೊಟ್ಟಿಂಗೆ ಮಿಶ್ರಮಾಡಿರೆ ಸುಟ್ಟವು ಮಾಡ್ಳೆ ಪಷ್ಟು!
ಸಣ್ಣ ಸಣ್ಣ ಉಂಡೆಯ ಮಾಡಿ ತುಪ್ಪಕ್ಕೋ, ಎಣ್ಣಗೋ ಮಣ್ಣ ಬಿಟ್ಟರೆ ಸುಟ್ಟವು ತಿಂಬಲೆ ಬಲು ರುಚಿ.
ಕಾಯಿಯ ಬೋಂಡಮಾಡಿದ ಎಣ್ಣೆ ಹಾಂಗೇ ಬಾಕಿ ಇದ್ದಲ್ಲದೋ – ಹಣ್ಣಿನ ಸುಟ್ಟವು ಮಾಡ್ಳೆ! 😉

ದೋಸೆ:
ಹಲಸಿನ ಹಣ್ಣಿನ ಅಕ್ಕಿಯೊಟ್ಟಿಂಗೆ ಹಾಕಿ ಕಡದರೆ, ದೋಸೆ ಎರವಲಾವುತ್ತು.
ಕಾಯಿಯ ನಮುನೆ ಚೆಪ್ಪೆ ಅಲ್ಲದ್ದೆ, ರಜ್ಜ ಸೀವುಸೀವಟೆ ಆಗಿ, ಜೇನದ ಒಟ್ಟಿಂಗೆ ಒಳ್ಳೆ ಪಾಕಲ್ಲಿ ತಿಂಬಲಾವುತ್ತು ಭಾವ.

ಕೊಟ್ಟಿಗೆ:
ಚೆ, ಕೊಟ್ಟಿಗೆ ಹೇಳಿರೆ ಅಟ್ಟಿನಳಗೆ ನೆಂಪಾವುತ್ತು, ಅಟ್ಟಿನಳಗೆ ಹೇಳಿರೆ ಸುಬಗಣ್ಣನ ನೆಂಪಾವುತ್ತು. 🙁

ಅದಿರಳಿ, ಹಲಸಿನ ಹಣ್ಣಿನ ಕೊಚ್ಚಲಿನ ರಜ್ಜ ಅಕ್ಕಿ ಹಿಟ್ಟಿಂಗೆ ಮಿಶ್ರಮಾಡಿಗೊಂಬದು.
ಲಾಯಿಕದ ಬಾಳೆ ಎಲೆಯ ಬಾಡುಸಿ, ಈ ಹಿಟ್ಟಿನ ಒಂದು ಸೌಟು ಎರವದು.
ಬಾಳೆಯ ಚೆಂದಕೆ ಮಡುಸಿ – ಮಾಷ್ಟ್ರುಮಾವ° ಎಲೆತೊಟ್ಟೆ ಮಡುಸುತ್ತ ನಮುನೆ ಮಾಡಿ – ಅಟ್ಟಿನಳಗೆಲಿ ಮಡಗುದು.

ರಜ್ಜ ಹೊತ್ತು ಬೇಶಿರೆ ಕೊಟ್ಟಿಗೆ ತೆಯಾರಿ.
ಎಣ್ಣೆಯೋ, ಜೇನವೋ, ತುಪ್ಪವೋ, ಉಪ್ಪಿನಾಯಿಎಸರೋ, ಚಟ್ಣಿಯೋ – ಎಂತದೂ ಅಕ್ಕು ಇದಕ್ಕೆ.
ಮದಲಿಂಗೆ ಒಂದು ಮಳೆಗಾಲ ಒಂದು ಕೊಟ್ಟಿಗೆ ಆದರೂ ತಿನ್ನದ್ದವ ಬೂಸು ಹೇಳಿ ಲೆಕ್ಕ ಇತ್ತಾಡ, ಸುಬಗಣ್ಣ ಹೇಳಿದ್ದು.
ಓಯ್, ನಿಂಗನಿಂಗಳ ಮನೆ ಅಟ್ಟಿನಳಗೆ ನಿಂಗನಿಂಗಳೇ ತೊಳಕ್ಕೊಳೇಕು, ಸುಬಗಣ್ಣನ ಕೈಲಿ ಹೇಳಿರೆ ಮನೆದೇವರು ಬೈಗು – ಹಾಂ! 😉

ಗೆಣಸಲೆ:

ಇದು ಕೊಟ್ಟಿಗೆಯ ಕಿರಿಯಬ್ಬೆ ಮಗ°!
ಬಾಳೆಲೆಲೇ ಎರವದಾದರೂ, ಹಿಟ್ಟೂ ಆಗಾಣ ನಮುನೆ ಅಲ್ಲ.
ಅಕ್ಕಿ ಹಿಟ್ಟಿನ ಎರದು, ಅದರ ಮಧ್ಯಕ್ಕೆ ಹಲಸಿನಣ್ಣು-ಕಾಯಿ-ಬೆಲ್ಲದ ಮಿಶ್ರವ ಎರೆತ್ತದು.
ಬೇಶಿಆದ ಮೇಗೆ, ಹೆರಾಣ ಹೊಡೆಲಿ ತಿಂಬಲೆ ಉಪ್ಪುಪ್ಪು ಅಕ್ಕಿಹಿಟ್ಟುದೇ, ಮಧ್ಯಲ್ಲಿ ಸೀವಟೆ ಪಾಕವೂ ಸಿಕ್ಕಿ ಪರಮಾನಂದ ಆವುತ್ತು.
ಮದಲಿಂಗೆ ಕೊಂಕಣಿ ಹೋಟ್ಳುಗಳಲ್ಲಿ ಎಲೆಒಡೆ ಹೇಳಿ ಸಿಕ್ಕಿಂಡಿತ್ತಾಡ.
ಹಲಸಿನಣ್ಣಿಲ್ಲದ್ದೆ, ಬರೇ ಕಾಯಿಬೆಲ್ಲದ ಹೂರಣ ಮಾಡಿ ಹಿಟ್ಟಿಂಗೆ ಎರದು ಗೆಣಸಲೆಯ ನಮುನೆ ಬೇಶಿ ಕೊಟ್ಟೊಂಡಿದ್ದಿದ್ದಾಡ.
ಉಮ್ಮಪ್ಪ, ಒಪ್ಪಣ್ಣಂಗರಡಿಯ!

ಪೆರಟಿ:

ಕೊಚ್ಚಲು ಹೇಳಿರೆ ಎಂತ ಗೊಂತಾತು.
ಹಲಸಿನಣ್ಣಿನ ಸೊಳೆಯ ಬೆಶಿ ಮಾಡ್ತ ಅದೇ ಪಾಕವ ಇನ್ನೂ ಕಾಸಿರೆ ಎಂತಕ್ಕು?
ಅದರ್ಲಿಪ್ಪ ನೀರಿನ ಅಂಶ ಪೂರ್ತಿ ಆವಿ ಆಗಿ ಹೋವುತ್ತು; ಹಸಿ ಹಣ್ಣಿನ ನಾರುಗೊ ಸರೀ ಬೇಯ್ತು.
ಹಾಂಗೆ ಬೆಂದು, ನೀರಾರಿ, ಕಪ್ಪು ಬಣ್ಣಲ್ಲಿ ಉಂಟಪ್ಪ ಸಾಂದ್ರ ಮಿಶ್ರಣವೇ – ಪೆರಟಿ.
ಇದರ ಉಂಡೆಉಂಡೆ ಮಾಡಿ ಅಳಗೆಲಿ ಹಾಕಿ ತೆಗದು ಮಡಗಲಕ್ಕು.
ಹಲಸಿನ ಹಣ್ಣು ಒಂದೆರಡು ದಿನ ಒಳಿಗು, ಆದರೆ ಈ ಪೆರಟಿದ ಪಾಕ ಸರಿಯಾದ ನಮುನೆಲಿ ಬಂದರೆ ಮದಲಿಂಗೆ ಎರಡೊರಿಶ ಮೂರೊರಿಶ ಮಡಗ್ಗು ಕಾಂಬುಅಜ್ಜಿ!
ಈ ಒರಿಶ ಪೆರಟಿದ್ದು ಬಪ್ಪೊರಿಶ ಅಲ್ಲ, ಅದರಿಂದ ಮತ್ತಾಣ ಒರಿಶ ಒರಿಶದ ಬೆಳೆ ಒರೆಂಗೂ ಇರ್ತು.
ಅಬ್ಬಾ, ಈ ಹೆಮ್ಮಕ್ಕೊ ಹೇಮಾರ್ಸಿ ಮಡಗುತ್ತ ಕ್ರಮವೇ!!!

ಪೆರಟಿ ಪಾಯಿಸ:

ಈ ಪೆರಟ್ಟಿದ್ದರ ಅಂತೇ ಮಡಗುದಲ್ಲ; ಹಲಸಿನಣ್ಣಿಲ್ಲದ್ದ ಕಾಲಲ್ಲಿ ಪಾಚ ಮಾಡುಗು! ಅದುವೇ ಪೆರಟಿಪಾಯ್ಸ!
ಈ ಪೆರಟಿದ್ದರ ಹಾಂಗಾಗಿ, ಈ ಪೆರಟಿದ್ದರ ರಜ್ಜ ಬೆಲ್ಲ ಹಾಕಿ ಬೆಶಿಮಾಡಿ, ಕಾಯಾಲು ಎರದರೆ ಪೆರಟಿಪಾಯ್ಸ ತೆಯಾರು.
ಅದಕ್ಕೆ ಬಾಗಕ್ಕೆ ಕೊಪ್ಪರವೋ – ಎಂತಾರು ಸೇರುಸುಗು ಬಂಡಾಡಿಅಜ್ಜಿ.
ಹೇಳಿದಾಂಗೆ, ಆಟಿಗೆ ಕುಳ್ಳುಲೆ ಹೋವುತ್ತೋರಿಂಗೆ ಸಮ್ಮಾನಕ್ಕೆ ಈ ಪೆರಟಿಪಾಯ್ಸ ಇದ್ದೇ ಇಕ್ಕು ಭಾವಯ್ಯ!
~

ಇದಿಷ್ಟು ಹಲಸಿನ ಕಾಯಿಯ ವಿವಿಧ ರೂಪಂಗಳ ಬಗ್ಗೆ ಆತು.
ಇನ್ನು, ವಿವಿಧ ಭಾಗಂಗಳ ಬಗ್ಗೆ ರಜ್ಜ ಮಾತಾಡುವೊ, ಆಗದೋ?

ಬೇಳೆ:
ಹಲಸ್ನಾಯಿಲಿ ಸಿಕ್ಕುತ್ತ ಬೇಳೆಯ ಅಂತೇ ಇಡ್ಕಲಿದ್ದೋ? ಚೆ, ಇಲ್ಲೆಪ್ಪ.
ಅದರಲ್ಲಿ ಶರ್ಕರಪಿಷ್ಟ ಕೇಜಿಗಟ್ಳೆ ಇದ್ದಾಡ, ಕೇಜಿಮಾವ° ಹೇಳಿತ್ತಿದ್ದವು. ಹಾಂಗಾಗಿ ಬೇಳೆಯನ್ನೇ ಉಪಯೋಗುಸಿಗೊಂಡು ಕೆಲವು ಪಾಕಂಗಳ ಮಾಡ್ತವು.

ಸೌತ್ತೆ ಬೇಳೆ ಕೊದಿಲು:
ಹೇಂಗೂ ಕಂಬಕ್ಕೆ ಬಾಳೆಬಳ್ಳಿಲಿ ಕಟ್ಟಿ ನೇಲುಸಿದ ಸೌತ್ತೆ ಈಗ ಮನೆಗಳಲ್ಲಿ ಇಕ್ಕು, ಅಲ್ಲದೋ!
ಒಂದು ಕೊಳವಲಾದ ಸೌತ್ತೆಯ ತೆಗದು ಬೆಂದಿಮಾಡುಗು.
ಆ ಸೌತ್ತೆಗೆ ಚೇರ್ಚೆಗೆ (ಮಿಶ್ರಕ್ಕೆ) ಹಲಸಿನಾಯಿ ಬೇಳೆಯ ಗುದ್ದಿ ಹಾಕುಗು.
ಸೌತ್ತೆಯ ಮೃದುತ್ವವೂ, ಬೇಳೆಯ ’ಗಟ್ಟಿ’ಗ ತನವೂ ಒಳ್ಳೆ ಜೆತೆ! ಎರಡೂ ಒಂದೇ ಕಾಲಲ್ಲಿ ಕೈಗೆ ಸಿಕ್ಕುತ್ತ ಕಾರಣ ಅನಿವಾರ್ಯವಾಗಿ ಚೇರ್ಚೆ ಸುರು ಆದ್ದೋ ಏನೊ!
ಉಮ್ಮಪ್ಪ.

ಬೇಳೆ ಹೋಳಿಗೆ

ಇದೇ ಬೇಳೆಯ ಉಪಯೋಗಿಸೆಂಡು ಹೋಳಿಗೆ ಮಾಡ್ಳಾವುತ್ತು. ಅರಡಿಗೋ?
ಬೇಳೆಯ ಕಡದು, ಒಟ್ಟಿಂಗೆ ಬೆಲ್ಲವೂ ಹಾಕಿ – ಹೂರಣ ತೆಯಾರಿ ಮಾಡ್ತದು.
ಮೈದಾ ಹಿಟ್ಟಿನ ಕಣಕ ಮಾಡಿರೆ ಆ ಹೂರಣ ಉಂಡೆಮಾಡಿ ಲಟ್ಟುಸಿ ಬೇಶಲಕ್ಕು. ಬೇಳೆ ಹೋಳಿಗೆ ತೆಯಾರು!

ಶಾಂತಾಣಿ:
ಹಲಸಿನ ಬೇಳೆಯ ಬೇಶಿ ಉಪ್ಪಿನ ಒಟ್ಟಿಂಗೆ ಬೇಶಿ, ಒಣಗುಸಿರೆ ಶಾಂತಾಣಿ ತೆಯಾರು.
ಮಳೆಗಾಲ ಉದಾಸ್ನ ಅಪ್ಪಗ ತಿಂಬಲೆ ನೇರಂಪೋಕು ಅಗಿಯಲೆ ಇದು ಭಾರೀ ಒಳ್ಳೆ ಬಗೆ.
ಈಗ ಇದರ ಮಾಡ್ತದೂ ಕಮ್ಮಿ ಆಯಿದು, ರುಚಿ ಹಿಡುದ ಬೈಲಿನೋರೂ ಕಮ್ಮಿ ಆಯಿದವು.
ಒಪ್ಪಣ್ಣಂಗೆ ಈ ಬಗೆ ನೆಂಪಾದ ಕೂಡ್ಳೆ ಮಾಷ್ಟ್ರಮನೆ ಅತ್ತೆಯ ನೆಂಪಪ್ಪದು. ಎಂತಕಪ್ಪಾ…? 😉

~

ದೊಡ್ಡ ಕಳಲ್ಲಿ ಕೂದು ಹೀಂಗೆಲ್ಲ ಬಗೆ ಮಾತಾಡಿಗೊಂಡಿಪ್ಪಗಳೇ, ಆದು ಮುಗುದತ್ತು.
ಮಾತಾಡದ್ದೆ ಆದು ಹಾಕಿದ್ದಾದರೆ ಎಲ್ಲೋರಿಂಗೂ ಬಚ್ಚಲು ಗೊಂತಾವುತ್ತಿತು ಇದಾ. ಹೀಂಗೇ ಪಟ್ಟಿಮಾಡಿದ್ದರ್ಲಿ ಸುಲಾಬಲ್ಲಿ ಮುಗಾತು.

ತಲೆಂಬಾಡಿ ಸೀವಿನ ಹಣ್ಣಿನ ರಜ ರುಚಿನೋಡಿಗೊಂಡು, ನಾವು ಮೆಲ್ಲಂಗೆ ಹೆರಟತ್ತು.
~

ಅಲ್ಲಿಂದ ಮತ್ತೆ ಬಪ್ಪಗ ಸಿಕ್ಕಿದ್ದೇ ಮಾಷ್ಟ್ರುಮಾವನ ಮನೆ.
ಮಾಷ್ಟ್ರುಮಾವಂದೇ ಒಂದರಿಯಾಣ ಹಲಸಿನಣ್ಣು ತಿಂದು, ಎಲೆತಿಂದುಗೊಂಡಿತ್ತಿದ್ದವು, ಅಷ್ಟೆ.
ಹಾಂಗೆ, ತಲೆಲಿ ತಿರುಗಿಂಡು ಇದ್ದ ಅದೇ ಶುದ್ದಿಯ ಮುಂದುವರುಸಿದೆ. ದೊಡ್ಡಬಾವನ ಒಟ್ಟಿಂಗೆ ಕೂದು ಮಾಡಿದ ಪಟ್ಟಿಯ ಹೇಳಿದೆ.

ಮಸಿಕಳ್ಳಿಕೆ

ಓ, ಕುಜುವೆಂದ ಸುರುಮಾಡಿದ್ದೋ, ಅದರಿಂದಲೂ ಮದಲಾಣ ಕಳ್ಳಿಕೆ / ( ಕಳ್ಳಿಗೆ)ಯನ್ನೂ ಲೆಕ್ಕಮಾಡ್ಳಾವುತಿತನ್ನೇ – ಕೇಳಿದವು.
ಕಳ್ಳಿಕೆ ಗೊಂತಾತಲ್ಲದೋ – ಮರಲ್ಲಿ ಕುಜುವೆ ಮೂಡುವ ಹಂತಲ್ಲಿ ಬೆರಳಿನಷ್ಟು ತೋರದ ಸಣ್ಣ ರಚನೆ!
ಮಕ್ಕೊ ಇದನ್ನೇ ಮರಂದ ಮುರುದು ತಿಂಗಡ, ಅದರ ಕನರು ರುಚಿಗೆ! (ದೊಡ್ಡವಕ್ಕೆ ಗೊಂತಾದರೆ ಇದೇ ಮರಂದ ಅಡರು ಮುರಿಗು! 😉 )
(ಸೂ: ಈ ಕಳ್ಳಿಗೆ ಬಾಡಿ ನೆಲಕ್ಕಕ್ಕೆ ಬಿದ್ದರೆ ಅಲ್ಲಿಗೇ ಕಪ್ಪಾವುತ್ತು – ಒಂದು ಎಲಿ ಸತ್ತು ಬಿದ್ದ ನಮುನೆಲಿ ಕಾಣ್ತು. ಇದಕ್ಕೆ ಮಸಿಕಳ್ಳಿಕೆ ಹೇಳ್ತದು.)

~
ಅಷ್ಟಪ್ಪಗ ಅವು ಹಲಸಿನ ಮರದ ಬಗೆಲಿ ಸುಮಾರು ವಿಶಯ ಹೇಳಿಗೊಂಡು ಹೋದವು.
ಹಲಸಿನ ಮರ ಹೇಳಿರೆ ನಾಕು F ಗಳ ಸಂಗಮ ಅಡ: Food, Fodder, Firewood, Furniture – ಹೇಳಿಗೊಂಡು.
Food (ಆಹಾರ) – ಹಲಸಿನಣ್ಣು ನಮ್ಮ ಆಹಾರಲ್ಲಿ ಅನೇಕ ರೂಪಲ್ಲಿ ಸೇರಿಗೊಂಡಿದು.
Fodder (ಮೇವು)– ದನಗೊಕ್ಕೆ ಹಲಸಿನಣ್ಣಿನ ಕಾಲಲ್ಲಿ ತಿಂಬಲೆ ಬೇರೆಂತೂ ಬೇಡ. ಮೂರೂ ಹೊತ್ತು ಹಲಸಿನ ರಚ್ಚೆಯೋ ಎಂತಾರು ಹಾಕಿರೆ ತಿಂದುಗೊಂಡೇ ಇಕ್ಕು.
ಮೋಳಮ್ಮ ಅಂತೂ ಅಂದು ಹಲಸಿನಣ್ಣು ಕೊರದರೆ ಹೊತ್ತೋಪಗ ರಚ್ಚೆ ಹಾಕುವನ್ನಾರ ರಚ್ಚೆಂದಬಿಡ-ಗೂಂಜಿಂದ ಬಿಡ ಹೇಳಿ ಬೊಬ್ಬೆ ಮಾಡುಗು!
Firewood(ಮುಷ್ಟಗೆ)– ಹಲಸಿನ ಸೌದಿ ನವಗೆ ವಿಶೇಷ ಆದ್ಸು. ವಿಶೇಷವಾಗಿ ಯಜ್ಞ ಯಾಗಾದಿಗೊಕ್ಕೆ ಈ ಮರದ ಸಮಿತ್ತು ಸಿಕ್ಕದ್ದರೆ ಬಟ್ಟಮಾವಂಗೆ ಸಮಾದಾನ ಆಗ.

Furniture(ಪೀಠೋಪಕರಣ)- ಹಲಸಿನಮರ ನೋಪಿಂದು. ಒಳ್ಳೆ ಬೆಳದ ತಿರುಳು ಹಲಸು ಸಿಕ್ಕಿರೆ ಆಚಾರಿಗೆ ಭಾರೀ ಕೊಶೀ ಅಕ್ಕು. ಮಳೆಗಾಲ ಇಡೀ ಗೀಸುಳಿ ಹಾಕಿಂಡು ನೊಂಪುಮಾಡುಗು.
ಬಾಗಿಲು, ದಾರಂದಂದ ಹಿಡುದು – ದೇವರ ಮಣೆ, ದೇವರ ಪೀಠ – ಹೀಂಗಿರ್ತ ದೈವೀಕ ಸಲಕರಣೆಗಳ ಒರೆಂಗೆ – ಎಲ್ಲದಕ್ಕೂ ಹಲಸು ಅಕ್ಕು.

ಅದಲ್ಲದ್ದೇ,
ಹಲಸಿನ ಎಲೆಲಿ ಕಡ್ಡಿ ಕುತ್ತಿ ಮೂಡೆ ಮಾಡ್ತವು.
ಆ ಮೂಡೆಲಿ ಉದ್ದಿನ ಹಿಟ್ಟು ಎರದು ಅಟ್ಟಿನಳಗೆಲಿ ಮಡಗಿ ಇಡ್ಳಿಯ ಹಾಂಗೆ ಮಾಡ್ತವು – ಹೇಳಿದವು. ಮಾಷ್ಟ್ರುಮಾವ° ಹೇಳಿಗೊಂಡು ಹೋದ ಹಾಂಗೇ, ಎನಗೆ ಒಂದರಿ ಸುಬಗಣ್ಣನ ನೆಂಪಾಗಿ ಹೋತು!

~

ಮೇಣ
ಹಲಸಿನ ಮರಲ್ಲಿ ಮೇಣವೇ ವಿಶೇಷ.
ಮರಕ್ಕೆ / ಹಣ್ಣಿಂಗೆ ಅಪ್ಪ ಯೇವದೇ ಆಘಾತವ ಮುಚ್ಚಿ, ನೈಸರ್ಗಿಕ ಜೀವನಕ್ಕೆ ಸಹಕಾರಿಯಾಗಿಪ್ಪ ಜೀವದ್ರವವೆ ಮೇಣ.
ಈಗೀಗ ಮೇಣವೇ ಇಲ್ಲದ್ದದರ ವಿಜ್ಞಾನಿಗೊ ಕಂಡುಹುಡ್ಕಿದ್ದವಡ, ಹಲ್ಲಿಲ್ಲದ್ದ ನಾಗರ ಹಾವಿನ ನಮುನೆದು! ;-( ಅದಿರಳಿ.

ಪ್ರತಿ ಸರ್ತಿ ಹಲಸಿನಾಯಿ ಕೊರವಗಳೂ, ಅದರ ಮೇಣವ ಒಂದು ನಿರ್ದಿಷ್ಟ ಕೋಲಿಂಗೆ ಸೇರುಸೆಂಡು ಹೋಕು.
ಬೀಮನ ಗದೆಯ ನಮುನೆ ಕಾಣ್ತ ಈ ಮೇಣದ ಕೋಲು, ಕೊಟ್ಟಗೆಯ ಮಾಡಿಂಗೆ ಸಿಕ್ಕುಸೆಂಡು ಇಕ್ಕು.
ಅಂತೇ ಈ ಮೇಣವ ತೆಗದು ಮಡಗುತ್ತದಲ್ಲ, ಬದಲಾಗಿ ಅದರ ಉಪಯೋಗ ಇದ್ದು..
ಅಳಗೆಲಿ ಒಟ್ಟೆಯೋ ಮಣ್ಣ ಎದ್ದರೆ, ಹಲಸಿನ ಮೇಣವ ಲಾಯಿಕಂಗೆ ಕಾಸಿ ಎರಗು. ಆ ಒಟ್ಟೆ ತಾತ್ಕಾಲಿಕವಾಗಿ ಮುಚ್ಚುಗು!

ಹೀಂಗೆ ನಾನಾವಿಧದ ಉಪಯೋಗಂಗೊ ಇಪ್ಪ ಹಲಸಿನಾಯಿಯ ಬಹುರೂಪತೆಯ ಪಟ್ಟಿ ಮತ್ತೂ ರಜ ಉದ್ದ ಆತು.
~

ಎದುರಂದ ಕಾಂಬಲೆ ಒಂದೇ ನಮುನೆ ಕಂಡರೂ, ಹಲಸಿಲಿ ಮುಖ್ಯವಾಗಿ ಕೆಲವು ಜಾತಿಗೊ ಇದ್ದಾಡ.
ಗಟ್ಟಿಗಟ್ಟಿ ಸೊಳೆಯ ಬರಿಕ್ಕ, ಮೆಸ್ತಂಗೆ ಸೊಳೆಯ ತುಳುವ, ಸಣ್ಣ ಸಣ್ಣ ಉರುಟು ಆಕಾರದ “ರುದ್ರಾಕ್ಷಿ”, ಮೇಣವೇ ಇಲ್ಲದ್ದ (gumless) ಹೊಸಜಾತಿ – ಹೀಂಗೆ.
ಆಚಮನೆ ದೊಡ್ಡಪ್ಪ ಹೇಳಿದ ಪ್ರಕಾರ, ನೆಲಕ್ಕದ ಅಡಿಲಿ ಹಲಸಿನಣ್ಣು ಆವುತ್ತ ಜಾತಿಯ ಒಂದು ವಿಶೇಷ ಮರ ಇದ್ದತ್ತಾಡ ಉಜಿರೆಲಿ.
ಈ ಅಪುರೂಪದ ಜಾತಿಯ ಬಗ್ಗೆ ಬೈಲಿಲಿ ಆರಿಂಗಾರು ಮಾಹಿತಿ ಸಿಕ್ಕಿರೆ ತಿಳುಶುವಿರಾ?
~

ಏನೇ ಆಗಲಿ, ನಮ್ಮ ನಿತ್ಯಜೀವನಕ್ಕೆ ಹತ್ತರೆ ಆದ, ನಮ್ಮ ಜಾಗೆಗಳಲ್ಲೇ ಇರ್ತ ಒಂದು ಫಲದ ಬಗ್ಗೆ ಇಷ್ಟೆಲ್ಲ ಇದ್ದಾ?
ತರಕಾರಿಯೂ ಅಪ್ಪು, ಹಣ್ಣುದೇ ಅಪ್ಪು, ಮರಮಟ್ಟಿಂಗೆ ಆವುತ್ತ ಜಾತಿಮರವೂ ಅಪ್ಪು – ಎಲ್ಲವೂ ಅಪ್ಪು!

ಇದರ್ಲಿಪ್ಪ ಬಹುಜಾತಿ, ಬಹುರುಚಿ, ಬಹುವಿಧಂಗಳ ಗುರ್ತ ಮಾಡಿಗೊಂಬ°. ಇದರ ವೈವಿಧ್ಯತೆಯ ರುಚಿ ಅನುಭವಿಸುವ°.
ಇದೆಲ್ಲವೂ – ಇನ್ನೊಂದೆರಡು ವಾರಲ್ಲಿ ಮುಗುದೇ ಹೋವುತ್ತ ನಮುನೆದು.
ಮತ್ತೆ ಏನಿದ್ದರೂ ಬಪ್ಪೊರಿಶ ಒರೆಂಗೆ ಕಾಯೇಕು. ಹಾಂಗಾಗಿ, ಈ ಒರಿಶ ಹಲಸು ಮುಗಿತ್ತರ ಮದಲೇ ಇಪ್ಪ ಹಲಸಿನ ಕಾಯಿ ಹಣ್ಣುಗಳ ಸರಿಯಾಗಿ ಬಳಸಿಗೊಂಬ°.

ಒಂದೊಪ್ಪ: ಹಲಸು ಹಳಸಿರೆ ಸಾರ ಇಲ್ಲೆ, ಹಲಸು ಬಳಸುವ ಮನಸೇ ಹಳಸಿರೆ!?

ಸೂ: ನಿಂಗಳೂ ಈ ಸರ್ತಿ ಹಲಸಿಲಿ ವಿಶೇಷದ್ದು ಎಂತಾರು ಮಾಡಿದ್ದರೆ ಬೈಲಿಂಗೆ ಹೇಳಿ, ಆತಾ?

56 thoughts on “ಹಳಸುವ ಮೊದಲು ಹಲಸಿನ ಬಳಶಿಗೊಳಿ..!

  1. ಲಾಯ್ಕ ಬರವಣಿಗೆ. ಒಂದರಿ ಎಲ್ಲಾ ನೆಂಪಾತು.

    ನಮ್ಮ ಹಿರಿಯರ ಗ್ರೆಹಿಶಿರೆ ಹೆಮ್ಮೆ ಆವುತ್ತು. ಪ್ರಕ್ರುತಿದತ್ತವಾದ ಎಲ್ಲವನ್ನ ಅವು 100% ಉಪಯೊಗಿಸಿಗೊಂಡಿತ್ತವು. ಯಾವುದನ್ನುದೆ ಇಡುಕ್ಕವು. ಎಲ್ಲದರಲ್ಲಿ ಒಂದು ಉಪಯೊಗ ಕಂಡು ಹಿಡಿಗು. ಎಷ್ತೊಂದು ತರಕರಿಗಳ ಓಡು, ಚೊಲಿ, ತಿರುಳು ಉಪಯೊಗಿಸಿ ಚಟ್ನಿ, ತಾಳು ಮಾಡ್ತವು. ಇಂತಹ ಒಂದು ಅನನ್ಯ ಸಂಸ್ಕ್ರುತಿಯ ಭಾಗವದ ನಾವೆ ಧನ್ಯರು.

  2. ಒಪ್ಪಣ್ಣ ಭಾವ ನಿನ್ನ ದಿಸೆಲಿ ಆಗ..!! ಇದರ ಓದಿ ನವಗೆ ಬಾಯಿಲಿ ನೀರು ಬತ್ತನ್ನೆ..ಕೊಟ್ಟಿಗೆ ತಿನ್ನೆಕು ಹೇಳಿ ಕೊದಿಯಾವುತ್ತು..
    ಈಗ, ಆಟಿ ಸಮಯಲ್ಲಿ, ಹಲಸಿನ ಹಣ್ಣು ಎಲ್ಲಿ ಹುಡುಕ್ಕೆ೦ಡು ಹೋಗಲಿಯಪ್ಪಾ.. ಚೇ..!! 🙁

    ಎನೇ ಆಗಲಿ.. ಲಾಯಕೆ ವಿವರಣೆ ಕೊಟ್ಟಿದೆ ಭಾವ.. ಕೊಶಿಯಾತು.. 🙂

  3. ಒಪ್ಪಣ್ಣ ಲೇಖನ ತುಂಬ ಲಾಯಿಕ ಆಯಿದು.ಹಲಸಿನ ಹಣ್ಣಿ೦ದ ರವೆದೆ ಮಾಡ್ಲೆ ಆವ್ತು. ಎನ್ನ ಅಮ್ಮ ಮಾಡ್ತು.ತುಂಬ ಲಾಯಿಕ ಆವ್ತು.

  4. ಒಪ್ಪಣ್ಣೋ! ಹಲಸಿನ ಬಗ್ಗೆ ಸಂಗ್ರಹಯೋಗ್ಯ ತಿಳುವಳಿಕೆ ಕೊಟ್ಟಿದೆ! ಸುಂದರ ನಿರೂಪಣೆ, ಏವತ್ತಿನ ಹಾಂಗೆ, ಒಟ್ಟಾರೆ ಎಲ್ಲರ (ಎನ್ನನ್ನೂ ಸೇರ್ಸಿ) ಬಾಯಿಲೂ ನೀರೂರಿಸಿಬಿಟ್ಟೆ ನೀನು! ಹಲಸಿನ ಖಾದ್ಯಂಗ ಅಲ್ಲದ್ದೇ ಪ್ರತಿಯೊಂದು ಉಪಯೋಗವನ್ನೂ ನೆನಪ್ಪು ಮಾಡಿದ್ದು ಪಷ್ಟಾಯಿದು.. ಓದಿಗೊಂಡು ಹೋದ ಹಾಂಗೆ ಮನೆಯ ತೋಟಲ್ಲಿ ಉದ್ದತಟ್ಟಿಲಿಪ್ಪ ಮಲ್ಲಿಗೆಬೊಕ್ಕೆಯ ನೆಂಪಾತು.. ಅದರಿಂದಲೇ ಆಚಿಕೆ ಸೊಳೆ ಹೊರಿತ್ತ ಮರ.. ಇತ್ಲಾಗಿ ಒಂದು ತುಳುವ.. ಹಪ್ಪಳಕ್ಕೆ ಯೋಗ್ಯವಾದ್ದು ಬೇರೆಯೇ ಇದ್ದತ್ತು.. ನೋಡ್ತಾ ಇದ್ದ ಹಾಂಗೆ ಆ ಮರಂಗೋ ಎಲ್ಲ ಮರೆಯಾಯಿದು.. ಪರಿಸ್ಥಿತಿಯೋ, ದುರಾಸೆಯೋ ಅಂತೂ ಮರಂಗೋ ಎಲ್ಲ ಕೊನೆಯ F – Furniture ಆಗಿ ತೋಟಂದ ಕಾಣೆಯಾಯಿದವು! ಮತ್ತೆ ಪುನಾ ಅಂಥಾ ವೈವಿಧ್ಯವ ಬೆಳೆಶುಲೆಡಿಗೋ ಹೇಳುದು ಎನಗೆ ಉತ್ತರ ಸಿಕ್ಕದ್ದ ಪ್ರಶ್ನೆ! 🙁
    ಒಂದೊಪ್ಪ ಸೂಪರು.. ಒಂದೊಪ್ಪವ ವಿವರ್ಸಿಯೇ ಇನ್ನೊಂದು ಶುದ್ದಿ ಬರವಕ್ಕೋಳಿ! 😉

  5. (ಛೆ, ಈಗ ಹಲಸಿನ ಹಣ್ಣು ಇದ್ದಿದ್ದರೆ, ಒಟ್ಟಿಂಗೆ ಜೇನವೂ ಇದ್ದಿದ್ದರೆ ಅದ್ದಿ ಅದ್ದಿ ತಿಂಬಲಾವುತಿತು- ಹೇಳಿಗೊಂಡು!)
    ಒಪ್ಪಣ್ಣ… ಇದು ಹೀಂಗೆ ಇರೆಕ್ಕಿತೋ ಹೇಳಿ…”ಈಗ ಹಲಸಿನ ಹಣ್ಣು ಇದ್ದಿದ್ದರೆ ಜೇನಿಲಿ ಅದ್ದಿ ತಿಂಬಲಾವ್ತಿತ್ತು… ಆದರೆ ಜೇನೇ ಇಲ್ಲೆನ್ನೆ… 🙁 ”
    ಹೇಳಿರೆ… ಒಂದರ ಹೇಳುವಗ ಇನ್ನೊಂದು ಇದ್ದು ಹೇಳ್ತ ಭ್ರಮೆ ಬರೆಕ್ಕು… ಆದರೆ ನಿಜವಾಗಿ ಏವದೂ ಇರ್ತಿಲ್ಲೆ…

  6. ಸುಂದರನಾ…!!! ಅದರ ವೈವಾಟು ಆಗ. ಆದಕ್ಕೆ ಈ ಆಟಿಲಿ ತೋಟಕ್ಕೆ ಮದ್ದು ಬಿಟ್ಟೇ ಪೂರೈಸುತ್ತಿಲ್ಲೆ. ಅಲ್ಲದ್ದೆ ಅದು ಅಡಕ್ಕೆ ಮರಕ್ಕೆ ಹತ್ತಿದ್ದು ಅಲ್ಲಿಂದಲೇ ಹಲಸಿನಕಾಯಿ ಬಲುಗುದು. ಎಂಗಳ ಮರ ಮನೆ ಹಿಂದಾಣ ಗುಡ್ಡೆಲಿ ಇಪ್ಪದು… ಅಲ್ಲಿ ತೋಟ ಇಲ್ಲೆ.

  7. ನಿಂಗೊಗೆ ಹತ್ತುಲೆ ಎಡಿಯದ್ದರೆ ತಲೆಬೆಶಿ ಬೇಡ, ಸುಭಗಣ್ಣಂಗೆ ಹೇಳ್ತಿತ್ತರೆ ಸುಂದರನ ಕಳುಸಿತ್ತಿದ್ದವು. ಮರಲ್ಲಿ ಎಷ್ಟು ಕೊಡಿಲಿ ಇದ್ದರೂ ಕೊಕ್ಕೆ ಹಾಕಿ ಬಲುಗಿ ತೆಗವಲೆ ಸುಂದರಂಗೆ ಎಡಿಗಡ. ಮೂರ್ಸಂದಿಲಿ ಮಾಂತ್ರ ಅದಕ್ಕೆ ಎರಡೆರಡು ಕಾಂಬದು, ಅಷ್ಟೆ. !

  8. ಎನ್ನ ಊರಿನ ಎಡ್ರಾಸು ಕೊಟ್ಟರೆ ಅಕ್ಕೋ…? ಮರದ ಕೊಡೀಲಿ ಇನ್ನುದೆ ನಾಲ್ಕು ಒಳುದ್ದು… ಎನಗೆ ಕೊಯ್ವಲೆ ಎಡಿಗಾಯಿದಿಲ್ಲೆ…
    ನಿಂಗೊಗೆ ಮರ ಹತ್ತುಲೆ ಎಡಿಗ?

  9. ಎನ್ನ ಊರಿನ ಎಡ್ರಾಸು ಕೊಟ್ಟರೆ ಅಕ್ಕೋ…? ಮರದ ಕೊಡೀಲಿ ಇನ್ನುದೆ ನಾಲ್ಕು ಒಳುದ್ದು… ಎನಗೆ ಕೊಯ್ವಲೆ ಎಡಿಗಾಯಿದಿಲ್ಲೆ…
    ನಿಂಗೊಗೆ ಮರ ಹತ್ತುಲೆ ಎಡಿಗ?

  10. ನಿನ್ನೆ ಊರಿಂಗೆ ಹೋದವ ಈ ವರ್ಷದ ಕಡೆಯಾಣ ಹಲಸು 3 ತೆಕ್ಕೊಂಡು ಬೈಂದೆ… ಇನ್ನು ಬಪ್ಪ ವರ್ಷದವರೆಗೆ ಕಾಯೆಕ್ಕು…ಛೆ…. 🙁

    1. ನಮಸ್ಕಾರ ಶ್ಯಾಮಣ್ಣ,.. ನಿಂಗಳ ಎಡ್ರಾಸು ಹೇಳ್ತಿರೋ..?

  11. ಶುದ್ದಿ ಪಷ್ಟಾಯಿದು ಃ-) {“ಹಲಸು ಹಳಸಿರೆ ಸಾರ ಇಲ್ಲೆ, ಹಲಸು ಬಳಸುವ ಮನಸೇ ಹಳಸಿರೆ!?”} – ವಾಹ್ ಇದು ಭಾರಿ ಲಾಯಿಕಾಯಿದು
    ಈ ಸರ್ತಿ ಊರಿ೦ಗೆ ಹೋದಿಪ್ಪಗ ನಿ೦ಗೊ ಬರದ ಬಗೆಗಳಲ್ಲಿ ಹೆಚ್ಚಿ೦ದರ ತಿ೦ದಿಕ್ಕಿ ಬೈ೦ದೆ ಎರಡೆ ದಿನಲ್ಲಿ !!
    ಉದಿಯಪ್ಪಗ ಹಲಸಿನ ಕಾಯಿ ದೋಸೆ, ಮಧ್ಯಾನಕ್ಕೆ ಹಲಸಿನಕಾಯಿ ಕೊದಿಲು,ತಾಳು,ಹಣ್ಣಿನ ಪಾಯಸ,ಹೊತ್ತೋಪಗ೦ಗೆ ಸುಟ್ಟವು,ಸೊಳೆಹೊರುದ್ದು,ಪುನಾ ಉದಿಯಪ್ಪಗ೦ಗೆ ಕೊಟ್ಟಿಗೆ,ಹಣ್ಣಿನ ದೋಸೆ, ಊಟಕ್ಕೆ ಹಲಸಿನಕಾಯಿ ಬೋಳುಬೆ೦ದಿ, ಮೆಲಾರ…ಹೀ೦ಗೆಲ್ಲ…ಆದರು ಹೊರಡುವಗ ಅಜ್ಜಿಗೆ ಬೆಜಾರು — ಗೆಣಸಲೆ ಮಾಡ್ಳೇ ಆತಿಲ್ಲೆನ್ನೇ ಹೇಳಿ…!!! 😉 😉
    ಆನು ಊರಿಲಿ ಇದರೆಲ್ಲ ತಿ೦ದ ಶುದ್ದಿ ಕೇಳುದರೊಟ್ಟಿ೦ಗೆ ಒಪ್ಪಣ್ಣನ ಶುದ್ದಿಯನ್ನೂ ಓದಿ ಅಮ್ಮ೦ಗೆ ಜೋರು ಕೋದಿ ಆವ್ತಾ ಇದ್ದಡ್ಡ ಃ-)

  12. ಹಲಸಿನ ಸೊಪ್ಪಿನ ಕೊಟ್ಟೆ ಮಾಡಿ ಕೊಂಕಣಿಗೊ ಕೊಟ್ಟಿಗೆ ಮಾಡುಗು.ಬೇಳೆಯ ಜಾಮ್ ಮಾಡ್ತ ಕ್ರಮ ನಿನ್ನೆಯೋ ಮನ್ನೆಯೋ ಪೇಪರಿಲ್ಲಿ ಬ್ಂದಿದ್ದತ್ತು.ನಾವು ಸ್ಜಹಕ್ಕರೆ ಹಾಕಿದ್ದು ತಿಂಬದು ಕಮ್ಮಿ ಅದಾ,ಹಾಂಗಾಗಿ ಅಳಿಯಂದ್ರ ನೆಂಪಾಯಿದಿಲ್ಲೆ.
    ಉಪ್ಪಿಲಿ ಹಾಕಿ ಮಡಗಿದ ಸೊಳೆ ಮುಗಿಯದ್ದರೆ ಮಳೆಗಾಲ ಮುಗಿವಲಪ್ಪಗ ಹಪ್ಪಳ ಮಾಡ್ಳಾವುತ್ತು.
    ಆನು ಸಣ್ಣಾಗಿಪ್ಪಗ ನೇಜಿಗೆ ಬಂದ ಆಳುಗೊಕ್ಕೆ ಖಾರ ಆಗಿ ಸೊಳೆ ಬೆಂದಿ ಮಾಡುಗು,ಎಂಗೊ ಮಕ್ಕೊಗೆ ಖಾರ ಹೇಳಿ ಎನ್ನಮ್ಮ ಉಂಬಲೆ ಬಿಡ.ಈಗ ಆಳುಗಳೂ ಇಲ್ಲೆ,ಮನಗೆ ಹೋಗಿ ಬೆಂದಿಗೆ ಕಾಯುವ ಪುರುಸೊತ್ತೂ ಇಲ್ಲೆ.

  13. ಒಪ್ಪಣ್ಣಾ,
    ಹಲಸಿನ ರೆಸಿಪಿಗಳ ನೋಡಿ ಬಾಯಿಲಿ ನೀರು ಬಂತು. ಹಲಸಿನ ಉಪಯೋಗಂಗಳ ನೆನಪುಮಾಡಿದ್ದಕ್ಕೆ ಧನ್ಯವಾದಂಗೊ.

  14. ಒಪ್ಪಣ್ಣೋ……..,

    ಹಲಸು ನಮ್ಮ ಕುಲದೇವರನ್ನೆ!! ಹಲಸಿನ ಕಾಲಕ್ಕೆ, ಬೇಕು ಬೇಕಾದ ಹಾಂಗೆ ಬಗೆ ಬಗೆ ವಿಭವಂಗಳ ಮನೆಲಿ ಮಾಡಿ ಎಲ್ಲೋರೂ ಸವಿಯದ್ದರೆ ಪ್ರಕೃತಿಮಾತೆಯೂ ಕೋಪುಸುಗು. ಹಲಸಿನ ವೈವಿಧ್ಯಂಗಳ ಒಂದು ಶುದ್ದಿಲಿ ಹೇಳಿ ಮುಗಿಯ. ಅದು ಅನಂತ. ಈ ಶುದ್ದಿಲಿ ಏವುದಾದರೂ ಬಿಟ್ಟು ಹೋದರೆ ಇನ್ನೊಂದು ಶುದ್ದಿ ಬರವ°. ಎಲ್ಲೋರಿಂಗೂ ಗೊಂತಿಪ್ಪ ವಿಷಯದ ಒಟ್ಟಿಂಗೆ ಗೊಂತಿಲ್ಲದ್ದನ್ನೂ ಸೇರ್ಸಿ ಹೇಳುದು ಒಪ್ಪಣ್ಣನ ಶೈಲಿ ಅಲ್ಲದೋ?? ಶುದ್ದಿ ತುಂಬಾ ಲಾಯ್ಕಾಯಿದು.

    ಮಾಷ್ಟ್ರುಮಾವನ ಹತ್ತರೆ ಮಾತಾಡಿದ ಕಾರಣ ಹೊಸ ವಿಷಯ ಸಿಕ್ಕಿತ್ತಲ್ಲದಾ? ಹಲಸಿನ ವಿವಿಧತೆಗ ಹೇಂಗೆ ಹೇಳಿ ಮುಗಿಯದ್ದದೋ ಹಾಂಗೆ ಮಾಷ್ಟ್ರುಮಾವನ ಅನುಭವದೇ!! ಅದುದೇ ನಿತ್ಯವೂ ಹೊಸತ್ತೇ!!!! ಮೊಗದಷ್ಟೂ ಸಿಕ್ಕುತ್ತು.

    ನೆಗೆಮಾಣಿಂದ ಬೇಗ ಒಪ್ಪಣ್ಣಂಗೆ ಇಂಗ್ಳೀಷು ಬಂತೋ ಕಡೆಗೆ!!! 😉 ಇಂಗ್ಳೀಷಿಲಿ ಹೇಳಿದ್ದು ಲಾಯ್ಕಾಯಿದು…

    ಅಪ್ಪೋ ಒಪ್ಪಣ್ಣ, ಹಲಸಿನ ವಿಷಯ ಹೇಳುವಾಗ ಹಲಸಿನ ಹಣ್ಣು ಕೊರವ ಪಟ ಬಯಿಂದಿಲ್ಲೆನ್ನೆ? 😉 😉
    ದೊಡ್ಡಭಾವ° ಹಣ್ಣು ಕೊರವ ಪಟ ಅಲ್ಲ 😉 ದೊಡ್ಡಭಾವ° ಬೈಲಿಂಗೆ ಕಳ್ಸಿದ ಹಣ್ಣಿನ ನಮ್ಮ(ಮಾಮಾ) ಮಾಣಿ ಕೊರೆತ್ತ ಪಟ ನೆರೆಕರೆಲಿ ಬಾರೀ ಸುದ್ದಿ ಮಾಡಿದ್ದತ್ತು. 😉 😉 ಹಾಂಗಿಪ್ಪ ಪಟ ಹಾಕದ್ದರೆ ಶುಬತ್ತೆಯ ಮಕ್ಕೊಗೆ ಹಣ್ಣು ಕೊರೆತ್ತದು ಹೇಂಗೆ ಹೇಳಿ ಗೊಂತಾಗ ಇದಾ!!! 😉

    ಒಪ್ಪಣ್ಣ್ಣ, ಶುದ್ದಿ ಕುಶಾಲಿನ ಒಟ್ಟಿಂಗೆ ಸೇರಿ ಲಾಯ್ಕಾಯಿದು ಆತೋ. ಸುಭಗಣ್ಣನ ಕತ್ತಿ ಬಾಕಿ ಆದ ಕತೆ ಪುನಾ ಒಂದರಿ ಬೈಲಿಲಿ ನೆಂಪಾದ ಹಾಂಗೆ ಆತು. ಅಂದು ಕತ್ತಿ ಸುಲಾಬಲ್ಲಿ ಸಿಕ್ಕಿದ ಕಾರಣ ಅಂಬಗ ಬೈಗಳು ಸಿಕ್ಕಿದ್ದಿಲ್ಲೆಡ್ಡ. ಈ ಶುದ್ದಿಯ ಓದಿ ಅಪ್ಪಗ ಮನೆದೇವರಿಂಗೆ ಸತ್ಯ ಗೊಂತಕ್ಕೋ!!!! 😉

    ಒಪ್ಪಣ್ಣ,

    ಪ್ರಕೃತಿ ನವಗೆ ಇನ್ನೊಂದು ಕಲ್ಪವೃಕ್ಷದ ಹಾಂಗೆ ಕೊಟ್ಟದು ಹಲಸು. ಇದರ ಪ್ರತಿಯೊಂದು ಭಾಗವೂ ಒಂದಲ್ಲ ಒಂದು ರೀತಿಲಿ ನವಗೆ ಉಪಯೋಗಕ್ಕೆ ಬಪ್ಪಂಥದ್ದೆ!!! ಸಣ್ಣವರಿಂದ ಹಿಡುದು ದೇವರವರೆಗೆ ಎಲ್ಲೋರಿಂಗೂ ಹಲಸು ಒಂದಲ್ಲ ಒಂದು ರೀತಿಲಿ ಪ್ರಿಯವೇ!!! ನಮ್ಮ ಬೈಲಿಲಿಯೇ ಇಪ್ಪ ಈ ಮರದ, ಹಣ್ಣಿನ ಗುಣ ವಿಶೇಷಂಗಳ ಇನ್ನುದೇ ತಿಳ್ಕೊಂಡು ಅದರ ಹೆಚ್ಚು ಉಪಯೋಗಿಸುವ°. ಹಲಸು ಅಪ್ಪ ಸಮಯಲ್ಲಿ ಅದರ ಉಪಯೋಗ ಮಾಡಿ, ಇಲ್ಲದ್ದ ಸಮಯಕ್ಕೆ ಒಳಿಶಿ ಮಡಗಿ ಮತ್ತೆಯೂ ಅದರ ಉಪಯೋಗ ಮಾಡಿ, ಉಂಡು ಸಂತೃಪ್ತರಪ್ಪೋ°.

    ಒಂದೊಪ್ಪ ಲಾಯ್ಕಾಯಿದು.

  15. ಹಲಸಿಂದ ವೈವಿಧ್ಯ ಅಡಿಗೆ, ಮೇಣ್ದ ಮತ್ತೆ ಮರದ ಉಪಯೋಗ (ನಾಕು F), ಎಲ್ಲವೂ ತುಂಬಾ ವಿವರವಾಗಿ ಒದಗಿಸಿ ಕೊಟ್ಟಿದೆ.
    ಕಳ್ಳಿಗೆಯ ರುಚಿ ನೋಡಿದ್ದಿಲ್ಲೆ. ನೋಡೆಕ್ಕು ಅನ್ಸುತ್ತು.
    “ಹಸಿದು ಹಲಸು, ಉಂಡು ಮಾವು” ಹೇಳಿ ಒಂದು ಗಾದೆ ಇದ್ದು.
    ಹಶು ಆಗಿಂಡಿಪ್ಪಗ ಒಳ್ಳೆ ಹಣ್ಣು ಸಿಕ್ಕರೆ ಮತ್ತೆ ಊಟ ಬೇಕಾಗ ಅಲ್ಲದಾ?
    ಹಲಸು ಒಂದು ಉದ್ಯಮ ಆಗಿ ಬೆಳದರೆ ಎಷ್ಟೋ ಕೈಗೆ ಕೆಲಸ ಅಕ್ಕು, ವ್ಯರ್ಥ ಆಗಿ ಹೋವ್ತ ಹಣ್ಣು ಆಹಾರ ಆಗಿ ಉಪಯೋಗ ಅಕ್ಕು.
    ತಮಿಳ್ನಾಡಿನ ಪನ್ರುತ್ತಿ ಹೇಳ್ತಲ್ಲಿ 51 ಕಿಲೋ ಭಾರದ ಹಲಸು ಆಗಿ ದಾಖಲೆ ಮಾಡಿದ್ದಡ.
    ಇಷ್ಟವಾದ ಹಣ್ಣಿನ ಬಗ್ಗೆ ಇಷ್ತವಾದ ಶುದ್ದಿ ಹೇಳಿ ಒಂದೊಪ್ಪ

  16. ಬಾರಿ ಲಾಯಿಕಾಯಿದು ಬರದ್ದು. ಈ ವರ್ಷ ಹಲಸಿನಹಣ್ಣು ಎರಡೇ ಎರಡು ಸೊಳೆ ತಿ೦ದದು. ಓದಿ ಅಪ್ಪಗ ಆಶೆ ಅವ್ತು, ತಿನ್ನಕ್ಕು ಹೆಳೀ.ಅಮ್ಮ ಮಾದಿಗೊ೦ಡು ಇತ್ತ ದೋಸೆ,ಪಾಯಸ ,ಸೊಳೆ ಹೊರುದ್ದು, ಎಲ್ಲಾ ನೆನಪ್ಪಾತು.

  17. ಹಲಸಿನ ಹಲವು ಬಗೆ ಖಾದ್ಯಂಗಳ ಪಟ್ಟಿ ಓದಿಯೆ ಹೊಟ್ಟೆ ತುಂಬಿತ್ತು. ಶುದ್ದಿ ಒಳ್ಳೆ ಸೀವಾಯಿದು…!

  18. ಒಪ್ಪಣ್ಣೊ, ಹಲಸಿನಣ್ಣಿನ ಶುದ್ದಿ ಬರದ್ದೆ ಹೇಳಿ ಗೊಂತಾತು.. ನವಗೆ ಹಲಸಿನಣ್ಣು ಹೇಳಿದರೆ ಬಾರೀ ಹತ್ತರೆ ಅಲ್ಲದೋ..? ಹಾಂಗೆ ಅದರ ಪರಿಮ್ಮಳವೇ ಬೈಲಿಂಗೆ ಎಳಕ್ಕೊಂಡು ಬಂತದಾ…
    ಕೊಶೀ ಆತು ಬರದ್ದರ ಓದಿ… ಹಲಸಿನಣ್ಣಿನ ಸಂಗತಿ ಹೇಳಿ ಮುಗಿಯಪ್ಪ..
    ಹೇಳಿದಾಂಗೆ ಬೇಳೆ-ಕೆಸವಿನ ಬೆಂದಿಯುದೇ ಮಾಡುಲಾವುತ್ತು.. ಈ ಬೇಳೆದು ಸುಮಾರೆಲ್ಲ ಉಪಯೋಗ ಇದ್ದಪ್ಪ…
    ಮತ್ತೆ ಮದಲಿಂಗೆಲ್ಲ, ಎಂತ ಇಲ್ಲದ್ದಿಪ್ಪಾಗ ಒಂದು ಹೊತ್ತು ಹಲಸಿನಣ್ಣಿನ ತಾಳ್ಳನ್ನೇ ತಿಂದುಗೊಂಡಿದ್ದದ್ದೂ ಇದ್ದು ಹೇಳುವ…
    ಅಲ್ಲ ಅಂಬಗ ಮೂರು ಹೊತ್ತು ಹಲಸಿನಣ್ಣು ತಿಂದರೂ ಏನಾಗ.. ಈಗಾಣವಕ್ಕೆ ಮಾತ್ರ ಆಗದ್ದೆ ಬಪ್ಪದು.. ತಿಂದದರ ಕರಗುಸುವಷ್ಟಾದರೂ ಕೆಲಸ ಮಾಡದ್ದರೆ ಮತ್ತೆ ಆಗದ್ದೆ ಬಾರದ್ದಿಕ್ಕೊ..

  19. ಹಲಸಿನ ಬೇಳೆಯ ಒಣಗ್ಸಿ ಹೊಡಿ ಮಾಡಿ ಪುನಃ ಬೆಶಿಲಿಲ್ಲಿ ಸರೀ ಒಣಗ್ಸಿ ಮಡುಗಿರೆ ಅದರ ಜೋಳದ ಹೊಡಿಯ (Corn Flour) ಬದಲಿಂಗೆ ಉಪಯೋಗಿಸಲೆ ಆವುತ್ತಡ.

  20. ಹಲಸು ಹಲವು ವಿಧದ ತಿಂಡಿಗೆ ಆವುತ್ತು.ಗೂಂಜು ಕೂಡಾ ಪಚ್ಚಡಿಗೆ ಆವುತ್ತು ಹೇಳಿ ಬೇಕಲ ರಾಮನಾಯಕನ ಐತಿಹಾಸಿಕ ಕತೆಲಿ ಇದ್ದು!ಕೇರಳಲ್ಲಿ ಈಚೆಗೆ ಹಲಸಿನ ಉತ್ಪನ್ನಗಳ ಬಗ್ಗೆ ಪ್ರಚಾರಕ್ಕೆ ಕಾರ್ಯಕ್ರಮ ಮಾಡಿದ್ದವು.ನಿಜವಾಗಿ ಹಲಸಿಲಿ ವಾಣಿಜ್ಯ ಉದ್ದೇಶಲ್ಲೂ ಉತ್ಪನ್ನಂಗಳ ಮಾಡಿ,ಯಶಸ್ವಿ ಎನ್ನಿಸಿಕೊಂಬಲೆ ಎಡಿಗು.ಉತ್ತಮ ಬರಹ.

  21. ವಾಹ್ ತುಂಬಾ ರುಚಿ ರುಚಿಯಾದ ಲೇಖನ ಒಪ್ಪಣ್ಣ.
    ತುಂಬಾ ಆಶೆ ಅವ್ತು ಇದರೆಲ್ಲ ತಿನ್ನೆಕ್ಕು ಹೇಳಿ.
    ಕಳುದ ವರ್ಷ ಊರಿಲ್ಲಿ ಇದ್ದ ಕಾರಣ ಕೆಲವೆಲ್ಲ ಸಿಕ್ಕಿದ್ದು.
    ಸಣ್ಣ ಇಪ್ಪಗಾಣಂದ ಹಿಡುದು ಈಗವರೆಗೆ ಎಲ್ಲರು ಸೇರಿ ಮಾಡುವ ಹಲಸಿನ ಅಜಪ್ಪುವಲ್ಲಿಂದ ಹಿಡುದು ಬೇರೆ ಬೇರೆ ಖಾದ್ಯ ಮಾಡಿ ತಿಂಬಲ್ಲಿವರೆಗಾಣದ್ದು ನೆಂಪಾತು. ಹಲಸಿನ ಮೇಣದ ಉಂಡೆ ಯ ಕೋಲು ಈಗ ಮಾತ್ರ ಕಾಂಬಲೆ ಅಪರೂಪವೊ ಹೇಳಿ.
    ಉಪ್ಪಿನ ಸೊಳೆಯ ಒಡೆದೆ ಲಾಯ್ಕ ಅವ್ತು.
    ಉಪ್ಪಿನ ಸೊಳೆಯ ಹೊರಿವದು ಮಾಡ್ತವು.
    ಉಪ್ಪಿನ ಸೊಳೆ ಮತ್ತೆ ಹಲಸಿನಕಾಯಿ/ಹಣ್ಣು ಹಪ್ಪಳ ಎಲ್ಲವೂ ರುಚಿಯೆ ರುಚಿ.
    ಸೊಳೆ ರೊಟ್ಟಿಗೆ ಬೆಲ್ಲ+ತುಪ್ಪ ಕಲಸಿ ತಿಂಬಲೆ ಭಾರಿ ರುಚಿ.
    ಅತಪ್ಪ ಆನು ಬರವದು ನಿಲ್ಸುತ್ತೆ, ಇಲ್ಲದ್ರೆ ಒಂದೊಂದೇ ನೆಂಪಾಗಿ ಆಶೆ ಅವ್ತು, ಸಾಲದ್ದಕ್ಕೆ ಇಲ್ಲಿ ಮಳೆ ಬೇರೆ ಬತ್ತಾ ಇದ್ದು.
    ಬಪ್ಪ ವಾರಕ್ಕೆ ಕಾಯ್ತೆ.
    ಸುಮನಕ್ಕ

  22. ಹಲಸಿನಕಾಯಿ ಬೇಯಿಸಿ ಅದಕ್ಕೆಉಪ್ಪು ಕಾರ ಜೀರಿಗೆ ಹಾಕಿ ಕಡದು ಕಾರದ ಹಪ್ಪಳಮಾಡಿರೆ ಇದು ಊಟಕೆ ಪಷ್ಟು ಅವುತ್ತು.
    ಹಣ್ಣಿನ ಬೇಯಿಸಿ ಅದಕ್ಕೆ ಚೂರು ಉಪ್ಪು ಹಾಕಿ ಕಡದು ಬಾಳೆಲೆಲಿ ಹಪ್ಪಳ ಹಾಕಿ ಬಿಸಿಲಿಲಿ ಒಣಗುಸಿ ಗಾಳಿ ಆಡದ ಡಬ್ಬಿಲಿ ಹಾಕಿ ಇಟ್ಟರೆ – ಮಕ್ಕೊಗೆ ದೊಡ್ಡವಕ್ಕೆ ಎಲ್ಲೊರಿಂಗೂ ಚಾಕೊಲೇಟಿನ ಹಾಂಗೆ ತಿಂಬಲೆ ಲಾಯಿಕ ಆವುತ್ತು.

  23. ಹಲಸು ನಮ್ಮ ಆಹಾರದ ಅವಿಬಾಜ್ಯ ಅಂಗ.
    ಅದರ ವಿವಿದ ಅಡಿಗೆಗಳ ವಿವರಣೆ ಬಾರೀ ಲಾಯಿಕ ಆಯಿದು ಒಪ್ಪಣ್ಣೋ… ಎಷ್ಟೆಲ್ಲಾ ಬಗೆ ಅಡಿಗೆ ಮಾಡುಲೆ ಆವುತ್ತು!
    ಒಂದು ಊರಿಲಿ ಒಂದು ರೀತಿ ಅಡಿಗೆ ಆದರೆ ಇನ್ನೋಂದು ಮತ್ತೊಂದು ರೀತಿ..ಬಹುಶ್ಶ ಇಷ್ಟು ವಿದದ ಅಡಿಗೆ ಮಾಡುವ ತರಕಾರಿ ಬೇರೆ ಯಾವದೂ ಇರ..
    ನಮ್ಮೋರು ಸಾದಾರಣ ವರ್ಶ ಇಡೀ ಒಂದಲ್ಲದ್ದರೆ ಒಂದು ವಿದಲ್ಲಿ ಅಡಿಗೆಲಿ ಉಪಯೋಗಿಸುತ್ತ ಹಲಸಿನ ಬಿಡುಲೆ ಎಡಿಗಾ??
    ಈಗ ಈಗ ಜನರಲ್ಲಿ ಹಲಸಿನ ಬಗ್ಗೆ ಒಲವು ಹೆಚ್ಚಾವುತ್ತಾ ಇದ್ದು.. ಅಲ್ಲಲ್ಲಿ ಹಲಸಿನ ಮೇಳ, ಚರ್ಚಾಗೋಷ್ಟಿ ನಡೆತ್ತಾ ಇದ್ದು ನಮ್ಮೋರಿಲಿ ಒಬ್ಬ ಬಾವ ಎಲ್ಲೋರೂ ರಬ್ಬರ್ ಸೆಸಿ ನೆಡುವಗ ಗುಡ್ಡೆ ಗರ್ಪ್ಪಿ ಹಲಸಿನ ತೋಟ ಮಾಡಿದ್ದವು. ಹಲಸಿಂಗೂ ರಾಜ ಮರ್ಯಾದೆ ಸಿಕ್ಕುಲೆ ಸುರು ಆಯಿದು. ಎಲ್ಲಾ ತರಕಾರಿಗಳೂ ವಿಶಯುಕ್ತಾ ಅದಿಪ್ಪಗ ವಿಶರಹಿತ ಹಲಸು ನಿಜವಾಗಿಯೂ ಒಳ್ಳೆ ಆಹಾರ ಅಪ್ಪಲ್ಲದಾ.

    ಮದಲಿಂಗೆ ಉಪ್ಪಿಲಿ ಹಾಕಿದ ಸೊಳೆ+ಬೇಳೆ ಕೊಟ್ಟು ಇಡೀ ತೋಟಕ್ಕೆ ಸೊಪ್ಪು ಕಡಿಶುಗಡ ಮಳೆಕಾಲಲ್ಲಿ ಆಎಕ್ಕಾದ ಕೆಲಸಕ್ಕೆ ಕೇವಲ ಹಲಸಿನ ಕಾಯಿ ಮಾಂತ್ರ ಕೊಡುಗು.
    ಮೊದಲು ಅದಕ್ಕೆ ಅಷ್ಟೊಂದು ಬೆಲೆ ಇತ್ತು.

    ಒಂದೋಂದು ಮನೆಗಳಲ್ಲಿ ಮಣು ಲೆಕ್ಕಲ್ಲಿ ಮೇಣ ರೂಡಿ ಮಾಡಿ ಮಡುಗುಗು ಮಳೆಕಾಲ ಬರೆಕ್ಕಾರೆ ಹೊಳೆಲಿ ಓಡ ಇಪ್ಪೋವು ಬಂದು ಮೇಣವ ಒಳ್ಳೆ ಕ್ರಯ ಕೊಟ್ಟು ಕೊಂಡು ಹೋಕು.
    ಓಡಕ್ಕೆ ಹಲಸಿನ ಮೇಣ+ಬೀಜದ ಎಣ್ಣೆ ಬೆರಕ್ಕೆ ಮಾಡಿ ಉದ್ದಿದರೆ ಮಳೆಕಾಲಲ್ಲಿ ನೀರು ಎಳೆಯದ್ದೆ ತುಂಬಾ ಬಾಳ್ವಿಕೆ ಬಕ್ಕು.
    ಮತ್ತೆ ಓಡ ಒಟ್ಟೆ ಆಗಿದ್ದರೆ ಹಲಸಿನ ಮೇಣವ ಕಾಸಿ ಎರಗು ಅಲ್ಲಿಗೆ ಓಡ ಸರಿ ಅಕ್ಕು.
    ಹಲಸಿನ ಕಾಯಿ ಬಹುಉಪಯೋಗದ ಬಗ್ಗೆ ಬರದ್ದು ಬಾರೀ ಲಾಯಿಕ ಆಯಿದು ಒಪ್ಪಣ್ಣೋ.
    ಒಂದು ಒಪ್ಪ.

  24. ಲಾಯಿಕ ಆಯಿದು ಒಪ್ಪಣ್ಣ:)
    ಮೊನ್ನೆ ಆಪೀಸಿಲ್ಲಿ ಮದ್ಯಾಹ್ನ ಪಟ್ಟಾಂಗ ಹೊಡಕ್ಕೋಡು ಕೂದೊಂಡಿಪ್ಪಗ client ಒಬ್ಬ ಹಲಸಿನ ಹಣ್ಣು ತಂದು ಕೊಟ್ಟಿತ್ತಿದ್ದ. ೧೦ ಜೆನ ಕೂದೊಂಡು ತಿಂದು ಮುಗಿಶಿದೆಯ:):):):)

    1. (೧೦ ಜೆನ ಕೂದೊಂಡು ತಿಂದು ಮುಗಿಶಿದೆಯ)
      ಬೇಳೆ, ಪೊದುಂಕುಳು, ರೆಚ್ಚೆ, ಗೂಂಜು, ಮೇಣ, ಚೋಲಿಯನ್ನುದೆ ಬಿಟ್ಟಿದಿಲ್ಲಿಯಡ… 😉 :O

  25. ಲೇಖನ ಚೆಂದ ಆಯಿದು.. ಬೇಳೆ ಉಂಡೆ ಮತ್ತು ಬೇಳೆ ಹೋಳಿಗೆ ಕೂಡ ಪಷ್ಟಾವುತ್ತು…

  26. ಹಲಸಿನಕಾಯಿಯ ಬೇಳೆ ಯ ಬೇಯ್ಸಿ, ರುಬ್ಬಿ ಅದ್ಕೆ ಅಕ್ಕಿಹಿಟ್ಟು ,ಮೆಣಸಿನ ಪುಡಿ, ಉಪ್ಪು,ಇ೦ಗು,ಜೀರಿಗೆ ಪುಡಿ ಹಾಕಿ ಚಪಾತಿ ಹಿಟ್ಟಿನ ಹಾಗೆ ಗಟ್ಟಿ ಕಲೆಸಿ..ಅದ್ರಿ೦ದ ನಿಪ್ಪಟ್ಟು, ಕೋಡುಬಳೆ, ಖಾರಾ ಶೇವು ಹಿ೦ಗೆಲ್ಲಾ ಮಾಡಿ ತಿ೦ದು ನೋಡಿ.
    ಬೇಳೆ ಬೇಯ್ಸಿ ರುಬ್ಬಿ,ತೆ೦ಗಿನಕಾಯಿ,ಜೋನಿಬೆಲ್ಲಾ ಹಾಕಿ ಪಾಕಬರ್ಸಿ ,ಅ೦ಬೊಡೆ ಹಾ೦ಗೆ ತಟ್ಟಿ ತುಪ್ಪ ಹಾಕಿ ಬೇಯ್ಸಿದ್ರೆ ಬೇಳೆಬುಡ್ಡಣ್ಣ ವಳ್ಳೇ ರುಚಿ…
    .ಈ ಮಳೆ ಜೋರ್ ಬ೦ದಾಗ ನಮ್ ಕಡೆ ಹೇಳ್ತೊ….ಮೂರು ಬೇಳೆ ಇದ್ದ೦ವ ಹೆರ೦ಗೆ ಹೋಗ್ತ್ನಿಲ್ಲೆ ಹೇಳಿ…
    ಹಲಸಿನಕಾಯಿ ಸೊಳೆದು ಹಪ್ಪಳ ಮಾಡು ಸುದ್ದಿನೆ ಇಲ್ಲೆ…ಹಣ್ಣಿ೦ದೂ ಹಪ್ಪಳ ಮಾಡಿ ಒಣಗಿಸಿ ಇಡವು….ಮಳೆಗಾಲ್ದಲ್ಲಿ ತಿ೦ಬ್ಲೆ ಚೊಲೊ ಆಗ್ತು….

  27. ಹಲಸಿನ ಕಾಯಿ ಬಗೆಲಿ ಒಪ್ಪಣ್ಣ ಬರದ ವಿಶೇಷ ಲೇಖನವ ರುಚಿರುಚಿಯಾಗಿ ಓದಿದೆ. ಹೆಂಡತ್ತಿ ಪ್ರೀತಿಲಿ ಮಾಡಿ ಕೊಟ್ಟ ಸೊಳೆ ಬೆಂದಿಯ ಉಂಡೊಂಡು ಈ ಶುದ್ದಿಯ ಓದಿದ್ದು ನಿಜವಾಗಿಯೂ ಮತ್ತೂ ಕೊಶಿ ಆತದ. ದೊಡ್ಡಬಾವನ ಮನೆಲಿ ಹಲಸಿನ ಕಾಯಿ ಕೊರದ ವರ್ಣನೆ ಲಾಯಕಾಯಿದು. ಕೊರೆತ್ತ ಎಡೆಲಿ ಒಪ್ಪಣ್ಣನ ಸ್ವಕಾರ್ಯವುದೆ ಆಗಿತ್ತು ಹೇಳಿರೆ, ಸೊಳೆಲಿ ತುಂಬಾ ತೇಮಾನು ಬಂದಿಕ್ಕು ಹೇಳಿ ಎನ್ನ ಅಂದಾಜು.
    ಸೊಳೆ ರೊಟ್ಟಿಲಿ ಕಂಡುಬತ್ತ, ಬೆರಳ ಗುರ್ತ ! ವಾಹ್. ಒಪ್ಪಣ್ಣ ಎಷ್ಟು ಸೂಕ್ಷ್ಮ ವಾಗಿ ನೋಡ್ತೆ ಹೇಳಿ. ಅದರ ವಿವರಣೆಯೇ ಕೊಶಿ ಕೊಡ್ತದು. ಇನ್ನೊಂದು ಹೊಡೆಲಿ ಬಾಳೆ ಕೀತಿನ ಚೆಂದದ ಗೆರಗೊ ಅಲ್ಲದೊ ? ಸಣ್ಣದಿಪ್ಪಗ ಸೊಳೆ ರೊಟ್ಟಿಲಿ, ಕಣ್ಣು , ಬಾಯಿ ಚಿತ್ರ ಬಿಡುಸಿ ಕಾವಲಿಗೆ ಹಾಕೆಂಡಿದ್ದಿದ್ದು ನೆಂಪಾತು. ಮನೆಯವರ ಎಲ್ಲೋರನ್ನು ಒಟ್ಟು ಸೇರುಸೆಂಡು ಹಲಸಿನ ಕಾಯಿಯ ಕೊರವಗ ಸಿಕ್ಕುತ್ತ ಕೊಶಿ ಬೇರೆಲ್ಲಿ ಸಿಕ್ಕುಗು ಅಲ್ಲದೊ ?

    ಹಲಸಿನ ಕಾಯಿ ಮೇಣದ ಉಪಯೋಗ ಆವ್ತದುದೆ ನೆಂಪಿಂಗೆ ಬಂತು.

    ಹೇಳಿದ ಹಾಂಗೆ, ಕುಜುವೆಯ ಉಪಯೋಗಿಸಿ ಮಾಡ್ತ “ಕುಜುವೆ ಮಂಚೂರಿ”, ಭಾರೀ ಲಾಯಕು ಆವುತ್ತು ಒಪ್ಪಣ್ಣಾ. ಇದರ ಎದುರು ಪೇಟೆಯ ಹುಳು ಹಿಡುಕ್ಕಟೆ “ಗೋಬಿ ಮಂಚೂರಿ”ಗುದೆ ನಾಚಿಕೆ ಅಕ್ಕು!!!

    ಇನ್ನು ಹಲಸಿನ ಕಾಯಿ ಹಪ್ಪಳ ಮಾಡ್ತ ಬಗೆಲಿ ಬರೆತ್ತರೆ ಇನ್ನೊಂದು ಲೇಖನವನ್ನೇ ಮಾಡ್ಲಕ್ಕು ಅಲ್ಲದೊ ? ಉತ್ತಮ ಲೇಖನ.
    ಕಡೇಣ ಒಪ್ಪವುದೆ ಲಾಯಕಾಯಿದು. ಈಗಾಣ ಮಕ್ಕೊಗೆ, ಹೆಮ್ಮಕ್ಕೊಗೆ, ಹಲಸು ಹೊಲಸು ಹೇಳಿ ಆಗದ್ದೆ ಅದರ ಅವು ಎಲ್ಲೋರು ಬಳಸುವ ಹಾಂಗಾಗಲಿ.

  28. Halasina bagge odiyappaga bayili neeru batha iddu. Especially bele holige. Idu alladde mannu methida beleya kendalli suttu haki timba nenapude aatu.

    Keep it up.

    1. ಸಾರಡಿಅಪ್ಪಚ್ಚಿಗೆ ನಮಸ್ಕಾರಂಗೊ.
      ಬೈಲಿಂಗೆ ಬಂದು ಶುದ್ದಿಗೆ ಒಪ್ಪಕೊಟ್ಟದು ತುಂಬ ಕೊಶಿ ಆತು.

      ಬೇಳೆ ಸುಟ್ಟಾಕುತ್ಸರ ಬೈಲಿಂಗೆ ನೆಂಪುಮಾಡಿಕೊಟ್ಟದು ಒಳ್ಳೆದಾತು.
      ಪಕ್ಕನೆ ಶುದ್ದಿಹೇಳಿಗೊಂಡು ಹೋಪಗ ಒಪ್ಪಣ್ಣಂಗೆ ಆ ವಿಶಯ ಮರದೇ ಹೋಗಿತ್ತದಾ..

      ಬಪ್ಪವಾರ ಬತ್ತೆ, ಮಣ್ಣುದ್ದಿದ ಬೇಳೆಯ ಸುಟ್ಟಾಕಿ ಕೊಡುವಿರೋ? 😉 😛

  29. ಎನ್ನ ಭಾರೀ ಇಷ್ಟದ ಹಣ್ಣು….ಕೆಲವೊಂದರಿ ಹಲಸಿನ ಹಣ್ಣು ತಿಂಬಲೆ ಹೇಳಿ ಮನೆಗೆ ಓಡಲೆ ಇದ್ದು…:P

  30. ಈಗ ಅಕ್ಕಿಯ ರೇಟು ಏರ್ತಾ ಇಪ್ಪದು ನೋಡಿದರೆ ಹಲಸು ಹಳಸುವಬದಲು ಹಶುವಿಂಗೆ ತಿನ್ನೆಕ್ಕಾದ ಕಾಲ ವಾಪಾಸು ಬೇಗನೆ ಬಪ್ಪ ಹಾಂಗೆ ಕಾಣ್ತಾ ಇದ್ದು ಹಾಂಗಾಗಿ ಬೇಳೆಯ ಅಂತೇ ಇಡುಕ್ಕದ್ದೆ ಬೇಲಿಕರೆಲಿ ಬಿತ್ತು ಹಾಕಿದರೆ ಮುಂದಂಗೆ ಹೊಟ್ಟೆ ತುಂಬುಸುಗು ಅಲ್ಲದೋ…………………? ಸಮಯೋಚಿತ ಲೇಕನ ಲಾಯ್ಕಾತಿದು.

    1. ಮಾನಡ್ಕ ಪ್ರಸಾದಭಾವಯ್ಯಂಗೆ ಒಪ್ಪಂಗೊ!

      ಈಗಾಗಲೇ ಹಲಸಿನಣ್ಣಿನ ಅಕ್ಕಿಯ ಬದಲಿಂಗೆ ತಿಂತವಡ, ಹೆರದೇಶಲ್ಲಿ.
      ನಮ್ಮ ಅಜ್ಜಂದ್ರು ಮದಲಿಂಗೆ ’ಕಂಟ್ರೋಲು’ ಇದ್ದಿಪ್ಪಾಗ ತಿಂದಿದವಾಡ.

      ಮುಂದೆಯೂ ಇದೇ ನಮುನೆ ಬಂದರೆ, ಎಂತ ಮಾಡುದು?
      ತಿಂಬದು! ಅಟ್ಟೇ. ಅಲ್ಲದೋ? 🙂

      1. ಮೊದಲಿಂಗೆ ನಮ್ಮ ಅಜ್ಜಂದ್ರು ಮೈಬಗ್ಗುಸಿ ಸಮಾ ಕೆಲಸ ಮಾಡಿಗೊಂಡು ಇತ್ತಿದ್ದವಿದಾ ಹಾಂಗಾಗಿ ಅವಕ್ಕೆ ಲಾಯೆಕ ಜೀರ್ಣ ಆಗಿಗೊಂಡು ಇತ್ತಿದ್ದು, ಹೊಟ್ಟೆಲಿ ಗೇಸು ತುಂಬಿಗೊಂಡು ಇತ್ತಿಲ್ಲೆ . ನವಗೇ ಎಡಿತ್ತಿಲ್ಲೆ ಇನ್ನಾಣವಕ್ಕೆ ಹಾಂಗೆ ಕೆಲಸ ಮಾಡ್ಲೆ ಎಡಿಗೋ? ಹಾಂಗಾಗಿ ಶುಂಠಿ ತಂಬ್ಳಿ ಒಟ್ಟಿಂಗೆ ಇದ್ದರೆ ಮಾತ್ರಾ ಹಲಸಿನ ಕಾಯಿ ಅಲ್ಲದೋ………?

  31. ಒಪ್ಪಣ್ಣೋ, ನಮಸ್ಕಾರ ಹಲಸಿನ ಹಣ್ಣಿನ ಸುದ್ದಿ ಹೇಳುಗ ಎನಗೆ ಎನ್ನ ಅಮ್ಮನ ನೆಂಪಾತು.ಮೊನ್ನೆ ಅಮ್ಮ ಹೇಳಿದ್ದು ಇನ್ನೊಂದರಿ ಬಪ್ಪಗ ಹಲಸಿನ ಬೇಳೆ ಇದ್ದರೆ ತಾ ಹೇಳಿ. (ಅವು ಇಪ್ಪದು ಪೇಟೆಲಿ.) ಎನ್ನ ಅಮ್ಮ ಬೇಳೆಯ ಬೇಯಿಸಿ ಅದರ ಕಪ್ಪು ಚೋಲಿ ತೆಗದು ಕಡದು ಬಾಣಲೆಲಿ ಕಾಸಿ,ಸಕ್ಕರೆ ಹಾಕಿ ಹಲ್ವ ಮಾಡ್ತವು.ಆ ಹಲ್ವತಿಂದರೆ ಮತ್ತೆ ಆರ ಮನೆಲಿಯು ಬೇಳೆ ಕಾಂಬಲೆ ಸಿಕ್ಕ!!!!!!!!!!!!

    1. ಅನುಪಮಕ್ಕಂಗೆ ನಮಸ್ಕಾರಂಗೊ.
      ಶುದ್ದಿಗೆ ಒಪ್ಪ ಒಪ್ಪಕೊಟ್ಟದು ಕಂಡು ಕೊಶೀ ಆತು ಅಕ್ಕ.

      ಬೇಳೆ ಹಲುವದ ಬಗ್ಗೆ ಹೇಳಿದ್ದು ಕಂಡು ಬಾಯಿಲಿ ನೀರು ಬಂತು!
      {ಆ ಹಲ್ವತಿಂದರೆ }
      – ಇನ್ನಾಣ ಸರ್ತಿ ಬಪ್ಪಗ ಮಾಡಿಕೊಡುವಿರೋ ಅಕ್ಕಾ? 😛

  32. Oppanna oppa baare chenda aidu, oduga baayili neeru battu, halasina kayiya bele gontappadu adu illadda oringe hodappaga!! Dubaili ondu sanna 250gram pieceingge 100 rupees iddu:( Rajja italgiyange export maadi..:)

    1. ಹರೀಶಣ್ಣಾ.. ನಿ೦ಗೊ ದುಬಾಯಿಲಿ ಇಪ್ಪದೋ? ಎಲ್ಲಿಪ್ಪದು?

        1. ಆನು ದುಬಾಯಿಲೇ ಇಪ್ಪದು.. ಎನ್ನ ಅಪ್ಪಚ್ಚಿ ಎಲ್ಲ ಹೇಳೆಕು ಹೇಳಿ ಇಲ್ಲೆಪ್ಪಾ.. ಆನು ಇನ್ನುದೆ ಸಣ್ಣ ಮಾಣಿ ಅಲ್ಲದೊ? 😉

          1. ಭಾವಯ್ಯಂದ್ರೇ!
            ಬೈಲು ಸಾರ್ಥಕ ಅಪ್ಪದರ್ಲಿ ಈ ಸಂಗತಿಯೂ ಒಂದಿದ್ದು!
            ಇಬ್ರುದೇ ನೆರೆಕರೆ(http://nerekare.com) ಗೆ ಬನ್ನಿ, ನಿಂಗಳ ನೆರೆಕರೆಯೋರನ್ನೂ ಕರಕ್ಕೊಂಡು ಬನ್ನಿ ಆತೋ? 🙂

  33. ಹಳಸುದು ಬಿಡಿ, ಒಪ್ಪಣ್ಣ ಮಾಡಿದ ಹಲಸಿನ ಪಾಕವ ಒಲೆಂದ ಇಳುಗಿ ಮಡುಗಿ ಬೆಶಿ ಆರೆಕ್ಕಾರೆ ಮದಲೇ ‘ಫು..ಫೂ..’ ಹೇಳಿ ಊಪಿ ಊಪಿ ತಣುಶಿ ತಿಂದು ರುಚಿನೋಡಿ ಒಪ್ಪ ಕೊಡ್ತಾ ಇದ್ದೆ.

    ಭಾರೀ ಪಷ್ಟಾಯಿದು.
    ಹಲಸಿನ ಪಾಕ ವೈವಿಧ್ಯ ವಿವರ ಹುಲುಸಾಗಿ ಬೈಂದು- ಕೊದಿ ಹಿಡುಶುವಷ್ಟು!!

    ಹಲಸಿನಕಾಯಿ ಕೊರವದು ಹೇಳಿರೆ ದೊಡ್ಡಭಾವನಾಂಗೆ ಗಡಿಬಿಡಿಲಿ ತಾರಮಾರ ಕೊರವದಲ್ಲ. ಇದಾ, ಆನು ಕೊರೆತ್ತರೆ ಅದರ ‘ಮೂಗು’ (ಗೂಂಜಿಂಗೆ ಸೇರಿಂಡಿಪ್ಪ ಸೊಳೆಯ ಅಗ್ರಭಾಗ) ‘ಅಂತರ’ (ಹೆರಾಣ ಮುಳ್ಳಿಂಗೂ ಸೊಳೆಯ ಬುಡಕ್ಕೂ ನಡೂಕೆ ಇಪ್ಪ ಬೆಳೀ ಗಟ್ಟಿ ಅಂಶ) ಸಿಕ್ಕುವಾಂಗೆ ಜಾಗ್ರತೆಲಿ ಕೊರವೆ. ಎರಡುದೆ ತಾಳಿಂಗೆ ಪಷ್ಟಾವುತ್ತು.
    ಬೆಳದ ಹಲಸಿನಕಾಯಿಯನ್ನೂ ಸಮೂಲ ಕೊರವಲಾವ್ತು. ಹಲಸಿನ ‘ಕಡಿ’ಲಿ ಇಪ್ಪ ಸೊಳೆಗಳ ಮೆಲ್ಲಂಗೆ ಗೀರಿ ಅದರಿಂದ ಬೇಳೆ ಮಾಂತ್ರ ರಟ್ಟುಸೆಕ್ಕು. ಮತ್ತೆ ಸಾರೆ ಪಂಚಸಾರೆ ಹೊದುಂಕುಳು ಸಮೇತ ಸೊಳೆಯ ಅಡ್ಡಡ್ಡ ಕೊರದತ್ತುಕಂಡ್ರೆ ಅದು ಸಮೂಲ.

    ಅಪ್ಪೂ.. ಇದೆಲ್ಲ ಎನ್ನಾಂಗಿದ್ದ ಒಪ್ಪಣ್ಣನಾಂಗಿದ್ದ ಹಲಸಿನಕಾಯಿಪ್ರಿಯರ ಕತೆ ಆತು. ಆಗದ್ದೆ ಇಪ್ಪವು ಕೇಡಿಲ್ಲಿ ಏನಾರು ಹೇಳಿ ನೆಗೆ ಮಾಡದ್ದೆ ಇಕ್ಕೊ? ಓ..ಆ ಹೊಸಮನೆ ಕಿಟ್ಟಣ್ಣ ನೀರ್ಸೊಳೆಯ ತಮಾಶೆ ಮಾಡ್ಲೆ ಪದ ಕಟ್ಟಿ ಹೇಳುದು- ‘ವಂದಿಪೆ ನಿನಗೆ ಗಣನಾಥಾ.. ಸೋಣೆ ತಿಂಗ್ಳು ಬಂದರೆ ಸೊಳೆ ನಾತಾ…’

    1. ಸುಬಗಣ್ಣಾ,
      ಯೇವತ್ರಾಣಂತೆ ಸ್ವಾರಸ್ಯಕರ ಒಪ್ಪ.
      ಊಪಿಊಪಿ ರುಚಿನೋಡಿದ್ದರ್ಲಿ ಅಷ್ಟೇ ಬೆಶಿ ಒಪ್ಪ ಕೊಟ್ಟಿರಲ್ಲದೋ ಶುದ್ದಿಗೆ! ಅದುವೇ ಸಂತೋಷ.
      ಕಿಟ್ಟಣ್ಣಮಾವನ ನಿಂಗೊ ಹಾಂಗೆ ನೆಗೆಮಾಡಿರೆ ನಿಂಗಳ ಮನೆದೇವರು ಮೋರಗೆ ಮೇಣ ಉದ್ದವೋ ಅಂಬಗ! ? 😉
      ಸಮೂಲ ಕೊರೆತ್ತದರ ವಿವರುಸುವಗ ಸುಂದರಿ ಕೋಳಿ ಕೊರೆತ್ತದರ ಬಗ್ಗೆ ಅಂದೊಂದರಿ ಹೇಳಿದ್ದು ನೆಂಪಾತು ಭಾವಾ! 🙂

      ಒಪ್ಪ ಒಪ್ಪಕ್ಕೆ ಒಪ್ಪಂಗೊ.

        1. ಅಪ್ಪು ಸುಬಗಣ್ಣಾ!
          ಮಾಂತ್ರ ಅಲ್ಲ, ಮುಳ್ಳು, ಮೇಣ, ರೆಚ್ಚೆ, ಗೂಂಜು, ಪಂಚಸಾರೆ, ಅಂತರ – ಎಲ್ಲವೂ ಇದ್ದಾಡ ಸುಂದರಿಯ ಕೋಳಿಗೆ! ಸೊಳೆ ಹೇಂಗೂ ಇದ್ದಾನೇ! 😉

          ಜಾಸ್ತಿ ನವಗರಡಿಯ, ಸುಂದರನ ಮನಗೆ ಹೋಗಿಪ್ಪಾಗ ಸುಂದರಿ ’ಕೋರಿ ಮೂರು’ಲೆ ಕೂದಿದ್ದರೆ ಕಂಡಿಕ್ಕಿ ಬನ್ನಿ. ಆಗದೋ? 😉

  34. [ಎಷ್ಟಾರೂ, ಅಜ್ಯಕ್ಕೊಗೆ ಗೊಂತಿಪ್ಪಟ್ಟು ನವಗೆ ಅರಡಿಯಲೆ ಎಡಿಗೋ!!] – ಪರಂಚಲೋ?!
    [ಈಗ ಮಳೆಗಾಲ. ಈ ಹಿಂದೆಯೇ ಸುರು ಆಗಿ ಆಟಿ ಒರೆಂಗೂ ಎತ್ತಿ ಆತು]- ಅಂದರೂ ಎಲ್ಲಿಯೂ ನಾಟಿ ಆದಾಂಗೆ ಕಾಣುತ್ತಿಲ್ಲೆ ಅಲ್ಲದೋ.
    [ಚೆನ್ನೈಬಾವನ ಹಾಂಗೆ ಮೊಬೈಲು ಕುಟ್ಟುತ್ತವಕ್ಕೆ ಶೋಬಕ್ಕ ಕರೆಂಟು ಕೊಡದ್ದೆ ಮಾ ಉಪದ್ರ ಮಾಡಿಹಾಕಿದ್ದಡ] – ಕೆಲವು ಜೆನ ಸಿಮ್ ತೆಗದು ಮಡುಗಿಕ್ಕಿ ಒರಗುತ್ತವಡಯ್ಯ. ಇದೆಂತ ಕೆಣಿ?!!
    [ಅಜ್ಜಕಾನಬಾವ ನಿತ್ಯವೂ ಎಡಪ್ಪಾಡಿಗೆ ಹೋಗಿ ಉದಿಯಪ್ಪಗಾಣ ತಿಂಡಿ ಮುಗುಶಿಕ್ಕಿ ಬಪ್ಪದು!] – ಓಯಿ, ಅದು ಒತ್ತಾಯಕ್ಕೆ ಸುರು ಒಂದಿನ ಮಾತ್ರ ತಿಂಡಿ ಮಾಡಿದ್ದು ಹೇಳಿ ಹೇಳಿದ್ದಲ್ಲದೊ ನಮ್ಮತ್ರೆ?!.
    [ಹಪ್ಪಳ ಸುಟ್ಟಾಕುವಗ ಕರೆಂಟು ಹೋಗಿ, ಹೊತ್ತಿದ ಪರಿಮ್ಮಳ ಬಂದಪ್ಪಗಳೇ ಗೊಂತಾದ್ದಡ] – ಹಪ್ಪಳ ದಂಡಾಸಂದ ಆಗಳೇ ಆಚಿಗೆ ಬಿದ್ದಾಯ್ದು. ಹೊತ್ತಿದ್ದು ದಂಡಾಸವೋ ಅಲ್ಲ ಕೈಯ್ಯೋ!!
    [ಹೇಳಿರೆ ಅರ್ತ ಮಾಡಿಗೊಳ್ಳಿ] – ಅರ್ಥ ಆತು. – ಸುಂದರ ಬಂದ ದಿನ ಹಲಸಿನಾಯಿ ದೋಸೆ, ಕುಜ್ವೆ ಉಪ್ಪಿನಕ್ಕಾಯಿ, ಹಲಸಿನಾಯಿ ತಾಳು , ಹಲಸಿನಾಯಿ ಕೊದಿಲು. ಹಲಸಿನಾಯಿ ಮೇಲಾರ , ಹಲಸಿನಾಯಿ ಬೋಳುಬೆಂದಿ, ಹಲಸಿನಣ್ಣು ಪಾಚ, ಸೊಳೆ ಹೊರುದ್ದದು.
    [ರಪರಪನೆ ಮರಕ್ಕೆ ಹತ್ತಿ ಮರದ ಕೊಡಿಲಿ ಇದ್ದ ] – ಇನ್ನು ಬೈಲಿಲಿ ಮದ್ದು ಬಿಡ್ಳೆ, ಅಡಕ್ಕೆ – ತೆಂಗಿನಕ್ಕಾಯಿ ಕೊಯ್ಯಲೆ ಹೇಳಿ ತಲೆಬೆಷಿ ಬೇಡ.!!
    [ದೊಡ್ಡ ಅಕ್ಕಂಗೆ ನಾಳ್ತಿಂಗೆ ಅಪ್ಪನ ಮನೆಗೆ ಹೋಪಲಿದ್ದಾಡ …ದೊಡ್ಡ ಭಾವಂಗೆ ನಾಳಂಗೆ ತೆಂಕ್ಲಾಗಿ ಹೋಪಲೆ ಇದ್ದಾಡ] – ಆನು ಇಲ್ಲೇ ಹೊವ್ತೆ ನೀ ಅಲ್ಲೇ ಹೋಗು ಹೇಳಿ ಮದಲೇ ಪ್ಲಾನ್ ಮಾಡಿತ್ತವೋ ಹೇಂಗೆ?!
    ಅದಿರಲಿ. ಹಲಸಿನಕ್ಕಾಯಿ FOOD, 4F ಸಂಗಮ ಸೂತ್ರ ಭಾರೀ ಸ್ವಾರಸ್ಯವಾಗಿ ಚಿತ್ರಿತ ಆಯ್ದು. ಕೊಕ್ಕೆಂದ ಅಟ್ಟಿನಳಗೆ ವರೇಗೆ ಸುಂದರ ನಿರೂಪಣೆ. ಮನಸ್ಸಿಲ್ಲಿಯೂ ಹೇಮರ್ಸಿ ಮಡುಗುತ್ತಾನ್ಗೆ ಆಯ್ದು. ಅದಿರಲಿ, ಸೊಳೆ ಅಜಪ್ಪುತ್ತೇನೆ ಹೇಳಿ ಜೊತೇಲಿ ಕೂದವ ನಾಕು ಅಜಪ್ಪಿಯಪ್ಪಗ ಮೇಣ ಆವ್ತು ಹೇಳಿ ಆಚವ ಅಜಪ್ಪಿ ಮಡಿಗಿದ ಸೊಳೆ ತಟ್ಟೆಯ ಎದುರಂಗೆ ಎಳದು ದೊಡ್ಡಮಾವನ ಕೈಲಿ ದೊಡ್ಡ ಸೊಸೆಯತ್ರೆ ಸೊಳೆ ಹೊರುದು ತಿಂದು ಇನ್ನೊಂದು ವಾರಕ್ಕೆ ಆತು ಹೇಳಿ ಪಾಕೇಟು ಮಾಡಿ ಕಟ್ಟಿಯೊಂಡು ಹೋದ ಸುದ್ದಿ ಎಲ್ಲಿ ಎಡಿಟ್ ಆತು ಹೇಳಿ ದೊಡ್ಡ ಮಾವ ಕೇಳಿದ್ದಕ್ಕೆ ಒಪ್ಪಣ್ಣಂಗೆ ಲೊಟ್ಟೆ ಅರಡಿಯ ಹೇಳಿ ಹೇಳಿದ್ದನಡ ಅಪ್ಪೋ!!

    1. ಚೆನ್ನೈಭಾವಾ,
      ಎಷ್ಟು ಚೆಂದಕೆ ಒಪ್ಪ ಕೊಟ್ಟಿದಿ ನಿಂಗೊ! ಓದಿ ಕೊಶೀ ಆತು ಒಪ್ಪಣ್ಣಂಗೆ.
      { ಹಲಸಿನಾಯಿ ದೋಸೆ, ಕುಜ್ವೆ ಉಪ್ಪಿನಕ್ಕಾಯಿ, ಹಲಸಿನಾಯಿ ತಾಳು , ಹಲಸಿನಾಯಿ ಕೊದಿಲು. ಹಲಸಿನಾಯಿ ಮೇಲಾರ , ಹಲಸಿನಾಯಿ ಬೋಳುಬೆಂದಿ, ಹಲಸಿನಣ್ಣು ಪಾಚ, ಸೊಳೆ ಹೊರುದ್ದದು. } – ಅಂದೊಂದರೆ ತರವಾಡುಮನೆಗೆ ಕೆಲಸಕ್ಕೆ ಬತ್ತ ಸೋಜಂಗೆ ಇಷ್ಟೆಲ್ಲ ಬಳುಸಿ ಊಟ ಆದ ಮತ್ತೆ – ಅಳೆ ಬೋಡ? ಕೇಳಿದ್ದಕ್ಕೆ – “ಪೆಲಕ್ಕಾಯಿತವು ಆಂಟ ಬೋಡ್ಚಿ” ಹೇಳಿದ್ದಡ.

      { ಸುದ್ದಿ ಎಲ್ಲಿ ಎಡಿಟ್ ಆತು } – ಈ ವಿಶಯಲ್ಲಿ ಒಪ್ಪಣ್ಣಂಗೆ ನಿಜವಾಗಿಯೂ ಲೊಟ್ಟೆ ಅರಡಿಯ ಭಾವಾ! 😉
      ಏನೇ ಆಗಲಿ, ನಿಂಗಳ ಒಪ್ಪದ ಅಕೇರಿಯಾಣ ಗೆರೆ ಕೊಶೀ ಆತು ಎನಗೆ! 😉 🙂

  35. ಯೇ ಒಪ್ಪಣ್ಣಾ.. ಪ್ರತಿ ಗುರುವಾರ ಕಾದುಕೂದು ನಿ೦ಗಳ ಶುದ್ದಿ ಓದುವಗ ನಿ೦ಗೊ ಬೈಲಿನ ರೂವಾರಿ ಹೇಳ್ತದಕ್ಕಿ೦ತಲೂ ಒಟ್ಟಿ೦ಗೆ ಹುಟ್ಟಿ ಬೆಳೆದ ಒಪ್ಪಣ್ಣನ ಹಾ೦ಗೇ ತೋರ್ತು..
    ಆದರುದೆ ಎನ್ನ ಹೀ೦ಗೆ ಅಸಕ್ಕ ಹಾಕುಸಲೆ ಆಗ ಆತೋ.. 🙁 ಇದರೆಲ್ಲ ಓದುವಗ ಭಯ೦….ಕರ ಅಸಕ್ಕ ಆವ್ತು..
    ಎನಗುದೆ ಕಳುದ ವಾರ ಲಾಯಿಕದ ಹಲಸಿನ ಕಾಯಿ ಸಿಕ್ಕಿತ್ತಿದ್ದು, ಎ೦ತ ಮಾಡ್ಳುದೆ ಅರಡಿಯ. ಅ೦ದರುದೆ ನಾವು ಮಾ೦ತ್ರ ತಿ೦ದರೆ ಸಾಕು ಹೇಳ್ತ ಧೈರ್ಯಲ್ಲಿ ತಾಳು ಮಾಡಿದೆ. ದೇವರ ದಯ೦ದ ಲಾಯಿಕ ಆಗಿತ್ತಿದ್ದು. 😉
    ಹಲಸಿನ ಎಲೆಲಿ ಹಲಸಿನ ಚಿಳ್ಳೆ ಮಾಡ್ಲಾವುತ್ತಲ್ಲದೊ ಒಪ್ಪಣ್ಣಾ..
    ಭಾರೀ ಲಾಯಿಕದ ಬರಹಕ್ಕೆ ಭಾರೀ ಪ್ರೀತಿಯ ಒಪ್ಪ೦ಗೊ..

    1. ಪೆರುವದಣ್ಣಾ..
      ಶುದ್ದಿಗೆ ಸುರೂವಾಣ ಒಪ್ಪಕ್ಕೆ ಸುರೂವಾಣ ಒಪ್ಪ!
      ದೂರದ ಊರಿಲಿದ್ದರೂ ಬೈಲಿಂಗೆ ಭಯ೦….ಕರ ಹತ್ತರೆ ಇದ್ದ ಕಾರಣ ನಿಂಗೊ ದೂರವೇ ಬಾಕಿ ಆಯಿದಿ ಹೇಳ್ತ ಅನಿಸಿಕೆ ಬಾರದ್ದ ನಮುನೆ ಆತಲ್ಲದೋ! 🙂

      ಹಲಸಿನ ಎಲೆಲಿ ಚಿಳ್ಳೆ ಮಾಡ್ತದು, ಹೋಮದ ದರುವಿ ಮಾಡ್ತದು, ಮೂಡೆಕಟ್ಟುತ್ತದು, ಓಜೋಸಿ ಹಿಡಿತ್ತದು – ಎಲ್ಲವುದೇ ಒಂದೊಂದೇ ನೆಂಪಾವುತ್ತು.
      ನೆಂಪುಮಾಡಿಕೊಟ್ಟದು ತುಂಬ ಕೊಶಿ ಆತು.

      ಹರೇರಾಮ..

Comments are closed.

ಒಪ್ಪಣ್ಣ
ದೇವಸ್ಯ ಮಾಣಿ
ಕಾವಿನಮೂಲೆ ಮಾಣಿ
ಅಕ್ಷರ°
ಅನಿತಾ ನರೇಶ್, ಮಂಚಿ
ಅನು ಉಡುಪುಮೂಲೆ
ಎಬಿ ಭಾವ
ಬಂಡಾಡಿ ಅಜ್ಜಿ
ಬಟ್ಟಮಾವ°
ಪುಣಚ ಡಾಕ್ಟ್ರು
ಮಾಲಕ್ಕ°
ಬೋಸ ಬಾವ
ಒಪ್ಪಣ್ಣ
Menu
×